 |
ການຈັດປາຖະກະຖາໃນຄັ້ງນີ້ແມ່ນເປັນໜຶ່ງໃນກິດຈະກໍາເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດລະຫວ່າງ ສປປ ລາວ ແລະ ອິນເດຍ ຄົບຮອບ 70 ປີ (2/2/1956-2/2/2026) ແລະ ເນື່ອງໃນໂອກາດທີ່ ທ່ານ Shri Pabitra Margherita ຮອງລັດຖະມົນຕີກະຊວງຕ່າງປະເທດ ອິນເດຍ ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ, ໂດຍມີບັນດາຜູ້ເຂົ້າຮ່ວມຈາກກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ ແລະ ບັນດາກະຊວງເຂົ້າຮ່ວມ.
ໂອກາດດັ່ງກ່າວ, ທ່ານ ໄມທອງ ທຳມະວົງສາ ຮອງລັດຖະມົນຕີກະຊວງການຕ່າງປະເທດ ໄດ້ກ່າວສະເເດງຄວາມຊົມເຊີຍ ແລະ ຕີລາຄາສູງຕໍ່ສາຍພົວພັນສອງປະເທດທີ່ມີມູນເຊື້ອອັນຍາວນານ ບົນພື້ນຖານການຮ່ວມມື ແລະ ມິດຕະພາບອັນດີງາມ. ຫຼັງຈາກນັ້ນ, ຜູ້ເຂົ້າຮ່ວມໄດ້ຮັບຟັງການບັນຍາຍຈາກທ່ານ Shri Pabitra Margherita ຮອງລັດຖະມົນຕີຕ່າງປະເທດອິນເດຍ, ໂດຍທ່ານໄດ້ທົບທວນຄືນ ແລະ ຕີລາຄາສູງຕໍ່ຜົນສໍາເລັດຂອງການພົວພັນຮ່ວມມືຂອງສອງຝ່າຍຕະຫຼອດໄລຍະ 70 ປີຜ່ານມາ, ໂດຍເປັນການພົວພັນແບບມິດຕະພາບ ແລະ ການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດ ຊຶ່ງມັນໄດ້ສະແດງອອກໃນບັນດາຜົນສໍາເລັດ ແລະ ໝາກຜົນຈາກການຮ່ວມມືລະຫວ່າງສອງຝ່າຍໃນດ້ານຕ່າງໆ ເປັນຕົ້ນແມ່ນການພັດທະນາຂີດຄວາມສາມາດຂອງບຸກຄະລາກອນ, ການປົກປັກຮັກສາ ແລະ ສືບຕໍ່ມູນເຊື້ອອັນດີງາມດ້ານວັດທະນະທຳ ແລະ ສາດສະໜາ, ການມີສ່ວນຮ່ວມໃນຂອບການຮ່ວມມືແບບຫຼາຍຝ່າຍໃນພາກພື້ນ ແລະ ສາກົນ ລວມທັງຂອບອາຊຽນ ແລະ ສະຫະປະຊາຊາດ,ໂດຍສະເພາະໃນທ່າມກາງສະພາບການພາກພື້ນ ແລະ ສາກົນທີ່ມີການຜັນແປໄປຢ່າງໄວວາ, ສັບສົນ ແລະ ຄາດຄະເນໄດ້ຍາກ.
ຕະຫຼອດໄລຍະເວລາ 70 ປີຜ່ານມາ, ລາວ ແລະ ອິນເດຍ ໄດ້ສ້າງຕັ້ງ ແລະ ຮັກສາການພົວພັນທາງການທູດ ທີ່ເປັນມູນເຊື້ອຈົນເຖິງປັດຈຸບັນ, ການພົວພັນລະຫວ່າງສອງປະເທດໄດ້ຮັບການເສີມຂະຫຍາຍ, ພັດທະນາຢ່າງຕໍ່ເນື່ອງ ແລະ ເປັນຮູບປະທໍາ. ໃນຕໍ່ໜ້າ, ສອງຝ່າຍໄດ້ສະເເດງຄວາມໝາຍໝັ້ນຮ່ວມກັນໃນການເສີມຂະຫຍາຍການຮ່ວມມືຈາກການເປັນຄູ່ຮ່ວມມືເພື່ອການພັດທະນາສູ່ການເປັນຄູ່ຮ່ວມມືແບບຮອບດ້ານ.
ການປາຖະກະຖາຄັ້ງນີ້ແມ່ນເປັນຂີດໝາຍສໍາຄັນໃນການຕີລາຄາການພົວພັນສອງຝ່າຍໃນໄລະຜ່ານມາກໍຄືທິດທາງການຮ່ວມມືກັນໃນຕໍ່ໜ້າ ຊຶ່ງເປັນການປະກອບສ່ວນໃຫ້ແກ່ການສະເຫຼີມສະຫຼອງວັນສ້າງຕັ້ງສາຍພົວພັນການທູດ ສປປ ລາວ- ອິນເດຍ ຄົບຮອບ 70 ປີ ແລະ ເປັນຂໍ້ມູນຂ່າວສານທີ່ເປັນປະໂຫຍດໃຫ້ແກ່ຜູ້ເຂົ້າຮ່ວມຮັບຟັງໄດ້ເປັນຢ່າງດີ.
(ຂ່າວ: ສະຖາບັນການຕ່າງປະເທດ)
ຄໍາເຫັນ