 |
ທ່ານ ຄຳສອນ ອ້ວນທະວີ ປະທານອົງການກວດກາພັກ-ລັດແຂວງຄຳມ່ວນ ໄດ້ລາຍການ ເຄື່ອນໄຫວ ວຽກງານກວດກາ ໃນໄລຍະ 5 ປີຜ່ານມາ. ຄະນະກວດກາພັກ, ອົງການກວດກາລັດແຂວງຄໍາມ່ວນໄດ້ເພີ່ມທະວີວຽກງານຕິດຕາມ, ກວດກາ, ຕີລາຄາການນໍາພາ-ຊີ້ນໍາ ຂອງຄະນະພັກແຕ່ລະຂັ້ນ ເປັນຕົ້ນແມ່ນ ກວດກາສະມາຊິກພັກ ແລະ ການຈັດຕັ້ງພັກ ຕິດພັນກັບການ ຈັດຕັ້ງດໍາເນີນຊີວິດການເມືອງພາຍໃນຄະນະພັກ, ຖືເອົາວຽກງານຕິດຕາມ-ກວດກາ ເປັນການປ້ອງກັນ ແລະ ສະກັດກັ້ນສິ່ງຫຍໍ້ທໍ້ຕ່າງໆໃນກົງຈັກການຈັດຕັ້ງ ແລະ ຖັນແຖວສະມາຊິກພັກ-ພະນັກງານ. ວຽກງານຕິດຕາມ-ກວດກາພັກ ໃນໄລຍະປີ 2025 ແມ່ນໄດ້ສຸມໃສ່ການຕິດຕາມ, ກວດກາການກະກຽມ ແລະ ດຳເນີນ ກອງປະຊຸມໃຫຍ່ 3 ຂັ້ນຂອງພັກ ຊຶ່ງເຫັນວ່າ ຄະນະພັກແຕ່ລະຂັ້ນ ແມ່ນໄດ້ເອົາໃຈໃສ່ປະຕິບັດຕາມກົດລະບຽບຂອງພັກ, ປະຕິບັດຕາມ ຄໍາສັ່ງເລກທີ 411/ກມສພ, ຄໍາແນະນໍາ 211/ຄຈສພ, ຄໍາແນະນໍາ ເລກທີ 285/ຄກສພ ແລະ ຄໍາແນະນໍາ 14/ຄປຈ ແລະ ວຽກງານອື່ນໆ.
ໃນໂອາດນີ້, ທ່ານ ຄໍາພັນ ພົມມະທັດ ໄດ້ກ່າວມີຄໍາເຫັນໂອລົມວ່າ: ເຮັດແນວໃດ ເພື່ອໃຫ້ວຽກງານກວດກາມີຄວາມເຂັ້ມແຂງ?. ດັ່ງນັ້ນ, ຄະນະກວດກາຕ້ອງເອົາໃຈໃສ່ຍົກລະດັບ ເປັນຕົ້ນແມ່ນການສຶກສາອົບຮົມ ໃຫ້ແກ່ພະນັກງານ ວິຊາການ ໄດ້ມີການປັບປຸງຕົນເອງ ໄປຄຽງຄູ່ກັບການຫັນເປັນທັນສະ ໄໝ, ຫັນເປັນດິຈີຕ໋ອນ, ເປັນເປົ້າໝາຍ, ເປັນທິດທາງໃນການພັດທະນາວຽກງານ, ເອົາໃຈໃສ່ປະສານສົມທົບ ກັບຄະນະກວດກາໃນແຕ່ລະຂັ້ນ ນັບແຕ່ສູນກາງ ລົງຮອດທ້ອງຖິ່ນ ເພື່ອຊອກໃຫ້ເຫັນເຖິງອັນໃດທີ່ມີການຫັນປ່ຽນ ອັນໃດທີ່ຍັງມີຂໍ້ຄົງຄ້າງ ເພື່ອຖອດຖອນບົດຮຽນໃນການແກ້ໄຂບັນຫາຕ່າງໆ ທີ່ເຮັດໃຫ້ການປະຕິບັດວຽກງານອືດອາດ ຊັກຊ້າ ເພື່ອເຮັດໃຫ້ວຽກງານກວດກາໄດ້ຫັນປ່ຽນຢ່າງຕັ້ງໜ້າ.
ໃນຕອນບ່າຍຂອງວັນດຽວກັນ ທ່ານ ຄຳພັນ ພົມມະທັດ ພ້ອມດ້ວຍຄະນະ ກໍ່ໄດ້ເຄື່ອນໄຫວຕິດຕາມກວດກາ ເບີ່ງຄວາມຄືບໜ້າໃນການກໍ່ສ້າງຕາຝັ່ງກັນເຈື່ອນ ທີ່ແຄມຂອງຂ້າງພະທາດສີໂຄດຕະບອງ ເມືອງທ່າແຂກ, ໄດ້ເຄື່ອນໄຫວເບີ່ງໂຮງສີເຂົ້າບຸນມີ ແລະ ການກໍ່ສ້າງຕາຝັ່ງກັນເຈື່ອນ ທີ່ບ້ານດອນຂຽວເມືອງໜອງບົກ.
(ຂ່າວ-ພາບ: ແດງສະຫວັດ ແສນພານິດ)
ຄໍາເຫັນ