ການສຶກສາທີ່ພິມໃນວາລະສານການແພດອັງກິດ (British Medical Journal) ໄດ້ຕິດຕາມໄວໜຸ່ມຈຳນວນ 408 ຄົນ ອາຍຸລະຫວ່າງ 12-17 ປີ ທັງກ່ອນ ແລະ ຫຼັງການບັງຄັບໃຊ້ກົດໝາຍວ່າດ້ວຍການແກ້ໄຂຄວາມປອດໄພທາງອອນລາຍປີ 2024 ກ່ຽວກັບການກຳນົດອາຍຸຂັ້ນຕໍ່າສຳລັບການໃຊ້ສື່ສັງຄົມອອນລາຍໃນປີ 2024 ເປັນເວລາ 3 ເດືອນ. ໂດຍກົດໝາຍດັ່ງກ່າວມີຜົນບັງຄັບໃຊ້ໃນເດືອນທັນວາ 2025 ແລະ ກຳນົດໃຫ້ແພັລດຟອມໃຫຍ່ໆລວມມີ TikTok X, Facebook, Instagram, YouTube ແລະ Snapchat ປະຕິບັດມາດຕະການທີ່ເໝາະສົມເພື່ອບລັອກບັນຊີຜູ້ໃຊ້ທີ່ມີອາຍຸຕ່ຳກວ່າກຳນົດ ຊຶ່ງຜູ້ຕອບແບບສອບຖາມປະມານສອງສ່ວນສາມພົບກັບມາດຕະການການຢັ້ງຢືນອາຍຸ ແລະ ວິທີການທີ່ພົບເຫັນຫຼາຍທີ່ສຸດແມ່ນການຢືນຢັນອາຍຸດ້ວຍຕົນເອງ ຫຼື ການຢືນຢັນດ້ວຍຮູບພາບ.
ທ່ານ ຄອດນີ ບານສ ນັກຄົ້ນຄວ້າດ້ານສາທາລະນະສຸກ ຈາກມະຫາວິທະຍາໄລ Newcastle ກ່າວວ່າ: ຍັງມີຫຼັກຖານທີ່ຊັດເຈນກ່ຽວກັບການຫຼີກລ່ຽງມາດຕະການເຫຼົ່ານີ້ເຊັ່ນ: ການໃຊ້ບັນຊີປອມ ຫຼື ບັນຊີຂອງໝູ່ເພື່ອນ ແລະ ສະມາຊິກໃນຄອບຄົວ. ໂດຍໄວໜຸ່ມ 15-19% ໃຊ້ບັນຊີປອມເພື່ອເຂົ້າເຖິງແພັລດຟອມຕ່າງໆ, 9-29% ເຂົ້າເຖິງຜ່ານບັນຊີຂອງຄົນອື່ນ ແລະ 11% ໃຊ້ໂໝດທ່ອງເວັບແບບສ່ວນຕົວເພື່ອຫຼີກລ່ຽງຂໍ້ຈຳກັດເຫຼົ່ານີ້. ໃນຂະນະທີ່ຮູບແບບການນຳໃຊ້ໂດຍລວມໄດ້ມີການປ່ຽນແປງພຽງເລັກນ້ອຍ, ໂດຍການໃຊ້ສື່ສັງຄົມອອນລາຍປະຈຳວັນເກືອບບໍ່ມີການປ່ຽນແປງໃນບັນດາເດັກນ້ອຍອາຍຸ 12-13 ປີ, ຫຼຸດລົງເລັກນ້ອຍໃນບັນດາເດັກນ້ອຍອາຍຸ 14-15 ປີ ແລະ ເພີ່ມຂຶ້ນໃນບັນດາຜູ້ທີ່ມີອາຍຸ 16 ປີຂຶ້ນໄປ.
ການຫ້າມເດັກນ້ອຍອາຍຸຕ່ຳກວ່າ 16 ປີໃຊ້ສື່ສັງຄົມອອນລາຍຂອງອົສຕຣາລີໄດ້ຮັບຄວາມສົນໃຈຈາກທົ່ວໂລກ. ໂດຍຫຼາຍປະເທດເຊັ່ນ: ອັງກິດ, ຝຣັ່ງ, ແອັດສະປາຍ, ເກຣັກ, ນອກແວ ແລະ ຕວັກກີກຳລັງຊຸກຍູ້ໃຫ້ມີກົດໝາຍທີ່ຄ້າຍຄືກັນເພື່ອເພີ່ມຄວາມເຂັ້ມງວດໃນການກວດກາການໃຊ້ສື່ສັງຄົມອອນລາຍຂອງເດັກນ້ອຍ ແລະ ໄວໜຸ່ມ. ໂດຍທ່ານ ບານສ ກ່າວວ່າ: ຜົນການສຶກສານີ້ແມ່ນໜຶ່ງໃນການປະເມີນຄັ້ງທຳອິດຂອງມາດຕະການດັ່ງກ່າວ ຊຶ່ງມີຄວາມສຳຄັນເນື່ອງຈາກຫຼາຍປະເທດກຳລັງຕິດຕາມອົສຕຣາລີຢ່າງໃກ້ຊິດ ແລະ ຜົນການຄົ້ນຄວ້ານີ້ຊ່ວຍໃຫ້ເຫັນພາບລວມໃນໄລຍະເລີ່ມຕົ້ນຂອງການນຳນະໂຍບາຍໄປຈັດຕັ້ງປະຕິບັດຕົວຈິງ.
ຜູ້ຊ່ຽວຊານຊີ້ໃຫ້ເຫັນວ່າ: ປະສິດທິພາບຂອງມາດຕະການນີ້ມີທ່າອ່ຽງທີ່ຈະຂຶ້ນກັບຄວາມເຂັ້ມງວດ ແລະ ຄວາມສອດຄ່ອງຂອງການບັງຄັບໃຊ້ລະບົບກວດສອບອາຍຸໃນໄລຍະຍາວ. ໂດຍທີມງານຄົ້ນຄວ້າຍອມຮັບວ່າອາດໃຊ້ເວລາຫຼາຍປີເພື່ອເບິ່ງຜົນກະທົບຢ່າງເຕັມທີ່ຂອງກົດໝາຍສະບັບນີ້ ແລະ ການປະເມີນຜົນໄລຍະຍາວຈະມີຄວາມສຳຄັນຫຼາຍ.
ຄໍາເຫັນ