ໄດ້ປະຈັກກັບຄວາມໂຫດຮ້າຍຂອງການກົດຂີ່ ແລະ ການທໍລະມານຂອງຈັກກະພັດຝຣັ່ງ ຕໍ່ປະຊາຊົນ, ໄດ້ເຫັນເຖິງການເສຍສະຫຼະເລືອດເນື້ອຂອງພໍ່ແມ່ປະຊາຊົນ. ດ້ວຍເຫດນິ້, ຫງວຽນ ເຕິດ ແທັງ – ຫງວຽນ ອາຍ ກວັກ (ປະທານ ໂຮ່ຈິມິນ) ຈຶ່ງໄດ້ຫຼໍ່ຫຼອມເຈດຕະນາລົມ ທີ່ຈະອອກໄປຕ່າງປະເທດເພື່ອຕາມຫາເສັ້ນທາງກູ້ຊາດ. ວັນທີ 5 ມິຖຸນາ 1911, ທ່ານ ໄດ້ສະໝັກເປັນຜູ້ຊ່ວຍພໍ່ຄົວເທິງເຮືອ Amiral Latouche Tréville ທີ່ອອກຈາກທ່າເຮືອໄຊງ່ອນ ໄປຍັງເມືອງ Marseille, ເລີ່ມຕົ້ນການເດີນທາງຊອກຫາເສັ້ນທາງປົດປ່ອຍຊາດ.
ຕະຫຼອດໄລຍະເວລາກວ່າ 30 ປີ ທີ່ອາໄສ ແລະ ເຮັດວຽກຢູ່ຕ່າງປະເທດ, ຫງວຽນເຕິດແທັງ ເຮັດວຽກຫຼາກຫຼາຍອາຊີບ, ມີສ່ວນຮ່ວມໃນຂະບວນການເຄື່ອນໄຫວປະຕິວັດຂອງປະຊາຊົນ ໃນຫຼາຍປະເທດ. ຂະນະດຽວກັນ ກໍຕໍ່ສູ້ເພື່ອເອກະລາດ ແລະ ເສລີພາບຂອງຊາດ ຢ່າງບໍ່ຢຸດຢັ້ງ. ວັນທີ 18 ມິຖຸນາ 1919, ພາຍໃຕ້ຊື່ “ຫງວຽນອາຍກວັກ”, ທ່ານ ໄດ້ຕາງໜ້າສະມາຄົມຊາວຫວຽດນາມຮັກຊາດ ໃນຝຣັ່ງ ສົ່ງ “ຂໍ້ ຮຽກຮ້ອງຂອງປະຊາຊົນອານນາມ” ໄປຍັງກອງປະຊຸມ Versailles, ຮຽກຮ້ອງໃຫ້ທຸກປະເທດ ຜູ້ເຂົ້າຮ່ວມປະຊຸມຍອມຮັບສິດໃນເສລີພາບ, ປະຊາທິປະໄຕ ແລະ ຄວາມສະເໝີພາບຂອງປະເທດຊາດຫວຽດນາມ. ໃນປີ 1920 ທີ່ກອງປະຊຸມໃຫຍ່ Tours, ທ່ານ ໄດ້ເຂົ້າຮ່ວມສ້າງຕັ້ງພັກກອມມູນິດຝຣັ່ງ.
ປີ 1921, ເຂົ້າຮ່ວມສ້າງຕັ້ງສັນນິບາດຊົນຊາດຫົວເມືອງຂຶ້ນ; ປີ 1922, ອອກໜັງສືພິມ “Le Paria” (ຄົນທຸກຍາກ) ທີ່ຝຣັ່ງ. ປີ 1923, ໄດ້ຮັບເລືອກເປັນຄະນະກໍາມະການບໍລິຫານສາກົນ ຂອງຊາວນາ. ປີ 1924, ເຂົ້າຮ່ວມກອງປະຊຸມໃຫຍ່ ຄັ້ງທີ 5 ຂອງອົງການກອມມູນິດສາກົນ ແລະ ໄດ້ຮັບແຕ່ງຕັ້ງເປັນກໍາມະການປະຈໍາກົມຕາເວັນອອກ, ຮັບຜິດຊອບໂດຍກົງ ຕໍ່ກົມອາຊີຕາເວັນອອກສ່ຽງໃຕ້. ປີ 1925, ທ່ານ ຮ່ວມສ້າງຕັ້ງສະມາຄົມຊົນຊາດໃນອາຊີຜູ້ຖືກກົດຂີ່ ແລະ ຕີພິມ “ຄໍາພິພາກສາລະບົບອານານິຄົມຝຣັ່ງ”. ເພື່ອກະກຽມໃຫ້ການຈັດຕັ້ງພັກກອມມູນິດ ໃນຫວຽດນາມ. ໃນປີດຽວກັນ, ທ່ານ ໄດ້ສ້າງຕັ້ງ “ສະມາຄົມຊາວໜຸ່ມປະຕິວັດຫວຽດນາມ” ທີ່ເມືອງກວາງໂຈວ (ປະເທດຈີນ) ແລະ ຈັດຕັ້ງກຸ່ມກອມມູນິດ ເພື່ອຝຶກອົບຮົມພະນັກງານຜູ້ນໍາຂະບວນການ ແລະ ເຜີຍແຜ່ລັດທິ ມາກ – ເລນິນ ເຂົ້າສູ່ຫວຽດນາມ.
