ປະດັບຫຼຽນຊາວໜຸ່ມຕະລຸມບອນໃຫ້ການນໍາແຂວງຫຼວງນໍ້າທາ

ຫວ່າງບໍ່ດົນມານີ້ ທີ່ສະໂມສອນແຂວງຫຼວງນໍ້າທາໄດ້ຈັດພິທີປະດັບຫຼຽນຊາວໜຸ່ມຕະລຸມບອນໃຫ້ການນໍາແຂວງ ແລະ ມອບໃບຢັ້ງຢືນ 4 ບຸກ ໃຫ້ຄະນະຊາວໜຸ່ມປະຊາຊົນປະຕິວັດລາວແຂວງຫຼວງນໍ້າທາ, ໂດຍການເປັນປະທານຂອງສະຫາຍ ມອນໄຊ ລາວມົວຊົ່ງ ເລຂາຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ, ໃຫ້ກຽດເຂົ້າຮ່ວມຂອງສະຫາຍ ວຽງສະຫວັດ ສີພັນດອນ,ສະຫາຍ ຈັນທອງ ແກ້ວປະເສີດ ຮອງເລຂາພັກແຂວງຫົວໜ້າຄະນະຈັດຕັ້ງແຂວງ, ມີການນໍາຂອງແຂວງ,ຂະແໜງການທີ່ກ່ຽວຂ້ອງ,ຄະນະປະຈໍາຊາວໜຸ່ມ,ເລຂາໜ່ວຍ ແລະ ສະມາຊິກຊາວໜຸ່ມເຂົ້າຮ່ວມ.
    ສະຫາຍ ນາງ ຈັນເພັງ ນາດາ ຮອງຫົວໜ້າກົມຈັດຕັ້ງສູນກາງຊາວໜຸ່ມປະຊາຊົນປະຕິວັດລາວ ຜ່ານຂໍ້ຕົກລົງຂອງສູນກາງຊາວໜຸ່ມປະຊາຊົນປະຕິວັດລາວ ສະບັບເລກທີ 901/ສຊປລ ວ່າດ້ວຍການມອບຫຼຽນຊາວໜຸ່ມຕະລຸມບອນ,ຂໍ້ຕົກລົງ ເລກທີ780/ສຊປລ ວ່າດ້ວຍການຢັ້ງຢືນຄະນະຊາວໜຸ່ມປະຊາຊົນ ປະຕິວັດລາວແຂວງຫຼວງນໍ້າທາ ເປັນຄະນະຊາວໜຸ່ມ ປະຊາຊົນປະຕິວັດລາວ 4 ບຸກ, ຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈໍາປີ 2022 ແລະ ທິດທາງແຜນການປະຈໍາປີ 2023, ຄະນະຊາວໜຸ່ມປະຊາຊົນປະຕິວັດລາວ ແຂວງຫຼວງນໍ້າທາ ແມ່ນອົງການຈັດຕັ້ງມະຫາຊົນໃນລະບົບການເມືອງ ມີພາລະບົດບາດພາຍໃຕ້ການຊີ້ນໍາ-ນໍາພາໂດຍກົງຮອບດ້ານຂອງຄະນະປະຈໍາພັກແຂວງ,ສາຍຕັ້ງຂຶ້ນກັບ ສູນກາງຊາວໜຸ່ມປະຊາຊົນປະຕິວັດລາວ,ທົ່ວແຂວງປະກອບມີ 83 ຄະນະຊາວໜຸ່ມຮາກຖານ ມີ 620 ໜ່ວຍຮາກຖານຊາວໜຸ່ມ,ມີສະມາຊິກ 24.131 ສະຫາຍຍິງ 9.907 ສະຫາຍ.  