ກະຊວງປ້ອງກັນປະເທດ (ປກຊ) ໄດ້ຈັດພິທີປາຖະກະຖາວັນໄຊຊະນະບັ້ນຮົບປົດປ່ອຍດຽນບຽນຝູ້ ຄົບຮອບ 70 ປີ (7/5/1954-7/5/2024) ຂຶ້ນໃນວັນທີ 9 ພຶດສະພານີ້ ທີ່ກະຊວງດັ່ງກ່າວ ເປັນກຽດເຂົ້າຮ່ວມຂອງສະຫາຍ ພົນໂທ ທອງລອຍ ສີລິວົງ ກຳມະການສູນກາງພັກ ຮອງລັດຖະມົນກະຊວງ ປກຊ ຫົວໜ້າກົມໃຫຍ່ການເມືອງກອງທັບ, ມີຄະນະນໍາກະຊວງ ປກຊ, ຄະນະນໍາບັນດາກົມໃຫຍ່, ມີຕາງໜ້າບັນດາກົມກອງ ພ້ອມດ້ວຍພະນັກງານຫຼັກແຫຼ່ງອ້ອມຂ້າງກະຊວງເຂົ້າຮ່ວມ.
ສະຫາຍ ຫງວຽນບາຮຸ່ງ ເອກອັກຄະລັດຖະທູດຜູ້ມີອຳນາດເຕັມແຫ່ງ ສສ ຫວຽດນາມປະຈຳ ສປປ ລາວ ໄດ້ໃຫ້ກຽດປາຖະກະຖາວັນດັ່ງກ່າວ ໂດຍຍົກໃຫ້ເຫັນຄວາມໝາຍ-ຄວາມສຳຄັນຂອງໄຊຊະນະດຽນບຽນຝູ້, ຄວາມໝາຍ-ຄວາມສຳຄັນ ແລະ ຜົນກະທົບຂອງໄຊຊະນະດຽນບຽນຝູ້ຕໍ່ສາຍພົວພັນລາວ-ຫວຽດນາມ; ບາງການເຄື່ອນໄຫວ, ບາງບັ້ນຕີທີ່ພົ້ນເດັ່ນຂອງສອງປະເທດລາວ-ຫວຽດນາມ ສຳພັນສູ້ຮົບພິເສດໃນຂອບເຂດບັ້ນຮົບໜຶ່ງທີ່ມີຂະໜາດໃຫຍ່ຢູ່ທັງລະດັບຍຸດໂທບາຍ ແລະ ຍຸດທະສາດ. ໄຊຊະນະດຽນບຽນຝູ້ ແມ່ນໄຊຊະນະທີ່ສະຫວ່າງສະໄຫວທີ່ສຸດໃນປະຫວັດສາດການຕໍ່ສູ້ຕ້ານການຮຸກຮານຈາກຈັກກະພັດພາຍນອກຂອງປະຊາຊົນຫວຽດນາມທີ່ມີກຽດສະຫງ່າ, ໄດ້ຖືກບັນທຶກເຂົ້າໃນປະຫວັດສາດຂອງຊາດ ແລະ ຂອງໂລກຢູ່ໃນສະຕະວັດທີ XX. ໄຊຊະນະດຽນບຽນຝູ້ ບໍ່ພຽງແຕ່ແມ່ນໄຊຊະນະຂອງປະຊາຊົນຫວຽດນາມ ແຕ່ຍັງແມ່ນໄຊຊະນະຂອງປະຊາຊົນລາວ ແລະ ປະຊາຊົນກຳປູເຈຍທີ່ໄດ້ຮ່ວມສໍາພັນສູ້ຮົບ, ຮ່ວມຂຸມຄອງຕ້ານຈັກກະພັດໂຕດຽວກັນ ເພື່ອປົດປ່ອຍຕົນເອງ ໄຊຊະນະດັ່ງກ່າວໄດ້ດັບມອດເຈດຈຳນົງ ແລະ ການຮຸກຮານຂອງລັດທິລ່າເມືອງຂຶ້ນແບບເກົ່າ, ບັງຄັບໃຫ້ລັດຖະບານຝຣັ່ງຈໍາຕ້ອງຍອມເຊັນສັນຍາເຊີແນວກ່ຽວກັບອິນດູຈີນ, ຮັບຮູ້ຄວາມເປັນເອກະລາດແຫ່ງຊາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຫວຽດນາມ, ລາວ ແລະ ກຳປູເຈຍ. ພາກເໜືອຫວຽດນາມໄດ້ຮັບການປົດປ່ອຍຢ່າງສົມບູນ ແລະ ກາຍເປັນຖານທີ່ໝັ້ນຂອງການປະຕິວັດທີ່ເຂັ້ມແຂງ ທັງເປັນແນວຫຼັງທີ່ແໜ້ນແກ່ນໃນການດໍາເນີນການຕໍ່ສູ້ຕ້ານຈັກກະພັດອາເມຣິກາຢູ່ພາກໃຕ້ຫວຽດນາມ. ພ້ອມນັ້ນ, ໄຊຊະນະດຽນບຽນຝູ້ເປັນຄວາມເອກອ້າງທະນົງໃຈຂອງປະຊາຊົນຫວຽດນາມ ໃນພາລະກິດສ້າງສາພັດທະນາປະເທດຊາດຊົ່ວກາລະນານ, ມານະຈິດຂອງດຽນບຽນຝູ້ຍັງໃສແຈ້ງ ຍັງເປັນກຳລັງແຮງປຸກລະດົມອັນຍິ່ງໃຫຍ່ຂອງປະຊາຊົນຫວຽດນາມໃນພາລະກິດປ່ຽນແປງໃໝ່ ແນໃສ່ປະຕິບັດຈຸດໝາຍປະຊາຊົນຮັ່ງມີ, ປະເທດຊາດ ເຂັ້ມແຂງ, ສັງຄົມມີຄວາມສະເໝີພາບ, ປະຊາທິປະໄຕ, ສີວິໄລ. ສໍາລັບປະເທດລາວ ໄຊຊະນະດຽນບຽນຝູ້ໄດ້ມີຄວາມສໍາຄັນໃນການສ້າງຄວາມສາມັກຄີພິເສດ, ຮ່ວມສໍາພັນສູ້ຮົບລະຫວ່າງລາວ-ຫວຽດນາມ, ເປັນໄຊຊະນະຕ້ານສັດຕູຕົວດຽວກັນປະສານສົມທົບ ແລະ ສະໜັບສະໜູນຊຶ່ງກັນ ແລະ ກັນ ເພາະວ່າດຽນບຽນຝູ້ຢູ່ໃກ້ກັບແຂວງຜົ້ງສາລີ ແລະ ຫົວພັນ. ສະນັ້ນ, ການຕີຊະນະຝຣັ່ງຢູ່ດຽນບຽນຝູ້ຈຶ່ງທັບມ້າງແຫຼ່ງທີ່ໝັ້ນສໍາຄັນຂອງສັດຕູ.
( ຂ່າວ-ພາບ: ວັນເພັງ )
ຄໍາເຫັນ