ປະເມີນຄືນການຊົດເຊີຍ ພາຍຫຼັງຈັດຕັ້ງປະຕິບັດໂຄງການຂອງ ບໍລິສັດ ຊີໂນ-ອາກຣີ ໂປຕາສ ຈຳກັດ

ວັນທີ 15 ທັນວານີ້ ທີ່ຫ້ອງວ່າການແຂວງຄໍາມ່ວນ ໄດ້ຈັດກອງປະຊຸມຄົ້ນຄວ້າປຶກສາຫາລື ປະເມີນຄືນຊີວິດການເປັນຢູ່ຂອງປະຊາຊົນທີ່ໄດ້ຮັບການຊົດເຊີຍເວນຄືນພາຍຫຼັງການຈັດຕັ້ງປະຕິບັດໂຄງການຂອງ ບໍລິສັດ ຊີໂນ-ອາກຣີ ໂປຕາສ ຈໍາກັດ ໂດຍການເປັນປະທານຂອງ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ມີ ທ່ານ ຄໍໝັ້ນ ສໍປະເສີດ ຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ (ຊສ)ແຂວງ, ມີທ່ານເຈົ້າເມືອງໜອງບົກ, ບັນດາພະແນກ ແລະ ການຈັດຕັ້ງບ້ານທີ່ກ່ຽວຂ້ອງເຂົ້າຮ່ວມ.
ທ່ານ ແກ້ວບຸນຂວັນ ໄຊຍະວົງສາ ຮອງຫົວໜ້າພະແນກ ຊສ ແຂວງ ໄດ້ລາຍງານຜົນສໍາເລັດ ແລະ ຂໍ້ຄົງຄ້າງກ່ຽວກັບ ການຈັດຕັ້ງປະຕິບັດ ວຽກງານການສໍາຫຼວດ ແລະ ຈັດສັນຊົດເຊີຍເວນຄືນເນື້ອທີ່ດິນໃນໄລຍະຜ່ານມາ ຂອງ ບໍລິສັດຊີໂນ-ອາກຣີໂປຕາສ ຈຳກັດ ຢູ່ ເມືອງທ່າແຂກ ແລະ ເມືອງໜອງບົກ ຊຶ່ງມີ 3 ໄລຍະ ຄື: ໄລຍະທີ 1 ແຕ່ປີ 2021-2022, ໄລຍະທີ 2 ແຕ່ເດືອນມັງກອນ ຫາ ເດືອນມີນາ 2023 ແລະ ໄລຍະທີ 3 ແຕ່ວັນທີ 23 ພຶດສະພາຮອດປັດຈຸບັນ ຊຶ່ງທັງສອງເມືອງ ມີ 59 ກິດຈະກໍາ, ມີຜູ້ທີ່ຖືກຜົນກະທົບທັງໝົດ 18 ບ້ານ, 2.352 ຄອບຄົວ, ມີເນື້ອທີ່ເວນຄືນທັງໝົດ 1.973,98 ເຮັກຕາ, ທໍາການຊົດເຊີຍແລ້ວເປັນເງິນທັງໝົດ 646 ຕື້ກວ່າກີບ, ປັດຈຸບັນກໍາລັງສືບຕໍ່ໃນການຊົດເຊີຍ, ນອກນີ້ຍັງໄດ້ຍົກໃຫ້ເຫັນເຖິງການຈັດຕັ້ງປະຕິບັດນະໂຍບາຍຂອງ ບໍລິສັດ ແລະ ບັນຫາອື່ນໆ ທີ່ພົວພັນກັບການພັດທະນາໂຄງການຂອງບໍລິສັດດັ່ງກ່າວ, ຈາກນັ້ນ ກອງປະຊຸມບັນດາຜູ້ເຂົ້າຮ່ວມໄດ້ພ້ອມກັນປະກອບຄໍາຄິດເຫັນ ປຶກສາຫາລືແລກປ່ຽນຮ່ວມກັນ ໂດຍສະເພາະບັນຫາຄົງຄ້າງໃນຜ່ານມາເປັນຕົ້ນບັນຫາຄອບຄົວທີ່ຍັງບໍ່ໃຫ້ຄວາມຮ່ວມມື, ຄອບຄົວທີ່ຍັງບໍ່ທັນໄດ້ຮັບຄ່າຊົດເຊີຍຕ່າງໆ ລວມເຖິງຂໍ້ສະເໜີຂອງປະຊາຊົນ ເພື່ອຊອກຫາວິທີແກ້ໄຂ ແລະ ເປັນທິດໃນການຈັດຕັ້ງປະຕິບັດວຽກງານດັ່ງກ່າວໃຫ້ສໍາເລັດລຸລ່ວງດ້ວຍດີ.
ໂອກາດນີ້, ຍັງໄດ້ຮັບຟັງການຜ່ານຂໍ້ຕົກລົງຂອງທ່ານເຈົ້າແຂວງຄໍາມ່ວນ ສະບັບເລກທີ 246/ຈຂ, ລົງວັນທີ 30 ພະຈິກ 2023 ວ່າດ້ວຍການແຕ່ງຕັ້ງຄະນະຊີ້ນໍາ ແລະ ກອງເລຂາຊ່ວຍວຽກ ປະເມີນຄືນສິດການເປັນຢູ່ຂອງປະຊາຊົນທີ່ໄດ້ຮັບການຊົດເຊີຍເວນຄືນ ພາຍຫຼັງການຈັດຕັ້ງປະຕິບັດໂຄງການຂອງ ບໍລິສັດ ຊີໂນ-ອາກຣີ ໂປຕາສ ຈຳກັດ.
(ຂ່າວ-ພາບ: ມະນີວັນ)