ປະກາດກົງຈັກການຈັດຕັ້ງພັກ ບັນດາສາຂາທະນາຄານແຂວງເຊກອງ

ພິທີປະກາດກົງຈັກການຈັດຕັ້ງພັກ ແລະ ບຸກຄະລາກອນຄະນະພັກຮາກຖານ ບັນດາສາຂາທະນາຄານແຂວງເຊກອງ ໄດ້ຈັດຂຶ້ນໃນວັນທີ 9 ເມສານີ້ ທີ່ທະນາຄານການຄ້າຕ່າງປະເທດລາວ ມະຫາຊົນສາຂາເຊກອງ ໂດຍການເຂົ້າຮ່ວມຂອງສະຫາຍ ບຸນຫຼາຍ ບຸດທິ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ; ສະຫາຍ ໄຊລືຊາ ຜຸຍຍະວົງ ຮັກສາການເລຂາໜ່ວຍພັກ ຫົວໜ້າທະນາຄານແຫ່ງ ສປປ ລາວ ພາກໃຕ້ ແຂວງຈໍາປາສັກ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີ, ສະຫາຍ ດາຊີ ສຸວັນນະສາຍ ຮອງຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານມະຕິຕົກລົງ ຂອງຄະນະປະຈໍາພັກແຂວງ ວ່າດ້ວຍຍຸບບັນດາໜ່ວຍພັກຮາກຖານສາຂາທະນາຄານຢູ່ແຂວງເຊກອງ ຈໍານວນ 5 ໜ່ວຍພັກຄື: ໜ່ວຍພັກທະນາຄານການຄ້າຕ່າງປະເທດລາວ ມະຫາຊົນ, ໜ່ວຍພັກໜ່ວຍບໍລິການທະນາຄານນະໂຍບາຍ, ໜ່ວຍພັກທະນາຄານພັດທະນາລາວ, ໜ່ວຍພັກທະນາຄານສົ່ງເສີມກະສິກໍາ ແລະ ໜ່ວຍພັກໜ່ວຍບໍລິການທະນາຄານພົງສະຫວັນ. ພ້ອມທັງ ຜ່ານມະຕິຕົກລົງ ວ່າດ້ວຍອະນຸມັດສ້າງຕັ້ງຄະນະພັກຮາກຖານສາຂາທະນາຄານແຂວງເຊກອງ; ມະຕິຕົກລົງ ວ່າດ້ວຍອະນຸມັດສ້າງຕັ້ງໜ່ວຍພັກ ທີ່ຂຶ້ນກັບຄະນະພັກຮາກຖານ ແລະ ມະຕິຕົກລົງ ວ່າດ້ວຍບົ່ງຕົວແຕ່ງຕັ້ງເລຂາ, ຮອງເລຂາ, ປະທານກວດກາ, ຮອງປະທານກວດກາ ແລະ ຄະນະພັກຮາກຖານສາຂາທະນາຄານແຂວງເຊກອງ. ໃນນີ້, ບົ່ງຕົວແຕ່ງຕັ້ງສະຫາຍ ນາງ ຈັນຖະໜອມ ມູນລາດຊະວົງ ເປັນເລຂາຄະນະພັກຮາກຖານ, ສະຫາຍ ທອງພັນ ຄູປາກາ ເປັນຮອງເລຂາຄະນະພັກຮາກຖານ, ສະຫາຍ ພອນປະເສີດ ຈະເລີນພອນ ເປັນປະທານກວດກາ ທັງເປັນຄະນະພັກຮາກຖານ, ສະຫາຍ ຄໍາເຟືອງ ຈັນທະລາ ແລະ ສະຫາຍ ໄຊຍະເດດ ເພັດຈໍາປາ ເປັນຄະນະພັກຮາກຖານ.
ໂອກາດນີ້, ສະຫາຍ ບຸນຫຼາຍ ບຸດທິ ໄດ້ມີຄໍາເຫັນວ່າ: ການປະກາດກົງຈັກການຈັດຕັ້ງພັກ ແລະ ບຸກຄະລາກອນຄະນະພັກຮາກຖານຄັ້ງນີ້ ແມ່ນປະຕິບັດຕາມຄວາມຮຽກຮ້ອງຕ້ອງການຂອງໜ້າທີ່ການເມືອງຂອງພັກ ເພື່ອເປັນການຍົກສູງບົດບາດການນໍາພາ-ຊີ້ນໍາຂອງພັກໃຫ້ເຂັ້ມແຂງ, ສ້າງຄວາມເຊື່ອໝັ້ນ ແລະ ໄວ້ວາງໃຈໃຫ້ມະຫາຊົນຕໍ່ການນໍາພາຂອງພັກ. ສະນັ້ນ, ບັນດາສະຫາຍທີ່ໄດ້ຮັບການແຕ່ງຕັ້ງ ຕ້ອງເພີ່ມທະວີຄວາມຮັບຜິດຊອບໃນການປະຕິບັດໜ້າທີ່ການເມືອງຂອງຕົນ ສ້າງຄວາມເປັນແບບຢ່າງນໍາໜ້າໃຫ້ແກ່ສະມາຊິກພັກ-ພະນັກງານ; ຊຸກຍູ້, ຕິດຕາມ ກວດກາ ແລະ ນໍາພາດໍາເນີນຊີວິດການເມືອງພາຍໃນພັກໃຫ້ເປັນປົກກະຕິ.
(ຂ່າວ-ພາບ: ສັນຍາ)