ປາຖະກະຖາ ຫວນຄືນມູນເຊື້ອ 2 ວັນປະຫວັດສາດ

ຫ້ອງການແນວລາວສ້າງຊາດ ແລະ ຫ້ອງການສະຫະພັນນັກຮົບເກົ່າ ເມືອງເລົ່າງາມ ແຂວງສາລະວັນ ໄດ້ຈັດປາຖະກະຖາຫວນຄືນມູນເຊື້ອ 2 ວັນປະຫວັດສາດ ຂອງຊາດຄື: ວັນສ້າງຕັ້ງແນວລາວສ້າງຊາດ ຄົບຮອບ 73 ປີ (13 ສິງຫາ 1950–13 ສິງຫາ 2023 ) ວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 21 ປີ (9 ກັນຍາ 2002–9 ກັນຍາ 2023) ຂຶ້ນເມື່ອດົນມານີ້ ທີ່ສະໂມສອນຂອງເມືອງເລົ່າງາມ ໂດຍການເຂົ້າຮ່ວມຂອງ ທ່ານ ພິດສະໄໝ ແກ້ວວົງສັກ ຮອງເລຂາພັກເມືອງ ຜູ້ຊີ້ນໍາວຽກງານການເມືອງ - ແນວຄິດ, ທ່ານ ຄໍາພຽນ ຟອງມະລີ ຄະນະປະຈໍາພັກເມືອງ ປະທານແນວລາວສ້າງຊາດເມືອງເລົ່າງາມ, ທ່ານ ພັທ. ຄໍາພອງ ຄໍາພູມີ ປະທານສະຫະພັນນັກຮົບເກົ່າເມືອງ. ມີພະນັກງານອາວຸໂສບໍານານ, ພະນັກງານ - ລັດຖະກອນ, ທະຫານ - ຕໍາຫຼວດ, ອໍານາດການປົກຄອງບ້ານ 8 ບ້ານ ເຂົ້າຮ່ວມ.
    ໃນໂອກາດນີ້, ທ່ານ ຄໍາພຽນ ຟອງມະລີ ຂຶ້ນຜ່ານປະຫວັດຄວາມເປັນມາຂອງວັນສ້າງຕັ້ງແນວລາວສ້າງຊາດ ຊຶ່ງໄດ້ຍົກໃຫ້ເຫັນເຖິງການກໍາເນີດ, ການເຕີບໃຫຍ່ຂະຫຍາຍ ຕົວຂອງອົງການແນວລາວສ້າງຊາດມາແຕ່ລະໄລຍະ ຊຶ່ງມີຫຼາຍຊົນເຜົ່າຢູ່ຮວມກັນ, ມີມູນເຊື້ອສາມັກຄີຮັກແພງກັນ, ຮັກຊາດແພງເຊື້ອ ແລະ ຮັກບ້ານເກີດເມືອງນອນ ມີວັດທະນະທໍາທີ່ເປັນເອກະລັກຂອງຊາດ, ຂອງເຜົ່າ, ມີມູນເຊື້ອຕໍ່ສູ້ບໍ່ຍອມຈໍານົນທີ່ອົງອາດກ້າຫານ, ບໍ່ຍອມເປັນຂ້ອຍຂ້າໃຫ້ພວກຈັກກະພັດລ່າເມືອງຂຶ້ນ. ພາຍຫຼັງພັກກອມມູນິດອິນດູຈີນໄດ້ຮັບການສ້າງຕັ້ງຂຶ້ນໃນປີ 1930 ພັກໄດ້ເຫັນແຈ້ງເຖິງບົດບາດຂອງອົງການແນວລາວສ້າງຊາດ ເພື່ອນໍາພາມະຫາຊົນດໍາເນີນການປະຕິວັດຊາດ ປະຊາທິປະໄຕ ພາຍໃຕ້ການຊີ້ນໍາ-ນໍາພາຂອງຄະນະແຄ້ວນລາວ ໄດ້ປຸກລະດົມປະຊາຊົນບັນດາເຜົ່າ ລຸກຂຶ້ນຕໍ່ສູ້ ແລະ ຢຶດອໍານາດໃນວັນທີ 23 ສິງຫາ ປີ 1945 ແລະ ປະກາດເອກະລາດ ໃນວັນ 12 ຕຸລາ 1945 ໂດຍປະຕິບັດນະໂຍບາຍ 3 ບາດຄ້ອນຍຸດທະສາດ ໃນການລຸກຮືຂຶ້ນຢຶດອໍານາດການປົກຄອງໃນທົ່ວປະເທດແບບ  ບົວບໍ່ໃຫ້ຊໍ້ານໍ້າບໍ່ໃຫ້ຂຸ່ນ ແຕ່ຈັບປາໄດ້ທຸກໂຕ  ແລະ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975.