ໃນປີ 1928, ທ່ານ ໄດ້ກັບມາເຮັດວຽກຢູ່ປະເທດໄທ ແລະ ລາວ. ປີ 1929, ສາມອົງການປະກອບດ້ວຍ; ພັກກອມມູນິດອິນດູຈີນ, ພັກກອມມູນິດອານນາມ ແລະ ສະຫະພັນລັດກອມມູນິດອິນດູຈິນ ໄດ້ກໍາເນີດຂຶ້ນຢູ່ຫວຽດນາມ. ຕາມການມອບໝາຍຂອງກອມມູນິດສາກົນ, ວັນທີ 3 ກຸມພາ 1930, ຫງວຽນອາຍກວັກ ເປັນປະທານກອງປະຊຸມລວມ 3 ອົງການດັ່ງກ່າວ ແລະ ສ້າງຕັ້ງພັກກອມມູນິດຫວຽດນາມ. ຕັ້ງແຕ່ ປີ 1930-1940, ທ່ານ ຍັງຄົງຕໍ່ສູ້ເພື່ອປົດປະເທດຊາດຫວຽດນາມ ແລະ ຊົນຊາດຜູ້ຖືກກົດຂີ່ອື່ນໆ ພາຍໃຕ້ເງື່ອນໄຂທີ່ຫຍຸ້ງຍາກ, ຖືກຄຸມຂັງ, ກັກຂັງ ແລະ ຖືກຕົກຢູ່ໃນທ່າໂດດດ່ຽວ ໃນການເຄື່ອນໄຫວຂອງຕົນ.
ໃນປີ 1941, ທ່ານ ໄດ້ກັບສູ່ຫວຽດນາມ ແລະ ຈັດກອງປະຊຸມ ຄັ້ງທີ 8 ຂອງສູນກາງພັກກອມມູນິດອິນດູຈີນ ເພື່ອກໍານົດແນວທາງການຕໍ່ສູ້ປົດປ່ອຍປະເທດຊາດ, ຊີ້ນໍາການຈັດຕັ້ງແນວໂຮມເອກະລາດຫວຽດນາມ (ຫວຽດມິງ), ຈັດຕັ້ງກອງກໍາລັງປະກອບອາວຸດ, ສ້າງຖານທີ່ໝັ້ນຂອງການປະຕິວັດ ແລະ ນໍາພາປະຊາຊົນລຸກຮື້ຂຶ້ນ ຂະໜາດນ້ອຍ ແລະ ຂະໜາດໃຫຍ່ ເພື່ອຢຶດອໍານາດທົ່ວປະເທດ. ການປະຕິວັດເດືອນສິງຫາ ປີ 1945 ປະສົບຄວາມສໍາເລັດ. ວັນທີ 2 ກັນຍາ ປີ 1945 ທີ່ຈະຕຸລັດບາດິ່ງ, ທ່ານ ໄດ້ກ່າວປາໄສປະກາດເອກະລາດ, ປະກາດສ້າງຕັ້ງປະເທດສາທາລະນະລັດ ປະຊາທິປະໄຕ ຫວຽດນາມ; ຈັດການເລືອກຕັ້ງທົ່ວປະເທດ, ເລືອກສະພາແຫ່ງຊາດ ແລະ ຜ່ານລັດຖະທໍາມະນູນປະຊາທິປະໄຕສະບັບທໍາອິດຂອງຫວຽດນາມ. ໃນສະພາແຫ່ງຊາດຊຸດທໍາອິດ (ປີ 1946), ທ່ານ ໄດ້ຮັບເລືອກເປັນປະທານປະເທດ ສາທາລະນະລັດ ປະຊາທິປະໄຕ ຫວຽດນາມ.
