ປະທານສະພາແຫ່ງຊາດ ຫວຽດນາມ ເຂົ້າພົບປະກັບ ປະທານປະເທດແຫ່ງ ສປ ຈີນ

ວິທະຍຸກະຈາຍສຽງຫວຽດນາມລາຍງານວ່າ: ໃນຂອບເຂດການຢ້ຽມຢາມ ຈີນ ຢ່າງເປັນທາງການ, ໃນວັນທີ 8 ເມສາ ຜ່ານມາຢູ່ນະຄອນຫຼວງປັກກິ່ງ, ທ່ານ ເວືອງດິງເຫວ້ ປະທານສະພາແຫ່ງຊາດຫວຽດນາມ ໄດ້ພົບປະກັບ ທ່ານ ສີຈິ້ນຜິງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຈີນປະທານປະເທດ ແຫ່ງ ສປ ຈີນ.
ຂ່າວລາຍງານວ່າ: ໃນການພົບປະ, ທ່ານ ເວືອງດິງເຫວ້ ເນັ້ນໜັກເຖິງການພັດທະນາການພົວພັນກັບຈີນ ແມ່ນການເລືອກເຟັ້ນຍຸດທະສາດ, ບຸລິມະສິດແຖວໜ້າໃນແນວທາງການຕ່າງປະເທດເອກະລາດ, ເປັນເຈົ້າຕົນເອງ, ເພື່ອສັນຕິພາບ, ການຮ່ວມມື ແລະ ການພັດທະນາ, ຫັນການພົວພັນຕ່າງປະເທດຂອງ ຫວຽດນາມ ເປັນຫຼາຍຝ່າຍ, ຫຼາຍຮູບຫຼາຍແບບ; ຢັ້ງຢືນ ຫວຽດນາມ ມີທັດສະນະສະເໝີຕົ້ນສະເໝີປາຍໃນການປະຕິບັດນະໂຍບາຍ “ປະເທດ ຈີນດຽວ”. ທ່ານ ເວືອງດິງເຫວ້ ສະເໜີໃຫ້ສອງຝ່າຍປັບປຸງ ແລະ ເພີ່ມທະວີຄວາມໄວ້ເນື້ອເຊື່ອໃຈການເມືອງ, ເພີ່ມທະວີການພົບປະຂັ້ນສູງ, ຜັນຂະຫຍາຍການພົວພັນ, ຮ່ວມມືໃນຊ່ອງທາງພັກ, ລັດຖະບານ, ສະພາແຫ່ງຊາດ, ແນວໂຮມປະເທດຊາດ ແລະ ໃນບັນດາຂົງເຂດສຳຄັນຄື: ການທູດ, ຕຳຫຼວດ, ປ້ອງກັນປະເທດໃຫ້ເປັນຢ່າງດີ. ທ່ານ ເວືອງດິງເຫວ້ ສະເໜີໃຫ້ສອງຝ່າຍຍົກລະດັບການເຊື່ອມຕໍ່ຍຸດທະສາດ, ສ້າງກຳລັງໜູນເຕີບໂຕໃໝ່ໃຫ້ການຮ່ວມມືສອງປະເທດ, ຈຸດສຸມແມ່ນຊຸກຍູ້ການຮ່ວມມືການຄ້າ, ເປີດກວ້າງການນຳເຂົ້າສິນຄ້າ, ພິເສດແມ່ນຜະລິດຕະພັນກະເສດຂອງ ຫວຽດນາມ, ຊຸກຍູ້ການເຊື່ອມຕໍ່ລະຫວ່າງ ຫວຽດນາມ ກັບບັນດາຍຸດທະສາດພັດທະນາໃຫຍ່ຂອງຈີນ, ເຊື່ອມຕໍ່ທາງລົດໄຟ, ເສັ້ນທາງດ່ວນ, ທາງທະເລ, ທາງອາກາດ, ຊຸກຍູ້ການຮ່ວມມືການເງິນ, ເງິນຕາ ແລະ ຫັນເປັນດີຈີຕອນ.
ທ່ານ ສີຈິ້ນຜິງ ຢັ້ງຢືນ ຈີນສະໜັບສະໜູນ ຫວຽດນາມ ພັດທະນາ, ສະຖຽນລະພາບ, ສ້າງສັງຄົມນິຍົມເໝາະສົມກັບສະພາບການຂອງປະເທດຊາດ. ທ່ານ ສີຈິ້ນຜິງ ໄດ້ຕີລາຄາສູງກ່ຽວກັບການນຳສູງສຸດຂອງສອງພັກ-ສອງລັດ ເຫັນດີເປັນເອກະພາບສ້າງປະຊາຄົມແບ່ງປັນອະນາຄົດມີຄວາມໝາຍຍຸດທະສາດ ເປິດໄລຍະຮ່ວມມືໃໝ່, ເປີດກວ້າງການພົວພັນສອງຝ່າຍ. ທ່ານ ສີຈິ້ນຜິງ ຢັ້ງຢືນວ່າ ຈີນ ກຽມພ້ອມຊຸກຍູ້ການພົວພັນຂອງສອງພັກ-ສອງລັດ ໃຫ້ນັບມື້ນັບພັດທະນາ, ກ້າວເຂົ້າສູ່ລວງເລິກ, ແທດຈິງ.