 |
ຄວາມໄວ້ເນື້ອເຊື່ອໃຈທາງການເມືອງແມ່ນລັກສະນະພິເສດທີ່ຈະແຈ້ງທີ່ສຸດໃນການພົວພັນລະຫວ່າງຈີນ-ຣັດເຊຍ ແລະ ກໍແມ່ນຈຸດປະສົງ ແລະ ຫຼັກການພື້ນຖານຂອງ “ສົນທິສັນຍາວ່າດ້ວຍການເປັນບ້ານໃກ້ເຮືອນຄຽງທີ່ດີ ແລະ ຮ່ວມມືມິດຕະພາບລະຫວ່າງຈີນ-ຣັດເຊຍ”. ເທື່ອນີ້, ປະມຸກລັດສອງປະເທດໄດ້ຮ່ວມກັນຕົກລົງແກ່ຍາວເວລາຂອງສົນທິສັນຍາສະບັບນີ້ ຊຶ່ງຈະຊຸກຍູ້ການພົວພັນລະຫວ່າງສອງປະເທດນັບມື້ກ້າວສູ່ລວງເລິກ ແລະ ສ້າງພື້ນຖານທີ່ໝັ້ນແກ່ນໃຫ້ແກ່ຄວາມໄວ້ເນື້ອເຊື່ອໃຈກັນທາງການເມືອງ.
ການຮ່ວມມືຕົວຈິງແມ່ນພະລັງຂັບເຄື່ອນສຳຄັນໃຫ້ແກ່ການພົວພັນລະຫວ່າງຈີນ-ຣັດເຊຍ. ລະຫວ່າການເດີນທາງມາຢ້ຽມຢາມຈີນຂອງທ່ານ ວະລາດີເມຍ ປູຕິນ, ສອງຝ່າຍໄດ້ລົງນາມໃນເອກະສານຮ່ວມມື 20 ສະບັບໃນຂົງເຂດເສດຖະກິດການຄ້າ, ວິທະຍາສາດເຕັກໂນໂລຊີ ແລະ ອື່ນໆ ຊຶ່ງຈະຊຸກຍູ້ການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດໃນຂົງເຂດຕ່າງໆມີຄຸນນະພາບກວ່າເກົ່າ ແລະ ມີລະດັບສູງກວ່າເກົ່າ ເພື່ອຈະປະກອບສ່ວນເຂົ້າໃນການພັດທະນາຂອງສອງປະເທດໃຫ້ນັບມື້ກ້າວສູ່ຄວາມຈະເລີນຮຸ່ງເຮືອງຮ່ວມກັນ.
ວັນທີ 20 ພຶດສະພາ ຜ່ານມາ, ປະມຸກລັດສອງປະເທດໄດ້ຮ່ວມກັນເປີດກາໝາຍ “ປີແຫ່ງການສຶກສາຈີນ-ຣັດເຊຍ”. ນັກວິເຄາະເຫັນວ່າ: ໂດຍຖືເອົາ “ປີແຫ່ງການສຶກສາຈີນ-ຣັດເຊຍ” ເປັນຈຸດເລີ່ມຕົ້ນໃໝ່, ສອງປະເທດຈະສືບຕໍ່ລົງເລິກການຮ່ວມມືໃນຂົງເຂດການສຶກສາຕື່ມອີກ ເພື່ອຊ່ວຍຊຸກຍູ້ມິດຕະພາບຖານບ້ານໃກ້ເຮືອນຄຽງທີ່ດີລະຫວ່າງຈີນ-ຣັດເຊຍໃຫ້ນັບມື້ໝັ້ນຄົງຂະໜົງແກ່ນ.
ໂລກປັດຈຸບັນທີ່ຍັງບໍ່ມີສັນຕິພາບເທົ່າທີ່ຄວນ, ລັດທິຝ່າຍດຽວ ແລະ ລັດທິເຈົ້າອຳນາດເປັນໄພຂົ່ມຂູ່ໜັກໜ່ວງຕໍ່ໂລກ, ໂລກຜະເຊີນກັບຄວາມສ່ຽງທີ່ຈະກັບຄືນສູ່ກົດແຫ່ງປ່າ. ຈີນ ແລະ ຣັດເຊຍໄດ້ອອກຖະແຫຼງການຮ່ວມກ່ຽວກັບການສົ່ງເສີມການສ້າງໂລກທີ່ມີຫຼາຍຂົ້ວ ແລະ ການພົວພັນສາກົນແບບໃໝ່ ໄດ້ສະແດງໃຫ້ເຫັນເຖິງການຮັບພາລະໜ້າທີ່ຂອງປະເທດໃຫຍ່ທີ່ມີຄວາມຮັບຜິດຊອບ.
ເມື່ອຢືນຢູ່ຈຸດເລີ່ມຕົ້ນໃໝ່, ສອງຝ່າຍໄດ້ຖືເອົາຄວາມຮັບຮູ້ທີ່ເປັນເອກະພາບກັນອັນສຳຄັນລະຫວ່າງປະມຸກລັດສອງປະເທດເປັນທິດນຳພາ, ຊຸກຍູ້ໃຫ້ການປະສານງານຍຸດທະສາດຮອບດ້ານກ້າວຂຶ້ນສູ່ລະດັບສູງກວ່າເກົ່າ, ຍ່ອມຈະກາຍເປັນ “ປັດໄຈສຳຄັນທີ່ແນ່ນອນໃນການປ່ຽນແປງໃຫຍ່ຂອງໂລກໃນຮອບຮ້ອຍປີ” ທີ່ດີກວ່າເກົ່າ.
ຄໍາເຫັນ