ທ່ານ ເຈີນຈຸງຮຶງ ໄດ້ກ່າວລາຍງານວ່າ: ພາຍຫຼັງ 15 ປີ ດໍາເນີນທຸລະກິດ, ຢູນິເທວ ໄດ້ກາຍເປັນເຄືອຂ່າຍທີ່ໃຫຍ່ກວ່າໝູ່ໃນທ້ອງຕະຫຼາດຂອງລາວ, ເປັນບໍລິສັດໜຶ່ງທີ່ມອບເງິນພັນທະໃຫ້ລັດຖະບານລາວ ສ້າງຄວາມເຊື່ອໝັ້ນໃຫ້ລັດຖະບານ ແລະ ປະຊາຊົນລາວ, ເປັນແບບຢ່າງທີ່ພົ້ນເດັ່ນສຳລັບສາຍພົວພັນມຮ່ວມມິດຕະພາບລະຫວ່າງພັກ ແລະ ລັດຖະບານສອງປະເທດ, ເປັນເຄືອຂ່າຍທີ່ໃຫຍ່ອັນດັບ 1 ໃນລາວດ້ວຍເຄືອຂ່າຍ 2G, 3G, 4G ແລະ 4,5G ຄວບຄຸມທົ່ວປະເທດ ແລະ ນຳໜ້າດ້ານເຕັກໂນໂລຊີ 5G. ນອກນັ້ນ, ຢູນິເທວໄດ້ປະກອບສ່ວນສ້າງວຽກເຮັດງານທໍາໃຫ້ກັບປະຊາຊົນລາວຈໍານວນ 27.000 ກ່ວາຄົນ, ລາຍຮັບສະເລ່ຍຂອງພະນັກງານໃນປີ 2023 ທຽບກັບປີ 2022 ທົ່ວບໍລິສັດ ເພີ່ມຂຶ້ນ 16% ທຽບເທົ່າກັບ 0,78 ລ້ານກີບ/ຄົນ/ເດືອນ, ໃນນັ້ນ, ໄດ້ມີການປະກອບສ່ວນຍົກສູງລາຍຮັບໃຫ້ແກ່ພະນັກງານ ໃນສະພາບທີ່ເງິນເຟີ້ຢູ່ລາວເພີ່ມຂຶ້ນສູງ. ໃນ 6 ເດືອນຕົ້ນປີ 2024 ນີ້, ລາຍຮັບສະເລ່ຍຂອງພະນັກງານເພີ່ມຂຶ້ນ 25%, ປະມານ 1,2 ລ້ານກີບ/ຄົນ/ເດືອນ ທຽບໃສ່ປີ 2023.
ທ່ານປະທານປະເທດ ຫວຽດນາມກໍໄດ້ກ່າວສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ ຢູນິເທວ ຊຶ່ງບົນພື້ນຖານບັນດາໝາກຜົນດັ່ງກ່າວ ກໍໄດ້ເນັ້ນໃຫ້ສືບຕໍ່ຮັກສາຄວາມສາມັກຄີ , ຄວາມເປັນເອກະພາບລະຫ່ວາງພະນັກງານທັງລາວ ແລະ ຫວຽດນາມ, ເບິ່ງແຍງຊີວິດການເປັນຢູ່ຂອງພະນັກງານ ເພື່ອເສີມຂະຫຍາຍກຳລັງແຮງດ້ານບຸກຄະລາກອນ, ເປັນແຮງຜັກດັນເຂົ້າໃນການພັດທະນາຢ່າງໝັ້ນຄົງ. ພ້ອມນີ້, ກໍເນັ້ນວ່າ: ບໍລິສັດສະຕາໂທລະຄົມຕ້ອງເປັນເຈົ້າການໃນການເຂົ້າຮ່ວມໃນຂະບວນການຫັນປ່ຽນສູ່ຍຸກດີຈີຕອນຂອງລັດຖະບານລາວ, ເຂົ້າຮ່ວມການສະໜອງຜະລິດຕະພັນການຫັນປ່ຽນເປັນດີຈີຕອນ, ຜະລິດຕະພັນ ເຕັກໂນໂລຊີ ໃຫ້ແກ່ ສະພາແຫ່ງຊາດ, ລັດຖະບານ, ບັນດາກະຊວງທະບວງກົມ ຢ່າງຕັ້ງໜ້າ, ປະກອບສ່ວນເຂົ້າໃນການຜັກດັນ ແລະ ປະຕິບັດແຜນຍຸດທະສາດການຫັນປ່ຽນຍຸກດີຈີຕອນຂອງລັດຖະບານລາວ.
ນອກນີ້, ກໍເນັ້ນຕື່ມວ່າ: ຕ້ອງສືບຕໍ່ປະຕິບັດ ບັນດາການເຄື່ອນໄຫວເພື່ອສັງຄົມ, ປະກອບສ່ວນສັງຄົມ, ເຜີຍແຜ່ດ້ານຄຸນຄ່າວັດທະນະທຳ ພາຍໃນໃຫ້ແກ່ ບັນດາວິສາຫະກິດໃນລາວ, ພິເສດແມ່ນ ບໍລິສັດ ຫວຽດນາມລົງທຶນຢູ່ລາວ ແລະ ຕ້ອງເຄົາລົບລະບຽບກົດໝາຍ, ສ້າງຄວາມເຊື່ອໝັ້ນ ໃຫ້ແກ່ ພັກ - ລັດຖະບານ ຂອງເພື່ອນບ້ານລາວເຮົາ. ພ້ອມດຽວກັນນີ້, ເພື່ອການພັດທະນາທີ່ໝັ້ນຄົງ ກໍໄດ້ເນັ້ນວ່າ: ກ່ອນອື່ນໝົດ, ຕ້ອງສຶກສາຄົ້ນຄ້ວາ, ປະຕິບັດເຂັ້ມງວດ ບັນດາກົດລະບຽບຂອງຂົງເຂດທີ່ຕົນເອງລົງທຶນ ແລະ ກົດລະບຽບຂອງປະເທດ, ຂອງລັດຖະບານຫວຽດນາມ, ການແຂ່ງຂັນແບບໂປ່ງໃສ, ຖືກຕ້ອງຕາມລະບຽບຫຼັກການ, ດໍາເນີນທຸລະກິດຢ່າງມີສິນລະທຳ.
(ຂ່າວ-ພາບ: ສຸກສະຫວັນ, ຂໍ້ມູນຈາກ: ຢູນີເທວ)
ຄໍາເຫັນ