ປະທານກວດກາສູນກາງພັກຕ້ອນຮັບທູດ ສເກົາຫຼີ ເຂົ້າຢ້ຽມຂ່ຳນັບ

ທ່ານ ຄຳພັນ ພົມມະທັດ ກຳມະການກົມການເມືອງສູນກາງພັກຄະນະເລຂາທິການສູນກາງພັກປະທານຄະນະກວດກາສູນກາງພັກປະທານອົງການກວດກາແຫ່ງລັດ ແລະຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ໄດ້ຕ້ອນຮັບ ທ່ານ ຈອງຢອງຊູ ເອກອັກຄະລັດຖະທູດ ສເກົາຫຼີ ປະຈຳລາວ ເຂົ້າຢ້ຽມຂ່ຳນັບໃນຕອນແລງວັນທີ20 ກຸມພານີ້ທີ່ຫ້ອງຮັບແຂກຄະນະກວດກາສູນກາງພັກ.
ໂອກາດດັ່ງກ່າວ, ທ່ານຄຳພັນ ພົມມະທັດ ໄດ້ກ່າວສະແດງຄວາມຕ້ອນຮັບແລະຊົມເຊີຍຕໍ່ທ່ານທູດທີ່ໄດ້ຮັບການແຕ່ງຕັ້ງໃຫ້ມາດຳລົງຕຳແໜ່ງເປັນເອກອັກຄະລັດຖະທູດ ແຫ່ງ ສເກົາຫຼີ ຄົນໃໝ່ປະຈຳລາວ ເພື່ອສືບຕໍ່ເສີມຂະຫຍາຍສາຍພົວພັນຮ່ວມມືທີ່ດີລະຫວ່າງ ສປປ ລາວ ແລະ ສເກົາຫຼີ ໃຫ້ນັບມື້ແໜ້ນແຟ້ນຍິ່ງຂຶ້ນ.ໂດຍສະເພາະການເຄື່ອນໄຫວ ອົງການກວດກາແຫ່ງລັດ ກັບ ສເກົາຫຼີ ໃນໄລຍະຜ່ານມາ ພະນັກງານຂອງພວກເຮົາໄດ້ເຂົ້າຮ່ວມກອງປະຊຸມສຳມະນາ ແລະຝຶກອົບຮົບຫຼາຍຄັ້ງ ໂດຍການໃຫ້ທຶນຂອງປະເທດເຈົ້າພາບ ແລະຈັດຝຶກອົບຮົບ ໃນຫົວຂໍ້: ການຕ້ານການສໍ້ລາດບັງຫຼວງ ຢູ່ທີ່ ສເກົາຫຼີ,ໃນຕໍ່ໜ້າອົງການກວດກາແຫ່ງລັດ ມີຄວາມຍິນດີທີ່ຈະຂະຫຍາຍການພົວພັນຮ່ວມມືກັບອົງການຕ້ານການສໍ້ລາດບັງຫຼວງ ໃນພາກພື້ນ ແລະ ສາກົນ ເພື່ອການແລກປ່ຽນຂໍ້ມູນຂ່າວສານ,ບົດຮຽນຈາກປະເທດທີ່ພັດທະນາ ແລະ ມີຄວາມເຂັ້ມແຂງທາງດ້ານວຽກງານຕ້ານການສໍ້ລາດບັງຫຼວງ ເຊັ່ນ: ສເກົາຫຼີ
ທ່ານທູດ ໄດ້ກ່າວສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນພ້ອມທັງກ່າວຢືນຢັນຈະຕັ້ງໜ້າສືບຕໍ່ປະກອບສ່ວນເຂົ້າໃນການພົວພັນຮ່ວມມືທີ່ດີລະຫວ່າງ ສເກົາຫຼີ ແລະ ສປປ ລາວ ໃຫ້ນັບມື້ແໜ້ນແຟ້ນຂະຫຍາຍຕົວຍິ່ງຂຶ້ນ.
ສປປ ລາວ ແລະ ສເກົາຫຼີ ໄດ້ຮັບການສ້າງຕັ້ງສາຍພົວພັນການທູດນຳກັນໃນປີ 1995ແລະໄດ້ເປີດສຳນັກງານສະຖານທູດປະຈຳນະຄອນຫຼວງວຽງຈັນໃນປີ 1996 ພ້ອມນັ້ນ ສປປ ລາວ ກໍໄດ້ເປີດສະຖານທູດປະຈຳນະຄອນຫຼວງເຊອູນ ສເກົາຫຼີ ໃນປີ2001,ນະຄອນຫຼວງວຽງຈັນ ແລະ ນະຄອນຫຼວງເຊອູນ ໄດ້ຮ່ວມລົງນາມບົດບັນທຶກຄວາມເຂົ້າໃຈ(MOU) ກ່ຽວກັບການແລກປ່ຽນແບບເພື່ອນມິດ ແລະ ການຮ່ວມມືນຳກັນໃນປີ 2015 ທີ່ນະຄອນຫຼວງເຊອູນ ສເກົາຫຼີ.
(ຂ່າວ-ພາບ:ພູວຽງຄຳ)