ປະກາດການຈັດຕັ້ງຕຳແໜ່ງບໍລິຫານ, ປະດັບ, ເລື່ອນ ແລະ ທຽບຊັ້ນນັກການທູດໃຫ້ພະນັກງານ

ໃນພິທີທ່ານ ວັນດີ ບຸດສະດີ ກໍາມະການປະຈໍາພັກກະຊວງ ຫົວໜ້າກົມຈັດຕັ້ງ ແລະ ພະນັກງານ ໄດ້ຂຶ້ນຜ່ານ ຂໍ້ຕົກລົງ ວ່າດ້ວຍການແຕ່ງຕັ້ງຮອງຫົວໜ້າກົມ ຈຳນວນ 4 ທ່ານ, ຫົວໜ້າພະແນກ ຈຳນວນ 7 ທ່ານ ແລະ ຮອງຫົວໜ້າພະແນກ ຈຳນວນ 15 ທ່ານ. ໃນໂອກາດດຽວກັນນີ້, ໄດ້ຜ່ານຂໍ້ຕົກລົງ ວ່າດ້ວຍການປະດັບ, ເລື່ອນ ແລະ ທຽບຊັ້ນນັກການທູດ ໃຫ້ພະນັກງານ-ລັດຖະກອນ ຂອງກະຊວງການຕ່າງປະເທດ ຈໍານວນ 193 ທ່ານ.

ໃນໂອກາດດັ່ງກ່າວ, ທ່ານ ໄມທອງ ທຳມະວົງສາ ໄດ້ໂອ້ລົມ ໂດຍໄດ້ຕີລາຄາສູງ ແລະ ສະແດງຄວາມຊົມເຊີຍຕໍ່ ບັນດາສະຫາຍທີ່ໄດ້ຮັບການແຕ່ງຕັ້ງຕໍາແໜ່ງບໍລິຫານ ແລະ ໄດ້ຮັບການປະດັບ, ເລື່ອນ ແລະ ທຽບຊັ້ນນັກການທູດ, ເປັນການມອບໝາຍໜ້າທີ່ການເມືອງ ແລະ ຄວາມຮັບຜິດຊອບ ຊຶ່ງເປັນການເພີ່ມກໍາລັງແຮງໃນການນຳພາ-ຊີ້ນຳວຽກງານໃນຂະແໜງການຕ່າງປະເທດທີ່ພັກ-ລັດມອບໝາຍໃຫ້. ພ້ອມດຽວກັນນັ້ນ,ໄດ້ເນັ້ນໜັກໃຫ້ຜູ້ທີ່ໄດ້ຮັບຕໍາແໜ່ງບໍລິຫານ, ຜູ້ທີ່ໄດ້ຮັບການປະດັບ, ເລື່ອນ ແລະ ທຽບຊັ້ນນັກການທູດ ແລະ ພະນັກງານ-ລັດຖະກອນ ທັງໝົດ ຂອງກະຊວງການຕ່າງປະເທດ ຈົ່ງຍົກສູງດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ຄວາມເສຍສະຫຼະເພື່ອສ່ວນລວມ, ຄວາມສາມັກຄີ ແລະ ເປັນເອກະພາບ, ເດັດດ່ຽວສະກັດກັ້ນ, ຕ້ານປະກົດການຫຍໍ້ທໍ້ຕ່າງໆ ແລະ ເຊີດຊູຄວາມເປັນແບບຢ່າງນຳໜ້າໃນການນຳພາ-ຊີ້ນຳ ໃນການປະຕິບັດໜ້າທີ່ການເມືອງ ແລະ ການຕ່າງປະເທດ ຕາມທິດບຸກທະລຸການທູດປ້ອງກັນເຫດ ເພື່ອປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະໃໝ່, ໄປພ້ອມໆກັບການສືບຕໍ່ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຂອງອົງຄະນະພັກກະຊວງການຕ່າງປະເທດ ຄັ້ງທີ V ພາຍໃຕ້ຄໍາຂວັນ ບຸກທະລຸການທູດເສດຖະກິດ, ຫັນທິດເປັນທັນສະໄໝ, ວ່ອງໄວດ້ານເສນາທິການ ລວມທັງການຈັດຕັ້ງປະຕິບັດບັນດາແຜນງານ, ໂຄງການ ປີ 2026-2030 ແລະ ມະຕິກອງປະຊຸມວຽກງານການຕ່າງປະເທດ ຄັ້ງທີ XIV ໃຫ້ປະກົດຜົນເປັນຈິງ. ໃນພິທີດັ່ງກ່າວ, ຍັງໄດ້ຮັບຟັງການເຊື່ອມຊຶມປາຖະກະຖາວັນປະກາດເອກະລາດ ແລະ ວັນສ້າງຕັ້ງຄະນະຈັດຕັ້ງສູນກາງພັກ ຄົບຮອບ 70 ປີ ຊຶ່ງເປັນວັນທີ່ມີຄວາມໝາຍສຳຄັນທາງປະຫວັດສາດໃນການຕໍ່ສູ້ກູ້ຊາດຕ້ານຈັກກະພັດລ່າເມືອງຂຶ້ນແບບເກົ່າ ແລະ ແບບໃໝ່ ເພື່ອຍາດໄດ້ເອກະລາດ, ອິດສະ ຫຼະພາບ ແລະ ຜືນແຜ່ນດິນອັນຄົບຖ້ວນຈາກກຳມືພວກຈັກກະພັດຜູ້ຮຸກຮານ.

(ຂ່າວ: ກຕທ; ພາບ: ແສງຈັນ)