 |
ທ່ານນາງ ວິໄລ ພິລາວົງ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກໄດ້ຜ່ານມະຕິຕົກລົງຂອງຄະນະເລຂາທິການສູນກາງພັກ ແລະ ດຳລັດນາຍົກລັດຖະມົນຕີ ວ່າດ້ວຍການອະນຸມັດໃຫ້ນາຍຕຳຫຼວດອອກພັກການ-ຮັບອຸດໜູນບຳນານ ມີທ່ານ ພົຕ ສຸວັນນີ ສີສຸພາບມີໄຊ ຫົວໜ້າກົມໃຫຍ່ການເມືອງ, ທ່ານ ພົຕ ຈູມມະນີ ວົງມະນີ ຫົວໜ້າກົມໃຫຍ່ສັນຕິບານ, ທ່ານ ພົຈວ ໜູໃບ ອິນທິສານ ຮອງຫົວໜ້າກົມໃຫຍ່ການເມືອງກະຊວງ ປກສ, ທ່ານ ພັອ ນາງ ວັດສະລີ ສິດທິລືໄຊ ຫົວໜ້າກົມປະກັນສັງຄົມ ກົມໃຫຍ່ການເມືອງກະຊວງ ປກສ ອອກພັກການ-ຮັບອຸດໜູນບໍານານ.
ພ້ອມນີ້, ທ່ານນາງ ວິໄລ ພິລາວົງ ຍັງໄດ້ຜ່ານດໍາລັດນາຍົກລັດຖະມົນຕີ ວ່າດ້ວຍການແຕ່ງຕັ້ງນາຍຕຳຫຼວດຂັ້ນສູງຂອງກະຊວງ ປກສ ໂດຍຕົກລົງແຕ່ງຕັ້ງທ່ານ ພົຈວ ຄອນສະຫວັນ ສົມພາໄຊ ເປັນຫົວໜ້າກົມໃຫຍ່ການເມືອງ ປກສ, ແຕ່ງຕັ້ງທ່ານ ພົຈວ ແອນ ອຸ່ນອານົງນຸດ ເປັນຫົວໜ້າກົມໃຫຍ່ສັນຕິບານ, ແຕ່ງຕັ້ງທ່ານ ພົຈວ ກອງສະຫວັດ ບຸນລ້ຽງ ເປັນຫົວໜ້າກົມໃຫຍ່ຕຳຫຼວດ, ແຕ່ງຕັ້ງທ່ານ ພັອ ເພີນຄໍາ ແສງດາລາ, ທ່ານ ພັອ ວຽງໄຊ ທໍາມະສິດ ເປັນຮອງຫົວໜ້າກົມໃຫຍ່ການເມືອງ ປກສ, ແຕ່ງຕັ້ງທ່ານ ພັອ ຄໍາໄພ ຄໍາພາວົງສ໌, ທ່ານ ພັອ ພັນ ວົງພະໄຕ ເປັນຮອງຫົວໜ້າກົມໃຫຍ່ສັນຕິບານ, ແຕ່ງຕັ້ງທ່ານ ພັອ ບຸນຫຼວງ ວິໄລສຸກ, ທ່ານ ພັອ ສົມເພັດ ເພົ້າວົງດີ ເປັນຮອງຫົວໜ້າກົມໃຫຍ່ຕຳຫຼວດກະຊວງ ປກສ.
 |
ໂອກາດນີ້, ທ່ານ ພົອ ວິໄລ ຫຼ້າຄຳຟອງ ໄດ້ກ່າວຍ້ອງຍໍຊົມເຊີຍຕໍ່ບັນດາສະຫາຍທີ່ອອກພັກການ-ຮັບອຸດໜູນ ບໍານານ ພ້ອມເນັ້ນໜັກໃຫ້ບັນດາສະຫາຍທີ່ໄດ້ຮັບການແຕ່ງຕັ້ງໃນຄັ້ງນີ້ ຈົ່ງພ້ອມກັນສືບຕໍ່ຄົ້ນຄວ້າປະຕິບັດແນວທາງນະໂຍບາຍ, ມະຕິ, ຂໍ້ກຳນົດກົດລະບຽບຂອງພັກ, ກົດໝາຍຂອງລັດ ແລະ ຂອງກະຊວງ ປກສ ວາງອອກ, ເພີ່ມທະວີເຮັດວຽກງານການເມືອງ-ແນວຄິດ ເປັນຄັນທຸງເຕົ້າໂຮມຄວາມສາມັກຄີພາຍໃນໃຫ້ໜັກແໜ້ນ, ເປັນແບບຢ່າງທີ່ດີໃຫ້ ນາຍ ແລະ ພົນຕໍາຫຼວດຢູ່ພາຍໃນກົມກອງ, ສືບຕໍ່ປັບປຸງແບບແຜນວິທີການນໍາພາ, ວິທີການເຮັດວຽກໃຫ້ດີ, ເຮັດວຽກເປັນໝູ່ຄະນະ, ແບ່ງວຽກໃຫ້ບຸກຄົນຮັບຜິດຊອບ, ເປັນເຈົ້າການຄົ້ນຄວ້າວຽກງານ, ວາງແຜນການ ພ້ອມທັງນໍາພາເຮັດຕົວຈິງ, ມີການຕິດຕາມກວດກາຊຸກຍູ້, ຖອດຖອນບົດຮຽນ; ເອົາໃຈໃສ່ເຮັດວຽກງານຄຸ້ມຄອງນາຍ ແລະ ພົນຕໍາຫຼວດຢ່າງແຂງແຮງ.
ຂ່າວ: ສິລິພອນ
ຄໍາເຫັນ