ປະກາດການຈັດຕັ້ງພາຍຫຼັງໂຮມ ກຜທ ເຂົ້າກັບກະຊວງການເງິນ

ສະຫາຍ ສຸກຄຳເພັດ ເຮືອງບຸດສີ ຮອງປະທານກວດກາສູນກາງພັກໄດ້ຕາງໜ້າຄະນະຮັບຜິດຊອບປັບປຸງກົງຈັກການຈັດຕັ້ງໄດ້ຂຶ້ນຜ່ານເອກກະສານສຳຄັນ ຊຶ່ງມີບາງເນື້ອໃນສຳຄັນຄື: ອີງຕາມການຕົກລົງຜົນຂອງກອງປະຊຸມກົມການເມືອງຮ່ວມກັບຄະນະເລຂາທິການສູນກາງພັກ, ກົມການເມືອງສູນກາງພັກຕົກລົງແຕ່ງຕັ້ງ ສະຫາຍ ສັນຕິພາບພົມວິຫານ ກຳມະການສູນກາງພັກເປັນເລຂາຄະນະບໍລິຫານງານພັກກະຊວງການເງິນ; ປະທານປະເທດອອກລັດຖະດຳລັດແຕ່ງຕັ້ງສະຫາຍ ສັນຕິພາບ ພົມວິຫານ ເປັນລັດຖະມົນຕີກະຊວງການເງິນ; ອີງຕາມຄຳສັ່ງຂອງຄະນະເລຂາທິການສູນກາງພັກ ວ່າດ້ວຍການຍຸບເລີກອົງຄະນະພັກກະຊວງການເງິນ ແລະ ອົງຄະນະພັກ ກຜທ; ຄະນະເລຂາທິການສູນກາງພັກເຫັນດີໂຮມເອົາການຈັດຕັ້ງຮາກຖານພັກ, ຈຳນວນສະມາຊິກພັກຂອງອົງຄະນະພັກກະຊວງການເງິນ ແລະ ອົງຄະນະພັກ ກຜທ ສ້າງຕັ້ງເປັນອົງຄະນະພັກກະຊວງການເງິນ; ຄະນະເລຂາທິການສູນກາງພັກອອກມະຕິຕົກລົງວ່າດ້ວຍການສ້າງຕັ້ງອົງຄະນະພັກກະຊວງການເງິນ, ເຫັນດີບົ່ງຕົວແຕ່ງຕັ້ງຄະນະບໍລິຫານງານພັກກະຊວງການເງິນປະກອບມີ 9 ສະຫາຍ ຍິງ 2 ສະຫາຍ ຊຶ່ງມີລາຍຊື່ຄື: 1. ສະຫາຍ ສັນຕິພາບ ພົມວິຫານ, 2. ນາງ ພອນວັນ ອຸທະວົງ, 3 ສະຫາຍ ພູວົງ ກິດຕະວົງ, 4. ສະຫາຍ ສຸລິວັດ ສຸວັນນະຈູມຄໍາ, 5. ສະຫາຍນາງ ເພັດສະໝອນ ສອນ, 6. ສະຫາຍ ອຸບັນ ສຸພິດາ, 7. ສະຫາຍ ພູເຂົາ ຄຳວັນນະວົງໄຊ, 8. ສະຫາຍ ວົງຄຳແຫງ ວົງທະຈັກ, 9. ສະຫາຍ ອຸຕະແກ້ວ ແກ້ວດວງສິນ; ເຫັນດີບົ່ງຕົວແຕ່ງຕັ້ງຄະນະປະຈຳພັກ, ເລຂາ, ຮອງເລຂາກະຊວງການເງິນ. 1. ສະຫາຍ ສັນຕິພາບ ພົມວິຫານ ເປັນເລຂາຄະນະບໍລິຫານງານພັກ, 2. ນາງ ພອນວັນ ອຸທະວົງ ເປັນຮອງເລຂາຄະນະພັກ, 3.ສະຫາຍ ພູວົງ ກິດຕະວົງ ເປັນຄະນະປະຈຳພັກ.

