ໂອກາດດັ່ງກ່າວ, ສະຫາຍ ຈະເລີນ ເຢຍປາວເຮີ ໄດ້ສະແດງຄວາມຂອບໃຈ ແລະ ເປັນກຽດຢ່າງຍິ່ງ ທີ່ສະຫາຍ ມີເກນ ດີເອັດສ-ກາແນນ ເບມຸເດັດສ ສະຫຼະເວລາໃຫ້ການເຂົ້າຢ້ຽມຂໍ່ານັບຂອງຄະນະຜູ້ແທນ ສະມາຄົມມິດຕະພາບ ລາວ-ກູບາ ແລະ ຕີລາຄາສູງ ຕໍ່ການມາຢ້ຽມຢາມ ສປປ ລາວ ຂອງສະຫາຍພ້ອມດ້ວຍຄະນະ, ຖືເປັນການປະກອບສ່ວນອັນສໍາຄັນ ໃນການເສີມຂະຫຍາຍ ຮັດແໜ້ນສາຍພົວພັນມິດຕະພາບອັນເປັນມູນເຊື້ອຂອງສອງພັກ, ປະຊາຊົນສອງຊາດລາວ-ກູບາ ໃຫ້ນັບມື້ຂະຫຍາຍຕົວ ແລະ ກ້າວເຂົ້າສູ່ລວງເລິກ ຢ່າງບໍ່ຢຸດຢັ້ງ. ພ້ອມນີ້, ກໍໄດ້ກ່າວວ່າ: ຂ້າພະເຈົ້າ ໄດ້ຕິດຕາມສະພາບການພັດທະນາຢູ່ ສກູບາ ຢ່າງເປັນປົກກະຕິ; ຕີລາຄາສູງຕໍ່ການນໍາພາຂອງພັກກອມມູນິດກູບາ ໃນການນໍາພາປະຊາຊົນກູບາ ປົກປັກຮັກສາ ແລະ ເສີມຂະຫຍາຍໝາກຜົນຂອງການປະຕິວັດກູບາ ແລະ ນໍາພາສ້າງສາພັດທະນາປະເທດຢ່າງຕໍ່ເນື່ອງ.
ສະຫາຍ ຈະເລີນ ເຢຍປາວເຮີ ຍັງໄດ້ສະແດງຄວາມປິຕິຍິນດີ ແລະ ພາກພູມໃຈ ທີ່ເຫັນສາຍພົວພັນຮ່ວມມື ລາວ-ກູບາ ໄດ້ຮັບການເສີມຂະຫຍາຍຢ່າງຕໍ່ເນື່ອງ ແລະ ພັດທະນາຢ່າງບໍ່ຢຸດຢັ້ງສະແດງອອກໃນການແລກປ່ຽນ ຢ້ຽມຢາມການນໍາຂັ້ນສູງຂອງສອງປະເທດ, ເຖິງແມ່ນວ່າຈະຢູ່ຫ່າງໄກກັນຄົນລະທະວີບກໍຕາມ ແຕ່ຍັງໄປມາຫາສູ່ກັນປົກກະຕິ, ສະແດງໃຫ້ເຫັນເຖິງສາຍພົວພັນມິດຕະພາບອັນເປັນມູນເຊື້ອຂອງສອງພັກ, ສອງລັດ ແລະ ປະຊາຊົນສອງຊາດລາວ-ກູບາ ນັບມື້ໄດ້ຮັບການເສີມຂະຫຍາຍໃຫ້ເຂົ້າສູ່ລວງເລິກ ຢ່າງບໍ່ຢຸດຢັ້ງ. ພ້ອມນີ້, ກໍໄດ້ສະແດງຄວາມຂອບໃຈ ແລະ ຮູ້ບຸນຄຸນ ຕໍ່ພັກ, ລັດ ແລະ ປະຊາຊົນ ກູບາ ໃນການຊ່ວຍເຫຼືອອັນລໍ້າຄ່າ ແລະ ຈິງໃຈ ຕໍ່ພັກ, ລັດ ແລະ ປະຊາຊົນລາວ ໃນພາລະກິດຕໍ່ສູ້ກູ້ຊາດ ໃນເມື່ອກ່ອນ ກໍຄືໄລຍະປົກປັກຮັກສາປະເທດຊາດໃນປັດຈຸບັນ.
