ປະດັບຫຼຽນໄຊພິລະອາດຫານໃຫ້ການນຳແຂວງສະຫວັນນະເຂດ

ໃນວັນທີ 28 ພະຈິກຜ່ານມາ ທີ່ຫ້ອງວ່າການປົກຄອງແຂວງສະຫວັນນະເຂດ ໄດ້ຈັດພິທີປະດັບຫຼຽນໄຊພິລະອາດຫານໃຫ້ແກ່ການນຳແຂວງສະຫວັນນະເຂດ ໂດຍການໃຫ້ກຽດເຂົ້າຮ່ວມເປັນປະທານປະດັບຫຼຽນຂອງສະຫາຍ ພົອ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ຮອງປະທານຜູ້ປະຈຳການຄະນະກຳມະການປ້ອງກັນຊາດ (ປກຊ)-ປ້ອງກັນຄວາມສະຫງົບ (ປກສ) ສູນກາງ, ມີສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ ເຈົ້າແຂວງສະຫວັນນະເຂດ ປະທານຄະນະກຳມະການ ປກຊ-ປກສ ແຂວງ, ສະຫາຍ ສັນຕິພາບ ພົມວິຫານ ກຳມະການສູນກາງພັກ ລັດຖະມົນຕີກະຊວງການເງິນ (ອະດີດເຈົ້າແຂວງສະຫວັນນະເຂດ) ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໃນພິທີໄດ້ຜ່ານມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງກຳມະການຄະນະກຳມະການ ປກຊ-ປກສ ແຂວງ ຊຶ່ງໄດ້ຕົກລົງແຕ່ງຕັ້ງສະຫາຍ ພົຈ ຂັນທີ ສະໜາມອຸ່ນ ແລະສະຫາຍ ພູລຳພອນ ສີຫາວົງ ເປັນກຳມະການ, ຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການມອບຫຼຽນໄຊພິລະອາດຫານຊັ້ນ I ໃຫ້ແກ່ການນຳແຂວງຈຳນວນ 2 ສະຫາຍຄື: ສະຫາຍ ບຸນໂຈມ ອຸບົນປະເສີດ ແລະ ສະຫາຍ ສັນຕິພາບ ພົມວິຫານ, ຕົກລົງມອບຫຼຽນໄຊຊັ້ນ II ໃຫ້ການນຳແຂວງສະຫວັນນະເຂດຈຳນວນ 7 ສະຫາຍຄື: ສະຫາຍ ພູວັງ ເກດແກ້ວພົມພອນ ຮອງເລຂາພັກແຂວງ ຮອງປະທານຄະນະກຳມະການ ປກຊ-ປກສ, ສະຫາຍ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ, ສະຫາຍນາງ ຫຼິງທອງ ແສງຕາວັນ ຮອງເຈົ້າແຂວງ ປະທານສະພາສຶກສາ ປກຊ-ປກສ, ສະຫາຍ ແສນສັກ ສຸລິສັກ ຮອງເຈົ້າແຂວງຜູ້ຊີ້ນຳວຽກງານເສດຖະກິດ, ສະຫາຍ ພົຈ ສົມໝາຍ ພົມມະຈັນ ຮອງປະທານຄະນະກຳມະການ ປກຊ-ປກສ ຫົວໜ້າກອງບັນຊາການ ປກສ ແຂວງ, ສະຫາຍ ທອງໃສ ໄຊຍະວົງຄຳດີ ເຈົ້າເມືອງອຸຸທຸມພອນ (ອະດີດຫົວໜ້າຫ້ອງວ່າການປົກຄອງແຂວງ) ແລະ ສະຫາຍ ຄຳຜຸຍ ສີບຸນເຮືອງ ຫົວໜ້າພະແນກແຜນການ ແລະ ການລົງທຶນແຂວງ ແລະ ຕົກລົງມອບຫຼຽນໄຊພິລະອາດຫານຊັ້ນ III ໃຫ້ແກ່ເຈົ້າເມືອງ, ເຈົ້ານະຄອນ, ພະແນກການຂຶ້ນກັບແຂວງ ແລະ ບໍລິສັດຈຳນວນ 18 ສະຫາຍ ຊຶ່ງບັນດາສະຫາຍທີ່ໄດ້ຮັບການປະດັບຫຼຽນໃນຄັ້ງນີ້ ລ້ວນແຕ່ເປັນຜູ້ທີ່ມີຜົນງານດີເດັ່ນປະກອບສ່ວນອັນສຳຄັນເຂົ້າໃນວຽກງານປກຊ-ປກສ ເພື່ອປົກປັກຮັກສາ ແລະພັດທະນາປະເທດຊາດ. ໃຫ້ກຽດປະດັບຫຼຽນໂດຍສະຫາຍ ພົອ ຈັນສະໝອນ ຈັນຍາລາດ.
ໂອກາດນີ້, ສະຫາຍ ພົອ ຈັນສະໝອນ ຈັນຍາລາດ ໄດ້ໃຫ້ກຽດໂອ້ລົມໃຫ້ທິດຊີ້ນຳບາງດ້ານຕໍ່ບັນດາສະຫາຍຄະນະກຳມະການ ປກຊ-ປກສ ແຂວງ ທີ່ໄດ້ເອົາໃຈໃສ່ປະຕິບັດໜ້າທີ່ວຽກງານສອດຄ່ອງກັບເງື່ອນໄຂ ແລະສະພາບຕົວຈິງໃນແຕ່ລະຂົງເຂດວຽກງານຢ່າງມີປະສິດທິຜົນ. 
ຂ່າວ-ພາບ: ສະຫວັນນະເຂດ