ໃນພິທີ, ຍັງໄດ້ແຈ້ງໃຫ້ຊາບວ່າ: ໂຄງປະກອບກົງຈັກການຈັດຕັ້ງຂັ້ນກົມ ແລະ ບຸກຄະລາກອນຂອງກະຊວງການເງິນໃໝ່ນີ້ຊຶ່ງປະກອບມີ 17 ກົມ ແລະ 1 ສູນມີຖານະທຽບເທົ່າທະບວງ ທີ່ມີ 2 ກົມຂຶ້ນກັບ ດັ່ງນີ້: 1. ຫ້ອງການ ແລະ 2. ກົມຈັດຕັ້ງ ແລະ ພະນັກງານ, 3. ກົມກວດກາ, 4. ກົມງົບປະມານແຫ່ງລັດ, 5. ກົມນະໂຍບາຍເສດຖະກິດແລະ ການເງິນ, 6. ກົມແຜນການ, 7. ກົມປະເມີນຜົນ ແລະ ການຈັດຊື້-ຈັດຈ້າງ, 8. ກົມຮ່ວມມື ແລະ ການເງິນສາກົນ, 9. ກົມສ່ວຍສາອາກອນ, 10. ກົມພາສີ, 11. ຄັງເງິນແຫ່ງລັດ, 12. ກົມຄຸ້ມຄອງຊັບສິນແຫ່ງລັດ, 13. ກົມຄຸ້ມຄອງວິສາຫະກິດລັດ ລັດລົງທຶນ ແລະ ການປະກັນໄພ, 14. ກົມຄຸ້ມຄອງໜີ້ສາທາລະນະ, 15. ກົມຄຸ້ມຄອງການບັນຊີ, 16. ກົມເຕັກໂນໂລຊີຂໍ້ມູນຂ່າວສານການເງິນ, 17. ສະຖາບັນເສດຖະກິດການເງິນ ມີຫົວໜ່ວຍວິຊາການຂັ້ນສອງຄື: ສະຖາບັນເສດຖະກິດການເງິນສາຂາພາກເໜືອ ແລະ ສະຖາບັນເສດຖະກິດການເງິນສາຂາພາກໃຕ້, 18. ສູນສະຖິຕິແຫ່ງຊາດມີ 2 ກົມຄື: ກົມສະຖິຕິເສດຖະກິດ ແລະ ສັງຄົມ, ກົມສະຖິຕິສິ່ງແວດລ້ອມ ແລະ ຄວາມໝັ້ນຄົງ. ສຳລັບກົມຄຸ້ມຄອງວິສາຫະກິດລັດລົງທຶນ ແລະ ການປະກັນໄພແມ່ນເຫັນດີໃຫ້ໂອນວຽກຄຸ້ມຄອງວິສາຫະກິດລັດລົງທຶນທີ່ກ່ຽວກັບສິດໜ້າທີ່ຂອງຄະນະປະຕິຮູບວິສາຫະກິດໄປຂຶ້ນກັບຄະນະປະຕິຮູບວິສາຫະກິດພ້ອມດ້ວຍພະນັກງານທີ່ກ່ຽວຂ້ອງຈຳນວນໜຶ່ງ ຊຶ່ງລະອຽດໃຫ້ກະຊວງການເງິນສົມທົບກັບຄະນະປະຕິຮູບລັດວິສາຫະກິດ.

ສະຫາຍ ພົນເອກ ວິໄລ ຫຼ້າຄຳຟອງ ໄດ້ມີຄຳເຫັນວ່າ: ພາຍຫຼັງທີ່ມີການປັບປຸງແລ້ວ, ສະເໜີໃຫ້ຄະນະພັກ-ຄະນະນຳສືບຕໍ່ເປັນເຈົ້າການນຳພາແນວຄິດໃຫ້ແກ່ສະມາຊິກພັກ, ພະນັກງານໃຫ້ມີຄວາມຮັບຮູ້ຢ່າງເລິກເຊິ່ງ, ມີອຸດົມການທີ່ໜຽວແໜ້ນທີ່ສຸດ; ໃນນັ້ນ, ຕ້ອງໄດ້ສ້າງຄວາມເປັນເອກະພາບເພື່ອໃຫ້ມີຄວາມເປັນເອກະພາບຢູ່ໃນອຸດົມການ; ສ້າງຄວາມເອກກະພາບຢູ່ໃນຄະນະພັກກະຊວງ, ເອກະພາບກັບຂັ້ນເທິງ, ເອກະພາບກັບການຈັດຕັ້ງ, ເຕົ້າໂຮມຄວາມສາມັກຄີໃນລະບຽບຫຼັກການລວມສູນປະຊາທິປະໄຕ, ເຮັດວຽກເປັນໝູ່ຄະນະ; ຄະນະພັກ-ຄະນະນຳກະຊວງໃຫ້ເອົາໃຈໃສ່ປຶກສາຫາລືຕື່ມກ່ຽວກັບນິຕິກຳ ເພື່ອໃຫ້ມີຄວາມຖືກຕ້ອງສອດຄ່ອງ, ເຮັດໃຫ້ມີລັກສະນະຮັດກຸມ, ເຮັດໃຫ້ໄວເພື່ອເປັນມາດຖານໃນການຄຸ້ມຄອງຕາມນິຕິກຳນັ້ນໆ; ມີການແບ່ງງານ, ແບ່ງຄວາມຮັບຜິດຊອບຢ່າງຈະແຈ້ງ, ຫຼັງຈາກນັ້ນກໍໃຫ້ບັນດາສະຫາຍສືບຕໍ່ປັບປຸງການຈັດຕັ້ງຢູ່ຂັ້ນທ້ອງຖິ່ນໃຫ້ສຳເລັດໂດຍໄວເພື່ອເຮັດໃຫ້ຖັນແຖວສະມາຊິກພັກ, ພະນັກງານມີຄວາມເຊື່ອໝັ້ນອຸ່ນອ່ຽນທຸ່ນທ່ຽງຕໍ່ພັກ ແລະ ລັດ.

(ຂ່າວ-ພາບ: ແສງຈັນ)