ພາຍໃຕ້ການນໍາຂອງສູນກາງພັກ ແລະ ປະທານ ໂຮ່ຈິມິນ, ພັກ, ປະຊາຊົນ ແລະ ກອງທັບ ຫວຽດນາມທົ່ວປະເທດ ໄດ້ທໍາລາຍແຜນການຮຸກຮານຂອງກອງກໍາລັງພວກສັດຕູ ແລະ ພວກປໍລະປັກ ເພື່ອປົກປ້ອງ ແລະ ຮັກສາລັດອໍານາດປະຕິວັດໄວ້ໄດ້ຢ່າງໝັ້ນຄົງ. ທີ່ກອງປະຊຸມໃຫຍ່ພັກ ຄັ້ງທີ 2 (ປີ 1951), ທ່ານ ໄດ້ຮັບເລືອກເປັນປະທານສູນກາງພັກ. ພາຍໃຕ້ການນໍາຂອງພັກ ແລະ ປະທານ ໂຮ່ຈິມິນ, ການຕໍ່ຕ້ານການຮຸກຮານຈັກກະພັດຝຣັ່ງ ຂອງປະຊາຊົນຫວຽດນາມ ໄດ້ຮັບໄຊຊະນະອັນສະຫງ່າຜ່າເຜີຍ ໂດຍຈຸດສູງສຸດ ກໍຄືໄຊຊະນະປະຫວັດສາດ ດຽນບຽນຝູ້ ຊຶ່ງ “ດັງກ້ອງກັງວານໄປທົ່ວຫ້າທະວີບ, ສະເທືອນໄປທົ່ວໂລກ” (ປີ 1954). ພາກເໜືອ ໄດ້ຮັບການປົດປ່ອຍຢ່າງສົມບູນ, ສູນກາງພັກ ແລະ ປະທານ ໂຮ່ຈິມິນ ຍັງຄົງນໍາພາປະຊາຊົນຫວຽດນາມ ດໍາເນີນສອງພາລະກິດຍຸດທະສາດຂອງການປະຕິວັດຄື: ການສ້າງສັງຄົມນິຍົມຢູ່ພາກເໜືອ ແລະ ຕໍ່ສູ້ເພື່ອປົດປ່ອຍພາກໃຕ້, ທ້ອນໂຮມປະເທດຊາດເປັນເອກະພາບ, ເຮັດໃຫ້ການປະຕິວັດປະຊາທິປະໄຕຂອງປະເທດຊາດຫວຽດນາມ ສໍາເລັດໃນທົ່ວປະເທດ.
ກອງປະຊຸມໃຫຍ່ພັກ ຄັ້ງທີ 3 (ປີ 1960) ໄດ້ຕົກລົງເລືອກເອົາປະທານ ໂຮ່ຈິມິນ ເປັນປະທານສູນກາງພັກແຮງງານຫວຽດນາມ ອີກວາລະໜຶ່ງ. ສະພາແຫ່ງຊາດຊຸດທີ 2 ແລະ 3 ກໍໄດ້ເລືອກຕັ້ງ ທ່ານ ເປັນປະທານປະເທດ ສາທາລະນະລັດ ປະຊາທິປະໄຕ ຫວຽດນາມ. ຮ່ວມກັບສູນກາງພັກ, ປະທານ ໂຮ່ຈິມິນ ໄດ້ເປັນຜູ້ນໍາໃນພາລະກິດສ້າງສັງຄົມນິຍົມຢູ່ພາກເໜືອ ແລະ ກໍານົດແນວທາງທີ່ຖືກຕ້ອງ ສໍາລັບການຕໍ່ຕ້ານສົງຄາມຮຸກຮານ ຂອງຈັກກະພັດອາເມຣິກາ ໄປຈົນເຖິງໄຊຊະນະສຸດທ້າຍ; ວາງຮາກຖານ ແລະ ເພີ່ມພູນຄູນສ້າງສາຍພົວພັນສາມັກຄີ ລະຫວ່າງ ຫວຽດນາມກັບ ບັນດາປະເທດໃນທົ່ວໂລກ, ລະ ຫວ່າງ ພັກກອມມູນິດຫວຽດນາມ ກັບພັກກອມມູນິດອື່ນໆ ແລະ ຂະບວນການກໍາມະກອນສາກົນຕ່າງໆ.
ເຖິງເພິ່ນຈະຈາກພວກເຮົາໄປ, ແຕ່ຊື່ສຽງ ແລະ ພາລະກິດຂອງປະທານ ໂຮ່ຈິມິນ ຈະຄົງຢູ່ຕະຫຼອດໄປ ກັບຜືນແຜ່ນດິນຫວຽດນາມ ແລະ ຈະຍັງຄົງມີີຊີວິດຢູ່ໃນຫົວໃຈຂອງພວກເຮົາທຸກຄົນ ຕະຫຼອດໄປ.
ຄໍາເຫັນ