ໂດຍ: ວັນເພັງ
ໃນໂອກາດນັກຂ່າວນັກໜັງສືພິມ ປະຊາຊົນສອງທ່ານ ທີ່ໄດ້ຮັບເຊີນຈາກບໍລິສັດຮ່ວມພັດທະນາສີທັນດອນ ຈຳກັດ ໃຫ້ລົງໄປເຄື່ອນໄຫວເກັບກໍ້າຂ່າວງານບຸນນະມັດສະການຕົ້ນໄມ້ມະນີໂຄດ ພ້ອມເປີດປີທ່ອງທ່ຽວລາວ 2024 ທີ່ເມືອງໂຂງ ແຂວງຈຳປາສັກ ດິນແດນພາກໃຕ້ສຸດຂອງ ສປປ ລາວ ເມື່ອບໍ່ດົນມານີ້ ຊຶ່ງເປັນໂອກາດສຳຄັນກາຍເປັນຄວາມຊົງຈຳທີ່ດີຄັ້ງໜຶ່ງ ທີ່ແສນປະທັບໃຈທີ່ລືມບໍ່ໄດ້.
ການເດີນທາງໄປຄັ້ງນີ້ກໍເປັນຄັ້ງທຳອິດສຳລັບຜູ້ຂຽນທີ່ໄດ້ເດີນທາງດ້ວຍເຮືອບິນສາຍການບິນລາວQ05 ຈາກສະໜາມບິນສາກົນວັດໄຕ ນະຄອນຫຼວງວຽງຈັນ ບິນມຸ່ງໜ້າໄປສູ່ສະໜາມບິນປາກເຊ ແຂວງຈຳປາສັກ ຊຶ່ງໃຊ້ເວລາພຽງ 50 ນາທີ. ຫຼັງຈາກຮອດສະໜາມບິນດັ່ງກ່າວກໍມີພະນັກງານບໍລິສັດ ມາຕ້ອນຮັບຢູ່ຕໍ່ໜ້າທາງອອກຂອງຜູ້ໂດຍສານ ດ້ວຍຮອຍຍິ້ມທີ່ແສນປະທັບໃຈ ແລະ ແທນຄວາມໝາຍວ່າຍິນດີຕ້ອນຮັບ. ຈາກນັ້ນ, ກໍໄດ້ຂຶ້ນລົດເດີນທາງໄປຕໍ່ຈາກປາກເຊ ເພື່ອມຸ່ງໜ້າໄປຫາເມືອງໂຂງຈາກເສັ້ນທາງ 150 ກິໂລແມັດ, ການເດີນທາງດ້ວຍລົດກໍໃຊ້ເວລາ 2 ຊົ່ວໂມງປາຍກໍຮອດ ເນື່ອງຈາກເສັ້ນທາງມີຄວາມສວຍງາມເປັນເສັ້ນທາງຊື່ ເຮັດໃຫ້ມີຄວາມສະດວກສະບາຍຫຼາຍ, ເມື່ອໄປຮອດເມືອງໂຂງກໍໄດ້ເຂົ້າພັກຢູ່ ຣີສອດຂອງບໍລິສັດຮ່ວມພັດທະນາ ສີທັນດອນ ຈຳກັດ ຊຶ່ງເປັນໜຶ່ງຣີສອດທີ່ຕັ້ງຢູ່ແຄມແມ່ນໍ້າຂອງມີວີວທີວທັດທີ່ສວຍງາມທີ່ສຸດ ໄດ້ເຫັນແລ້ວຈົນເຮັດໃຫ້ມີຄວາມຊື່ນໃຈ ຫາຍຈາກຄວາມອິດເມື່ອຍໃນການເດີນທາງ.