    ທ່ານ ພັທ ຄໍາພອງ ຄໍາພູມີ ໄດ້ຍົກໃຫ້ເຫັນ ເຖິງມູນເຊື້ອການຕໍ່ສູ້ກູ້ຊາດ ທີ່ອົງອາດກ້າຫານບໍ່ຍອມຈໍານົນຂອງວິລະບູລຸດຂອງຊາດລາວ ທີ່ໄດ້ເສຍສະຫຼະເລືອດເນື້ອ ແລະ ຊີວິດ ໃນການຕໍ່ສູ້ຕ້ານພວກຈັກກະພັດຜູ້ຮຸກຮານ ທີ່ເຮັດໃຫ້ປະຊາຊົນລາວຕົກທຸກໄດ້ຍາກ ປະເທດຊາດສູນເສຍຄວາມເປັນເອກລາດ ແລະ ຜືນແຜ່ນດິນທີ່ອຸດົມຮັ່ງມີ ຕົກເປັນຫົວເມືອງຂຶ້ນຂອງຊາດອື່ນ ພວກເຂົາໄດ້ກົດຂີ່ຂູດຮີດປະຊາຊົນລາວຢ່າງໜັກໜ່ວງ. ພາຍຫຼັງພັກປະຊາຊົນ ປະຕິວັດລາວ ໄດ້ຮັບການສ້າງຕັ້ງຂຶ້ນ ໃນວັນທີ 22 ມີນາ 1955 ຕາມການຕົກລົງ ຂອງພັກກອມມູນິດອິນດູຈີນ ພັກໄດ້ວາງແນວທາງ, ນະໂຍບາຍອັນຖືກຕ້ອງຊີ້ນໍາ-ນໍາພາ ປະຊາຊົນລາວທັງຊາດ ເຮັດການປະຕິວັດເພື່ອປົດປ່ອຍເອົາປະເທດຊາດຄືນມາໃຫ້ໄດ້ຢ່າງສົມບູນ.
    ການປາຖະກະຖາຫວນຄືນມູນເຊື້ອ 2 ວັນປະຫວັດສາດ ໃນຄັ້ງນີ້ເພື່ອເຊີືອມຊຶມໃຫ້ ພະນັກງານການນໍາຫຼັກແຫຼງຂອງເມືອງ, ພະນັກງານ-ລັດຖະກອນ, ທະຫານ-ຕໍາຫຼວດ ໄດ້ຮັບຮູ້ ເຂົ້າໃຈ ເຖິງມູນເຊື້ອສາມັກຄີຕໍ່ສູ້ ທີ່ອົງອາດກ້າຫານ ຂອງນັກຮົບປະຕິວັດ ວິລະບູລຸດຂອງຊາດລາວ ແລະ ເພື່ອຈາລຶກເຖິງບຸນຄຸນ, ຄຸນງາມຄວາມດີ ຂອງນັກຮົບວິລະຊົນ ທີ່ໄດ້ເສຍສະຫຼະຊີວິດ ເລືອດເນື້ອ ເພື່ອປະເທດຊາດ ແລະ ສືບຕໍ່ເສີ່ມຂະຫຍາຍຮັກສາມູນເຊື້ອອັນດີງາມ ໄວ້ໃຫ້ໝັ້ນຄົງຕະຫຼອດໄປ. 
ຂ່າວ - ພາບ, ພອນໄຊ ແກ້ວມະນີ