ເພື່ອຕີລາຄາການຈັດຕັ້ງປະຕິບັດຂະບວນການຂໍ້ແຂ່ງຂັນ 4 ບຸກ ປະຈໍາປີ 2022 ຄະນະຊາວໜຸ່ມທຸກຂັ້ນໄດ້ຍົກສູງ ແລະ ຖືເອົາວຽກງານການສຶກສາອົບຮົມທາງດ້ານການເມືອງແນວຄິດໃຫ້ສະມາຊິກຊາວໜຸ່ມໃນຂົງເຂດຄວາມຮັບຜິດຊອບຂອງຕົນ ໂດຍການນໍາເອົາແນວທາງນະໂຍບາຍຂອງພັກ ລະບຽບກົດໝາຍຂອງລັດ, ແຜນພັດທະນາເສດຖະກິດ-ສັງຄົມ,ມະຕິ,ຄໍາສັ່ງ,ເອກະສານມູນເຊື້ອຂອງຊາວໜຸ່ມ,ຂອງພັກ-ຂອງຊາດ  ແລະ ເອກະສານອົບຮົມຂອງຄະນະຊາວໜຸ່ມປະຊາຊົນ ປະຕິວັດລາວ ໂດຍສະເພາະແມ່ນເອກະສານຂໍ້ແຂ່ງຂັນ 4 ບຸກ ມາຈັດຕັ້ງເຊື່ອມຊຶມ,ຮໍ່າຮຽນໃຫ້ແກ່ສະມາຊິກ ເຮັດໃຫ້ສະມາຊິກມີຄວາມຮັບຮູ້ເຂົ້າໃຈ,ມີແນວຄິດອຸ່ນອຽນທຸ່ນທ່ຽງ, ເຊື່ອໝັ້ນຕໍ່ການຊີ້ນໍາ-ນໍາພາ ແລະ ແນວທາງປ່ຽນແປງໃໝ່ຂອງພັກໄດ້ເປັນຢ່າງດີ. ການຈັດຕັ້ງປະຕິບັດຂໍ້ແຂ່ງຂັນ 4 ບຸກ ສາມາດຮັບຮອງ 4 ບຸກໄດ້ 5 ເມືອງ, ພະແນກຊາວໜຸ່ມກອງບັນຊາການທະຫານແຂວງ,ຄະນະບໍລິຫານງານຊາວໜຸ່ມ ປປ ລາວ ກອງບັນຊາການ ປກສ ແຂວງ,21 ຄະນະຊາວໜຸ່ມຮາກຖານ, 39 ໜ່ວຍຮາກຖານອ້ອມຂ້າງແຂວງ, ມີສະມາຊິກເຂົ້າຮ່ວມແຂ່ງຂັນ 24.131 ສະຫາຍຍິງ 13.788 ສະຫາຍ. ຄະນະຊາວໜຸ່ມຮາກຖານມີ 83 ຮາກຖານ ສາມາດປະຕິບັດໄດ້ 80 ຮາກຖານ ເທົ່າກັບ 86,38%, ໜ່ວຍຮາກຖານຊາວໜຸ່ມອ້ອມຂ້າງແຂວງ,ອ້ອມຂ້າງເມືອງ ແລະ ຮາກຖານບ້ານມີ 620 ໜ່ວຍ, ສາມາດປະເມີນໄດ້ 566 ໜ່ວຍ ເທົ່າກັບ 91,29%, ສະມາຊິກຊາວໜຸ່ມທົ່ວແຂວງມີ 24.131 ສະຫາຍ ສາມາດປະເມີນໄດ້ 21.537 ສະຫາຍ ເທົ່າກັບ 89,45%. 
ໂອກາດນີ້ກໍໄດ້ມອບຫຼຽນຊາວໜຸ່ມຕະລຸມບອນໃຫ້ການນໍາຂອງແຂວງ ແລະ ມອບໃບຢັ້ງຢືນ 4 ບຸກ ໃຫ້ຄະນະຊາວໜຸ່ມປະຊາຊົນປະຕິວັດລາວແຂວງຫຼວງນໍ້າທາ, ໃຫ້ກຽດມອບໂດຍ ສະຫາຍ ມອນໄຊ ລາວມົວຊົ່ງພ້ອມທັງມອບຄອມພີວເຕີ 2 ຊຸດ ມູນຄ່າ 19 ລ້ານກີບ. ໃຫ້ກັບຄະນະຊາວໜຸ່ມປະຊາຊົນປະຕິວັດລາວແຂວງຫຼວງນໍ້າທາເພື່ອນໍາໄປຮັບໃຊ້ເຂົ້າໃນໜ້າທີ່ວຽກງານຕື່ມອີກ.
ຂ່າວ-ພາບ: ອຸ້ມ ສົມນໍວັນ