ປະກາດບ້ານໃຫຍ່ຄັງວຽງເປັນຕົວເມືອງນ້ອຍ

ທ່ານ ພົນໂທ ວົງຄຳ ພົມມະກອນ ໄດ້ກ່າວວ່າ: ບ້ານຄັງວຽງ ເມືອງໝອກເປັນຕົວເມືອງນ້ອຍໃນຊົນນະບົດ ກຸ່ມບ້ານຄັງວຽງປະກອບມີ 7 ບ້ານຄື: ບ້ານຄັງວຽງ,, ນໍ້າເຢັນ, ນາເມືອງ, ຖໍ້າສ້ອຍ, ທົ່ງເປີ, ນໍ້າຕາກ ແລະ ບ້ານຈະເລີນໃໝ່, ມີປະຊາກອນທັງໝົດ ໃນປີ 2013 ມີ 5,884 ຄົນ ຍິງ 2,891 ຄົນ, ມີ 803 ຄອບຄົວ, ເຜົ່າມົ້ງກວມເອົາ 92.9%, ເຜົ່າກຶມມຸ 0,34%;, ເຜົ່າລາວ 8.8%, ການດໍາລົງຊີວິດຂອງປະຊາຊົນອາຊີບຕົ້ນຕໍແມ່ນເຮັດນາ ແລະ ລ້ຽງສັດ. ຜ່ານໄລຍະ 10 ກ່ວາປີ ເຮັດໃຫ້ຈຸດສຸມຄັງວຽງ ເມືອງໝອກມີການຫັນປ່ຽນຢ່າງຕັ້ງໜ້າ ແລະ ຮອບດ້ານ, ໄດ້ຂະຫຍາຍໜ່ວຍພັກ ຈາກ 9 ໜ່ວຍໃນປີ 2012 ປັດຈຸບັນມີ 1 ຄະນະພັກຮາກຖານ 11 ໜ່ວຍພັກ,, ສ້າງໜ່ວຍພັກແຂງຮູ້ນໍາພາຮອບດ້ານໄດ້ 9 ໜ່ວຍ, ການກໍ່ສ້າງພື້ນຖານໂຄງລ່າງ:ໄດ້ຈັດຕັ້ງປະຕິບັດແຜນງົບປະມານການລົງທຶນຂອງລັດເລີ່ມແຕ່ສົກປີ 2013-2025 ຈົນເຖິງປັດຈຸບັນ ມີຈໍານວນ 24 ໂຄງການ, ມູນຄ່າການກໍ່ສ້າງທັງໝົດ 537 ຕື້ກວ່າກີບ. ທ່ານ ສົມສະໝອນ ພະລິຈັນ ຫົວໜ້າພະແນກກະສິກຳ ແລະ ປ່າໄມ້ແຂວງ ໄດ້ລາຍງານການກວດກາຜ່ານບັນດາມາດຖານເງື່ອນໄຂ ລວມທັງໝົດ 16 ມາດຖານເຫັນວ່າສາມາດປະກາດບ້ານຄັງວຽງເປັນຕົວເມືອງນ້ອຍໃນຊົນນະບົດໄດ້. ຈາກນັ້ນ, ທ່ານເຈົ້າແຂວງຊຽງຂວາງ ໄດ້ມອບໃບຢັ້ງຢືນໃຫ້ບ້ານຄັງວຽງ.

ໂອກາດນີ້, ທ່ານເຈົ້າແຂວງຊຽງຂວາງ ໄດ້ສະແດງຄວາມຊົມເຊີຍດີໃຈຕໍ່ຜົນສຳເລັດສາມາດປະກາດບ້ານໃຫຍ່ຄັງວຽງເປັນຕົວເມືອງນ້ອຍ. ນອກນີ້, ທ່ານຍັງໄດ້ເນັ້ນໜັກໃຫ້ສືບຕໍ່ເອົາໃຈໃສ່ຮັກສາມູນເຊື້ອ, ຮັກສາຄວາມສາມັກຄີຮັກແພງ, ເຕົ້າໂຮມຄວາມສາມັກຄີກັບທຸກໆສ່ວນ, ໂດຍສະເພາະແມ່ນພະນັກງານ, ສະມາຊິກພັກ, ກໍາລັງປະກອບອາວຸດ, ກໍາລັງຫຼວງ, ກໍາລັງທ້ອງຖິ່ນ, ພາກລັດ, ເອກະຊົນ ແລະ ປະຊົນທຸກຊັ້ນຄົນໃຫ້ເປັນປຶກແຜ່ນແຫນ້ນຫາ, ເອົາໃຈໃສ່ນໍາພາເຮັດວຽກງານສຶກສາອົບຮົມການເມືອງແນວຄິດໃຫ້ສະມາຊິກພັກ, ພະນັກງານ, ນັກຮົບ ແລະ ປະຊາຊົນບັນດາເຜົ່າ, ສືບຕໍ່ປັບປຸງລະບອບແບບແຜນວິທີເຮັດວຽກ ແລະ ວິທີນໍາພາ, ເອົາໃຈໃສ່ ແລະ ເປັນແບບຢ່າງນໍາໜ້າປະຕິບັດຢ່າງເຂັ້ມງວດຫຼັກການຕໍານິຕິຊົມຕົນເອງ ແລະ ຕິຊົມກັນພາຍໃນພັກ ແລະ ພາຍໃນຄະນະຮັບຜິດຊອບຕົວເມືອງນ້ອຍໃຫ້ແຂງແຮງ, ໃຫ້ເອົາໃຈໃສ່ນໍາພາຮຽນເອົາແບບແຜນວິທີເຮັດວຽກ, ແບບແຜນວິທີນໍາພາ, ວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ແລະ ສືບຕໍ່ພັດທະນາດ້ານອື່ນໆໃຫ້ມີຜົນສໍາເລັດ. ຈາກນັ້ນ, ການນຳຂັ້ນສູງທີ່ເຂົ້າຮ່ວມໄດ້ພ້ອມກັນເປີດປ້າຍປະກາດບ້ານໃຫຍ່ເປັນຕົວເມືອງນ້ອຍໃນຊົນນະບົດ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນ.

(ຂ່າວ: ບຸນມີ ແສງທຸມມີ)