ດັ່ງທີ່ທ່ານຮູ້ແລ້ວວ່າ: ເມືອງໂຂງເປັນໜຶ່ງເມື່ອງທີ່ມີສະຖານທີ່ທ່ອງທ່ຽວຫຼາຍແຫ່ງທີ່ສວຍງາມ ແລະ ມີຊື່ສຽງບໍ່ວ່າຈະເປັນແຫຼ່ງທ່ອງທ່ຽວທຳມະຊາດ, ປະຫວັດສາດ ແລະ ວັດທະນະທຳ ເປັນຕົ້ນນໍ້າຕົກຕາດຄອນພະເພັງ, ເກາະດອນຕ່າງໆ. ສຳລັບການມາທ່ຽວສວນອຸທິຍານນໍ້າຕົກຕາດຄອນພະເພັງ ທ່ານຈະໄດ້ເຫັນທີວທັດນໍ້າຕົກຕາດຄອນພະເພັງທີ່ກວ້າງໃຫຍ່ ແລະ ສວຍງາມທີ່ສຸດຂອງປະເທດລາວ, ພ້ອມມີຈຸດນັ່ງຊົມວີວທີວທັດທຳມະຊາດນໍ້າຕົກຕາດຫຼາຍຈຸດ, ຟັງສຽງນໍ້າຕົກຕາດສົ່ງສຽງດັງທາດໆ ເປັນລະອອງຟອງສີຂາວນວນ. ຫຼັງຈາກຊົມວີວທີວທັດແລ້ວຍັງສາມາດເຂົ້າກາບໄຫ້ວ-ບູຊາຕົ້ນໄມ້ມະນີໂຄດ ເນື່ອງຈາກຕົ້ນໄມ້ມະນີໂຄດເປັນຕົ້ນໄມ້ທີ່ສັກສິດ, ຊາວແຂວງຈໍາປາສັກກໍຄືຊາວເມືອງໂຂງໃຫ້ຄວາມເຄົາລົບນັບຖື ພ້ອມມີຄວາມເຊື່ອວ່າເປັນຕົ້ນໄມ້ຄູ່ບ້ານຄູ່ເມືອງມາຫຼາຍພັນປີ. ທຸກໆປີ ເມື່ອຮອດເດືອນຍີ່ ຫຼື ເດືອນມັງກອນ ຈະມີພິທີສະເຫຼີມສະຫຼອງງານບຸນດັ່ງກ່າວຂຶ້ນເພື່ອໃຫ້ມວນຊົນໄດ້ມາທ່ຽວຊົມ ກາບໄຫວ້, ຂໍພອນ ແລະ ທຳບຸນ. ສໍາລັບການຈັດງານບຸນຕົ້ນໄມ້ມະນີໂຄດຄັ້ງທີ 2 ປະຈຳປີ 2024 ແມ່ນຕິດພັນກັບປີທ່ອງທ່ຽວລາວ 2024 ເຫັນວ່າປີນີ້ຈັດໃຫຍ່ກວ່າປີຜ່າມມາ ພ້ອມມີຫຼາຍກິດຈະກຳ ທີ່ໜ້າສົນໃຈ ເຮັດໃຫ້ມີມວນຊົນທັງພາຍໃນ ແລະ ຕ່າງປະເທດເຂົ້າມາທ່ຽວຢ່າງຫຼວງຫຼາຍ.ພ້ອມນັ້ນ, ການມາທ່ຽວເມືອງໂຂງບໍ່ພຽງແຕ່ໄດ້ທ່ຽວຊົມສະຖານທີ່ທ່ອງທ່ຽວຕ່າງໆ ຍັງໄດ້ຮຽນຮູ້ວັດທະນະທຳ, ວິຖີການດຳລົງຊີວິດ, ຮີດຄອງປະເພນີ, ອາຫານທີ່ເປັນເອກະລັກຂອງທ້ອງຖິ່ນ ໂດຍສະເພາະອາຫານປະຈຳທ້ອງຖິ່ນ ສິ່ງທີ່ຂາດບໍ່ໄດ້ຖ້າໄດ້ມາຮອດແລ້ວຕ້ອງໄດ້ຊື້ຕິດໄມ້ຕິດມືກັບບ້ານນັ້ນຄື ປາທີ່ນຳມາປຸງແຕ່ງເປັນອາຫານໄດ້ຫຼາຍປະເພດເຊັ່ນ: ແຈ່ວປາກະເຕົາ, ສົ້ມປາ ແລະ ອື່ນໆທີ່ປຸງແຕ່ງດ້ວຍຣົດຊາດແຊບຊ້ອຍ, ມີກິ່ນຫອມ ແລະ ມີເອກະລັກບໍ່ຄືແຂວງອື່ນໆຂອງລາວເຮົາ.
ແນວໃດກໍຕາມໃນນາມຜູ້ຂຽນກໍຄືຜູ້ສື່ຂ່າວ ຂໍຂອບໃຈນໍາບໍລິສັດຮ່ວມພັດທະນາສີທັນດອນ ຈຳກັດ ທີ່ໄດ້ໃຫ້ການຕ້ອນຮັບເປັນຢ່າງດີ ທັງໄດ້ສຳຜັດຫຼາຍສິ່ງຢ່າງໃນເຂດແຂວງພາກໃຕ້ທີ່ມີຫຼາຍອັນແປກໃໝ່ ຊຶ່ງເປັນຄວາມຊົງຈຳຄັ້ງໜຶ່ງທີ່ແສນປະທັບໃຈ ເຊື່ອແນວ່າໂອກາດໜ້າຈະໄດ້ໄປເຄື່ອນໄຫວເກັບກໍ້າເອົາຂ່າວ ແລະ ທ່ອງທ່ຽວດິນແດນແຂວງພາກໃຕ້ຂອງລາວອີກຄັ້ງ.
ຄໍາເຫັນ