ພິທີດັ່ງກ່າວໄດ້ຈັດຂຶ້ນໃນວັນທີ 2 ມິຖຸນາຜ່ານມາ, ທີ່ ບໍລິສັດປາກຊ່ອງໄຮແລນ ຈຳກັດ ເມືອງປາກຊ່ອງ ແຂວງຈຳປາສັກ ໂດຍມີ ທ່ານ ຄຳຂອດ ໝື່ນຫຼວງ ປະທານຄະນະກຳມະການປົກຄອງເມືອງປາກຊ່ອງ, ມີທ່ານ ນາງ ແສງຈັນ ແຫວນວົງສົດ ຜູ້ອຳນວຍການບໍລິສັດ ປາກຊ່ອງໄຮແລນ ຈຳກັດ, ມີພາກສ່ວນກ່ຽວຂ້ອງເຂົ້າຮ່ວມ.
ໃນພິທີ, ຜູ້ຕາງໜ້າບໍລິສັດ ປາກຊ່ອງໄຮແລນ ຈຳກັດ ໄດ້ລາຍງານຫຍໍ້ກ່ຽວກັບການດຳເນີນໂຄງການ ພັດທະນາການປູກກາເຟ ທີ່ຕິດພັນກັບການປົກປັກຮັກສາສິ່ງແວດລ້ອມແບບຍືນຍົງ ຊຶ່ງບໍລິສັດ ປາກຊ່ອງໄຮແລນ ຈຳກັດ ໄດ້ຮັບອະນຸຍາດສຳປະທານທີ່ດິນຈາກລັດຖະບານໃນເນື້ອທີ່ທັງໝົດ 3,101 ເຮັກຕາ (ເນື້ອທີ່ສາມາດຜະລິດໄດ້ 2,675 ເຮັກຕາ) ກວມເອົາ 6 ຕອນດິນ ຄື: ຕອນດິນກອງຕຸ່ນ, ໜອງຫີນ, ພູເຂົາທອງ, ໂນນກະຖາດ, ໜອງເຂືອງ ແລະ ພູເທວະດາ. ໃນໄລຍະຜ່ານມາ ບໍລິສັດໄດ້ເອົາໃຈໃສ່ປະຕິບັດຕາມກົດໝາຍສິ່ງແວດລ້ອມຢ່າງເຂັ້ມງວດ ເປັນຕົ້ນແມ່ນການຮັກສາໄລຍະຫ່າງຈາກແຫຼ່ງນໍ້າ 50 - 100 ແມັດ, ປູກພືດຕະກູນຖົ່ວເພື່ອຄຸມດິນ ແລະ ປູກຕົ້ນໄມ້ບັງຮົ່ມສັບກັບຕົ້ນກາເຟ. ນອກຈາກນີ້, ວຽກງານຟື້ນຟູປ່າໄມ້ກໍແມ່ນໜຶ່ງໃນວຽກງານບູລິມະສິດ ທີ່ບໍລິສັດໄດ້ຮ່ວມມືກັບພາກລັດຈັດຕັ້ງປະຕິບັດມາຢ່າງຕໍ່ເນື່ອງນັບຕັ້ງແຕ່ປີ 2016 ເປັນຕົ້ນມາ.
ສຳລັບປີ 2026 ນີ້, ບໍລິສັດມີແຜນການປູກຕົ້ນພະຍາເສືອໂຄ່ງ ເພີ່ມເຕີມຈຳນວນ 1,600 ເບ້ຍ ໂດຍມີງົບປະມານການໃຊ້ຈ່າຍທັງໝົດ 50,000 ບາດ (ສະກຸນເງິນໄທ) ແລະ ງົບບົວລະບັດຮັກສາ 30,000 ບາດ/ປີ ທັງນີ້ກໍເພື່ອສູ້ຊົນໃຫ້ບັນລຸເປົ້າໝາຍຍົກລະດັບເນື້ອທີ່ປ່າປົກຄຸມໃຫ້ໄດ້ 70% ຮອດປີ 2030 ແລະ ສອດຄ່ອງກັບເປົ້າໝາຍການພັດທະນາແບບຍືນຍົງ ຕາມທິດສີຂຽວ.
ທ່ານ ຄຳຂອດ ໝື່ນຫຼວງ ໄດ້ເນັ້ນໜັກເຖິງຄວາມສຳຄັນໃນການຈັດຕັ້ງປະຕິບັດກົດໝາຍວ່າດ້ວຍປ່າໄມ້ ຢ່າງເຂັ້ມງວດ. ພ້ອມທັງຮຽກຮ້ອງໃຫ້ທຸກພາກສ່ວນ ທັງພາກລັດ, ເອກະຊົນ ແລະ ປະຊາຊົນບັນດາເຜົ່າ ພາຍໃນເມືອງປາກຊ່ອງ ຈົ່ງຍົກສູງສະຕິຄວາມຮັບຜິດຊອບ ເອົາໃຈໃສ່ປົກປັກຮັກສາ, ຟື້ນຟູ ແລະ ພັດທະນາຊັບພະຍາກອນປ່າໄມ້ ໃຫ້ມີຄວາມອຸດົມສົມບູນ ໄປຄຽງຄູ່ກັບການຮັກສາສິ່ງແວດລ້ອມໃຫ້ມີຄວາມຍືນຍົງ, ທັງນີ້ກໍເພື່ອເຮັດໃຫ້ເມືອງປາກຊ່ອງ ກາຍເປັນເມືອງທ່ອງທ່ຽວສີຂຽວ ແລະ ເປັນແຫຼ່ງຜະລິດກະສິກຳ (ໂດຍສະເພາະແມ່ນກາເຟ) ທີ່ໄດ້ມາດຕະຖານ ແລະ ເປັນມິດຕໍ່ສິ່ງແວດລ້ອມຢ່າງແທ້ຈິງ.
ພິທີປູກຕົ້ນໄມ້ໃນຄັ້ງນີ້ ນອກຈາກຈະເປັນການສ້າງຂະບວນການເພື່ອສະເຫຼີມສະຫຼອງວັນສຳຄັນຕ່າງໆ ໃຫ້ມີບັນຍາກາດຟົດຟື້ນແລ້ວ, ຍັງເປັນການປູກຈິດສຳນຶກໃນການຮັກສາທຳມະຊາດ, ເພີ່ມເນື້ອທີ່ສີຂຽວ ແລະ ຮັກສາສິ່ງແວດລ້ອມໃຫ້ມີຄວາມຍືນຍົງ ໄປຄຽງຄູ່ກັບການພັດທະນາເສດຖະກິດ-ສັງຄົມ ພາຍໃນທ້ອງຖິ່ນຕື່ມອີກ.
ຂ່າວ: ສອນໄຊ ຈັນທະວີ
ຄໍາເຫັນ