ກະຊວງພາຍໃນ ແລະ ການສື່ສານ ຂອງຍີ່ປຸ່ນ ລະບຸວ່າ: ອັດຕາສ່ວນຂອງເດັກນ້ອຍອາຍຸຕ່ຳກວ່າ 15 ປີຕໍ່ປະຊາກອນທັງໝົດແມ່ນ 10.8%, ຫຼຸດລົງ 0.3% ຈາກປີ 2025 ແລະ ເປັນລະດັບຕໍ່າສຸດນັບຕັ້ງແຕ່ມີການເກັບກໍາຂໍ້ມູນປຽບທຽບໃນປີ 1950. ໂດຍຕົວເລກເຫຼົ່ານີ້ລວມມີຊາວຕ່າງປະເທດ ແລະ ຄິດໄລ່ຈາກການຄາດຄະເນປະຊາກອນທີ່ໄດ້ຮັບທຸກໆ 5 ປີ.
ເມື່ອແບ່ງຕາມເພດ, ຈຳນວນເດັກນ້ອຍອາຍຸຕ່ຳກວ່າ 15 ປີໃນປະເທດຍີ່ປຸ່ນມີເດັກນ້ອຍຜູ້ຊາຍ 6.81 ລ້ານຄົນ ແລະ ເດັກນ້ອຍຜູ້ຍິງ 6.48 ລ້ານຄົນ. ເມື່ອແບ່ງຕາມກຸ່ມອາຍຸ ຈະມີເດັກນ້ອຍອາຍຸ 12-14 ປີ ຈໍານວນ 3.09 ລ້ານຄົນ ແລະ ເດັກອາຍຸ 0-2 ປີ ຈໍານວນ 2.13 ລ້ານຄົນ ຊຶ່ງຊີ້ບອກເຖິງການຫຼຸດລົງຢ່າງຕໍ່ເນື່ອງຂອງອັດຕາການເກີດ.
ຂໍ້ມູນເບື້ອງຕົ້ນຈາກກະຊວງສາທາລະນະສຸກ, ແຮງງານ ແລະ ສະຫວັດດີການຂອງຍີ່ປຸ່ນຊີ້ໃຫ້ເຫັນວ່າ: ຈຳນວນເດັກນ້ອຍເກີດໃໝ່ຂອງຍີ່ປຸ່ນໃນປີ 2025 ຊຶ່ງລວມທັງພົນລະເມືອງຕ່າງປະເທດໄດ້ຫຼຸດລົງເຖິງລະດັບຕໍ່າສຸດແບບບໍ່ເຄີຍມີມາກ່ອນ ທີ່ 705,000 ຄົນ ຊຶ່ງເປັນປີທີສິບຕິດຕໍ່ກັນທີ່ຫຼຸດລົງ.
ທັງນີ້, ຈຳນວນປະຊາກອນເດັກນ້ອຍຂອງຍີ່ປຸ່ນໄດ້ຫຼຸດລົງຢ່າງຕໍ່ເນື່ອງນັບຕັ້ງແຕ່ປີ 1982, ຫຼັງຈາກບັນລຸລະດັບສູງສຸດ 29.89 ລ້ານຄົນໃນປີ 1954 ແລະ ປະຊາຊົນໄດ້ມີລູກຮອບທີສອງ ລະຫວ່າງປີ 1971 ແລະ 1974.
ຜົນການສຳຫຼວດຂອງອົງການສະຫະປະຊາຊາດທີ່ດຳເນີນໃນຫຼາຍໄລຍະສະແດງໃຫ້ເຫັນວ່າ: ຍີ່ປຸ່ນມີອັດຕາສ່ວນປະຊາກອນເດັກນ້ອຍຕໍ່າທີ່ສຸດອັນດັບສອງໃນບັນດາ 38 ປະເທດທີ່ມີປະຊາກອນຫຼາຍກວ່າ 40 ລ້ານຄົນ, ໂດຍ ສ ເກົາຫຼີ ມີອັດຕາສ່ວນຕໍ່າສຸດທີ່ 10.2%.
ຄໍາເຫັນ