ຈາກນັ້ນ, ສະຫາຍ ຈະເລິນ ເຢຍປາວເຮີ ໄດ້ລາຍງານການເຄື່ອນໄຫວຂອງສະມາຄົມມິດຕະພາບ ລາວ-ກູບາ ໂດຍຫຍໍ້ ວ່າ: ສະມາຄົມມິດຕະພາບ ລາວ-ກູບາ ມີກົນໄກປະສານງານ, ພົບປະແລກປ່ຽນ, ໄປມາຫາສູ່, ມີ ການປະສານສົມທົບ ແລະ ຊ່ວຍເຫຼືອຊຶ່ງກັນ ແລະ ກັນໃນເວທີພາກພື້ນ ແລະ ສາກົນ, ໃນເດືອນຕຸລາ 2024, ຄະນະຜູ້ແທນສະມາຄົມມິຕະພາບ ລາວ-ກູບາ ໄດ້ເຂົ້າຮ່ວມກອງປະຊຸມຂົງເຂດອາຊີ - ປາຊິຟິກ ເພື່ອຄວາມສາມັກຄີກັບກູບາ ຄັ້ງທີX ຈັດຂຶ້ນຢູ່ ສປ ຈີນ. ສໍາລັບການເຄື່ອນໄຫວຢູ່ພາຍໃນ ສປປ ລາວ, ສະມາຄົມມິດຕະພາບ ລາວ-ກູບາ ໄດ້ເຄື່ອນໄຫວ ແລະ ສ້າງກິດຈະກຳ ຮ່ວມກັບ ສະຖານທູດກູບາ ປະຈຳ ສປປ ລາວ ໂດຍສະເພາະຈັດປາຖະກະຖາ ເລົ່າມູນເຊື້ອ ໃນໂອກາດວັນສໍາຄັນຂອງກູບາ, ໃນເດືອນພຶດສະພາ 2024 ໄດ້ຈັດພິທີປາຖະກະຖາສະເຫຼີມສະຫຼອງ ຄົບຮອບ 50 ປີ ແຫ່ງການສ້າງສາຍພົວພັນການທູດ ລະຫວ່າງ ສປປ ລາວ ແລະ ສ ກູບາ (ວັນທີ 4 ພະຈິກ 1974 - ວັນທີ 4 ພະຈິກ 2024) ຢູ່ທີ່ແຂວງຫົວພັນ. ນອກນັ້ນ, ໄດ້ຈັດກິດຈະກຳແຂ່ງຂັນຂຽນບົດຄວາມ ແລະ ກິດຈະກຳຕ່າງໆ, ໄດ້ຕ້ອນຮັບຄະນະຜູ້ແທນສະມາຄົມມິດຕະພາບ ກູບາ - ລາວ ນໍາໂດຍ ສະຫາຍ ນາງ ວຽງໄຊ ວານເດັຊ ທີ່ໄດ້ນໍາພາ ຄະນະນັກສິລະປະຟ້ອນບາເລ່ ມາສະແດງຟ້ອນບາເລ່ ຢູ່ ສປປ ລາວ. ການພົວພັນຮ່ວມມືດ້ານສະມາຄົມມິດຕະພາບ ປະກອບສ່ວນອັນສໍາຄັນເຂົ້າໃນການເສີມສ້າງສາຍພົວພັນມິດຕະພາບອັນເປັນມູນເຊື້ອຂອງສອງພັກ, ສອງລັດ ແລະ ປະຊາຊົນສອງ ຊາດລາວ-ກູບາ.
ໃນໂອກາດທີ່ມີຄວາມໝາຍສໍາຄັນນີ້, ສະຫາຍ ຈະເລີນ ເຢຍປາວເຮີ ກໍໄດ້ຂໍທິດຊີ້ນໍາ ແລະ ແນະນໍາການເຄື່ອນໄຫວຂອງສະມາຄົມມິດຕະພາບ ສອງຝ່າຍ ລາວ ແລະ ກູບາ ເພື່ອເຮັດໃຫ້ການເຄື່ອນໄຫວມີປະສິດທິພາບ ແລະ ປະສິດທິຜົນຂຶ້ນຕື່ມ. ຈາກນັ້ນ, ສະຫາຍ ຈະເລີນ ເຢຍປາວເຮີ ໄດ້ອວຍພອນໃຫ້ ປະທານປະເທດແຫ່ງ ສ ກູບາ ພ້ອມດ້ວຍຄະນະ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ, ສືບຕໍ່ຊີ້ນໍາ-ນໍາພາ ສ ກູບາ ໃຫ້ໄດ້ຮັບຜົນສໍາເລັດອັນໃໝ່ຍິ່ງໃຫຍ່ກວ່າເກົ່າ; ອວຍພອນໃຫ້ສາຍພົວພັນມິດຕະພາບ ທີ່ເປັນມູນເຊື້ອຂອງສອງພັກ, ສອງລັດ ແລະ ປະຊາຊົນ ສອງຊາດລາວ-ກູບາ ຈົ່ງໝັ້ນຄົງຂະໜົງແກ່ນຊົ່ວກາລະນານ, ອວຍພອນໃຫ້ການຢ້ຽມຢາມ ສປປ ລາວ ຂອງສະຫາຍພ້ອມດ້ວຍຄະນະ ຈົ່ງໄດ້ຮັບຜົນສໍາເລັດຢ່າງຈົບງາມ ແລະ ເດີນທາງກັບຄືນປະເຫດ ດ້ວຍຄວາມສະຫວັດດີພາບ.
(ຂ່າວ: ແສງຈັນ)
ຄໍາເຫັນ