ເມື່ອບໍ່ດົນຜ່ານມາ , ບ້ານຜາແດງ ເມືອງປາກອູ ແຂວງ ຫຼວງພະບາງ ໄດ້ມີພິທີ ມອບ-ຮັບ ການກໍ່ສ້າງ-ສ້ອມແປງ ລະບົບນໍ້າລິນ ໃຫ້ປະຊາຊົນໄດ້ຊົມໃຊ້ ໂດຍມີ ທ່ານ ຫຸມແພງ ວິລະໄຊ ຮອງເຈົ້າເມືອງປາກອູ ແຂວງຫຼວງພະບາງ, ທ່ານ ສຸນັນທາ ໄຊຍະສິດ ຕາງໜ້າອົງການສຸພານິມິດ ສາກົນ ປະຈໍາແຂວງຫຼວງພະບາງ, ພ້ອມດ້ວຍ ຜູ້ຕາງໜ້າພະແນກຂອງແຂວງ, ຫົວໜ້າ-ຮອງຫົວໜ້າຫ້ອງການກ່ຽວຂ້ອງຂອງເມືອງ, ການຈັດຕັ້ງບ້ານ ແລະປະຊາຊົນ ເຂົ້າຮ່ວມ.
ການກໍ່ສ້າງ-ສ້ອມແປງນໍ້າລິນ ຢູ່ບ້ານຜາແດງຄັ້ງນີ້ ເພື່ອເຮັດໃຫ້ປະຊາຊົນ ໄດ້ຊົມໃຊ້ນໍ້າສະອາດ ແລະຫຼຸດຜ່ອນແຮງງານຂອງແມ່ຍິງ ແລະເດັກນ້ອຍທີ່ໄປຕັກນໍ້າຢູ່ໄກບ້ານ, ໂດຍເລີ່ມກໍ່ສ້າງແຕ່ວັນທີ່ 6 ມີນາ ຫາ ວັນທີ່ 30 ເມສາ 2024 ສໍາເລັດ ຊຶ່ງປະກອບມີບັນດາໜ້າວຽກຄື, ໄດ້ກໍ່ສ້າງຫົວງານລະບົບຕອງ 4 ຫ້ອງສໍາເລັດ 100%, ຝັງທໍ່ນໍ້າຫົວງານຫາອຸ່ງເກັບນໍ້າຢູ່ບ້ານສໍາເລັດ 100%, ຕິດຕັ້ງກ໊ອກນໍ້າສາທາລະນະລວມສໍາເລັດ 100%, ໂດຍນຳໃຊ້ທຶນຂອງອົງການສຸພານິມິດ ສາກົນ ປະຈໍາແຂວງຫຼວງພະບາງ 225 ລ້ານກວ່າກີບ, ທຶນປະກອບສ່ວນຂອງປະຊາຊົນພາຍບ້ານ 58 ລ້ານກວ່າກີບ, ລວມມູນຄ່າການກໍ່ສ້າງທັງໝົດ 284 ລ້ານກວ່າກີບ, ໂອກາດນີ້ ທ່ານ ສຸນັນທາ ໄຊຍະສິດ ໄດ້ມີຄໍາເຫັນກ່າວມອບການກໍ່ສ້າງລະບົບນໍ້າລິນ ແລະກ່າວຮັບໂດຍ ທ່ານ ສີອາດ ປັນຍາສັກ ຮອງຫົວໜ້າຫ້ອງການສາທາລະນະສຸກເມືອງ. ຕອນທ້າຍ ທ່ານ ຫຸມແພງ ວິລະໄຊ ໄດ້ມີຄໍາເຫັນສະແດງຄວາມຂອບໃຈ ຕໍ່ອົງການສຸພານິມິດ ແລະຂະແໜງການກ່ຽວຂ້ອງ ທີ່ເຫັນຄວາມຈໍາເປັນຂອງປະຊາຊົນ ແລະໄດ້ຊອກທຶນຮອນມາຊ່ວຍເຫຼືອ ປະຊາຊົນພາຍໃນບ້ານຜາແດງ, ພ້ອມນີ້ ທ່ານໄດ້ຮຽກຮ້ອງໃຫ້ປະຊາຊົນ ພາຍຫຼັງໄດ້ນໍ້າລິນມາຊົມໃຊ້ແລ້ວ ຈົ່ງເປັນເຈົ້າການໃນການປົກປັກຮັກສາແຫຼ່ງນໍ້າໃຫ້ຊົມໃຊ້ນໍ້າໄດ້ຍາວນານ ທັງຮັບປະກັນໃຫ້ເກີດຜົນປະໂຫຍດກັບແຕ່ລະຄອບຄົວ. ຈາກນັ້ນ ໄດ້ມອບອຸປະກອນເປີດ-ປິດນໍ້າ ໃຫ້ອົງການປົກຄອງບ້ານຜາແດງ ແລະຢ້ຽມຊົມເຂດອ່າງເກັບນ້ຳຕື່ມອີກ.(ຂ່າວ:ຫຼວງພະບາງ)
ຄໍາເຫັນ