ພົບປະໂອ້ລົມປະຊາຊົນ ເຂດຈຸດສຸມ ບ້ານຊຽງຫຼວງ ໂດຍມີ ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ພ້ອມດ້ວຍການນໍາແຂວງ ແລະ ເມືອງ ເຂົ້າຮ່ວມຕິດຕາມ.
ໂອກາດນີ້, ທ່ານປະທານປະເທດ ພ້ອມຄະນະ ໄດ້ຮັບຟັງການລາຍງານສະພາບ ການຈັດຕັ້ງປະຕິບັດໂຄງການ ຈາກຄະນະຮັບຜິດຊອບໂຄງການໄຟຟ້າພະລັງງານລົມ ມອນຊຸນ ຊຶ່ງໂຄງການດັ່ງກ່າວ ຕັ້ງຢູ່ເມືອງດາກຈຶງ ແຂວງເຊກອງ ແລະ ສ່ວນໜຶ່ງຂອງເມືອງຊານໄຊ ແຂວງອັດຕະປື ສປປ ລາວ. ໂຄງການດັ່ງກ່າວໄດ້ເຊັນສັນຍາສໍາປະທານ ໃນວັນທີ 1 ທັນວາ 2022, ມີກໍາລັງການຜະລິດ 600 ເມກາວັດ ມີມູນຄ່າໂຄງການ 960 ລ້ານໂດລາ ໂດຍແມ່ນການໄຟຟ້າ ຫວຽດນາມ (Vietnam Electricity. EVN), ສັນຍາຊື້ໄຟຟ້າ (PPA) ໄລຍະ 25 ປີ, ມີສາຍສົ່ງໄຟຟ້າທັງໝົດ 71 ກິໂລແມັດ (27 ກິໂລແມັດ ຢູ່ເບື້ອງລາວ) ສາຍສົ່ງ 500 ກິໂລໂວນສົ່ງໄປເຊື່ອມຕໍ່ສະຖານີໄຟຟ້າ Thanh My, Quang Nam, ສສ ຫວຽດນາມ ຊຶ່ງມີແຜນສົ່ງອອກໄຟຟ້າ (COD) ພາຍໃນ ປີ 2025 ໂດຍແມ່ນ ບໍລິສັດ Power China ເປັນຜູ້ຮັບເໝົາກໍ່ສ້າງ ແລະ ໄດ້ເລີ່ມກໍ່ສ້າງແຕ່ເດືອນມີນາ 2023. ມາຮອດ ເດືອນມັງກອນ 2025 ສໍາເລັດການກໍ່ສ້າງ ແລະ ຕິດຕັ້ງແລ້ວກວ່າ 90% (ຕິດຕັ້ງກົງກັນລົມ 133 ຕົ້ນ), ຄາດໝາຍ ເຊື່ອມລະບົບສາຍສົ່ງໄຟຟ້າກັບ ການໄຟຟ້າ ສສ ຫວຽດນາມ (EVN) ໃນເດືອນກຸມພາ 2025, ຈະເລີ່ມດໍາເນີນ ການສົ່ງອອກໄຟຟ້າບາງສ່ວນ 300 MW ພາຍໃນໄຕມາດ 2 ປີ 2025 ແລະ ຈະດໍາເນີນການສົ່ງອອກ ໄຟຟ້າທັງໝົດ 600 MW ພາຍໃນໄຕມາດ 3 ປີ 2025. ໃນຕໍ່ໜ້າຈະຂະຫຍາຍໄປຕື່ມ 1,000 ເມກາວັດ ຕື່ມອີກ.
ໃນໂອກາດນີ້, ທ່ານປະທານປະເທດ ໄດ້ສະແດງຄວາມຊົມເຊີຍ ຕໍ່ບັນດາບໍລິສັດ ກໍຄື ຂາຫຸ້ນທີ່ ໄດ້ເອົາໃຈໃສ່ຈັດຕັ້ງປະຕິບັດໂຄງການບັນລຸຜົນສໍາເລັດ ຕາມແຜນທີ່ວາງໄວ້. ພ້ອມນີ້, ກໍໄດ້ຊີ້ນໍາໃຫ້ຜູ້ລົງທຶນຈົ່ງເອົາໃຈໃສ່ ທາງດ້ານເຕັກນິກ, ການຮັກສາດ້ານສິ່ງແວດລ້ອມ, ສ້າງວຽກເຮັດງານທໍາໃຫ້ແກ່ ປະຊາຊົນໃນທ້ອງຖິ່ນ, ສິ່ງສໍາຄັນແມ່ນຕ້ອງຢຶດໝັ້ນໃນສິ່ງທີ່ຖືກຕ້ອງ ຕ່າງຝ່າຍຕ່າງມີຜົນປະໂຫຍດຮ່ວມກັນ ແລະ ຕ້ອງສົ່ງເສີມໃຫ້ປະຊາຊົນໃນທ້ອງຖິ່ນ ກ່ຽວກັບການປຸກ, ການລ້ຽງ ເພື່ອສະໜອງສະບຽງອາຫານໃຫ້ແກ່ໂຄງການເພື່ອສ້າງລາຍຮັບເພີ່ມ.
ຫຼັງຈາກນັ້ນ, ທ່ານປະທານປະເທດ ພ້ອມຄະນະ ກໍໄດ້ໄປພົບປະຢ້ຽມຢາມພໍ່ແມ່ປະຊາຊົນ ເຂດຈຸດສຸມ ບ້ານຊຽງຫຼວງ ເມືອງດາກຈຶງ ໂດຍໄດ້ຮັບຟັງການລາຍງານຈາກ ທ່ານ ເພັງນາ ຈັນທະພອນ ເຈົ້າເມືອງດາກຈຶງ ກ່ຽວກັບສະພາບການພັດທະນາພາຍໃນບ້ານ. ບ້ານຊຽງຫຼວງ ເປັນບ້ານໜຶ່ງ ທີ່ຕັ້ງຢູ່ລະຫວ່າງກາງ ເທສະບານ ແຂວງເຊກອງ ຫາ ເທສະບານເມືອງດາກຈຶງ, ເນື້ອທີ່ສ່ວນໃຫຍ່ເປັນພູດອຍ ກວມ 95% ຂອງເນື້ອທີ່ທັງໝົດ, ປະຊາຊົນເຂດບ້ານຊຽງຫຼວງ ສວນໃຫຍ່ປະກອບອາຊີບການເຮັດນາປູກເຂົ້າ ແລະ ປູກຝັງ-ລ້ຽງສັດ. ອັດຕາສ່ວນຄວາມທຸກຍາກ ຂອງປະຊາຊົນບັນດາເຜົ່າຍັງກວມເອົາອັດຕາສ່ວນສູງ, ການດໍາລົງຊີວິດ ຂອງປະຊາຊົນເຂດຊົນນະບົດຫ່າງໄກສອກຫຼີກ ຍັງຕິດພັນກັບ ທຳມະຊາດເປັນສ່ວນໃຫຍ່.
ໃນໂອກາດດຽວກັນ, ທ່ານປະທານປະເທດ ກໍໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງ ຕໍ່ຜົນສໍາເລັດຂອງອົງຄະນະພັກທຸກຂັ້ນທີ່ໄດ້ເອົາໃຈໃສ່ ນໍາພາ-ຊີ້ນໍາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມພາຍໃນແຂວງ ກໍຄື ເມືອງ ອັນໄດ້ເຮັດໃຫ້ບັນດາພື້ນຖານໂຄງລ່າງຂອງເມືອງ ກໍຄື ກຸ່ມບ້ານໄດ້ຮັບການພັດທະນາດີຂຶ້ນເປັນກ້າວໆ. ພ້ອມນີ້, ທ່ານຍັງໄດ້ເນັ້ນໃຫ້ຄະນະນໍາທຸກຂັ້ນພາຍໃນເມືອງ ແລະ ກຸ່ມບ້ານ ເອົາໃຈໃສ່ຊຸກຍູ້, ແກ້ໄຂສະພາບຄວາມຫຍຸ້ງຍາກດ້ານເສດຖະກິດ ໃນປັດຈຸບັນ, ເອົາໃຈໃສ່ສຶກສາອົບຮົມການເມືອງແນວຄິດໃຫ້ແກ່ພະນັກງານ, ປະຊາຊົນບັນດາເຜົ່າ, ໃຫ້ຂະແໜງການທີ່ກ່ຽວຂ້ອງເອົາໃຈໃສ່ຊຸກຍູ້ສົ່ງເສີມປະຊາຊົນ ທໍາການຜະລິດໃຫ້ຫຼາຍຂຶ້ນ ຊຶ່ງກ່ອນອື່ນໝົດພວກເຮົາ ຕ້ອງເປັນເຈົ້າການໃນການສ້າງເສດຖະກິດເອກະລາດເປັນເຈົ້າຕົນເອງ, ຊຶ່ງພະນັກງານກ່ຽວຂ້ອງຕ້ອງລົງໃຫ້ຄວາມຮູ້ວິຊາການ ດ້ານເຕັກນິກການປູກ-ການລ້ຽງໃຫ້ແກ່ປະຊາຊົນໃຫ້ມີຄວາມຮູ້, ພ້ອມທັງເອົາໃຈໃສ່ຊຸກຍູ້ສົ່ງເສີມລູກຫຼານໄດ້ເຂົ້າໂຮຽຮຽນຢ່າງທົ່ວເຖິງ ໃນເກນອາຍຸເຂົ້າຮຽນ, ເອົາໃຈໃສ່ໃນການປ້ອງກັນສິ່ງເສບຕິດພາຍໃນກຸ່ມຢ່າງແຂງແຮງ ເພື່ອບໍ່ໃຫ້ລູກຫຼານຕົກເປັນເຫຍື່ອຂອງສິ່ງເສບຕິດ. ນອກນັ້ນ, ກໍໃຫ້ເອົາໃຈໃສ່ໃນການໄຈ້ແຍກສື່ສັງຄົມອອນລາຍ ວ່າອັນໃດຖືກ ຫຼື ຜິດ, ອັນໃດທີ່ເປັນສິ່ງຕໍ່ຕ້ານ, ບິດເບືອນຕໍ່ແນວທາງຂອງພັກ-ລັດເຮົາ ແລະ ດ້ານອື່ນໆ.
ໃນໂອກາດລົງພົບປະ ຢ້ຽມຢາມໃນຄັ້ງນີ້, ທ່ານປະທານປະເທດ ຍັງໄດ້ມອບທຶນສົມທົບຈໍານວນໜຶ່ງ ເພື່ອນໍາໃຊ້ເຂົ້າໃນ ວຽກງານການພັດທະນາເມືອງ ກໍຄື ກຸ່ມບ້ານຊຽງຫຼວງ.
(ຂ່າວ-ພາບ: ສຸກສະຫວັນ ພຸນສຸກ)
ຄໍາເຫັນ