ຕາມການລາຍງານຈາກ ຫ້ອງການແຮງງານ ແລະ ສະຫວັດດີການສັງຄົມຫ້ວຍຊາຍ ແຂວງບໍ່ແກ້ວ ໃຫ້ຮູ້ວ່າ: ເນື່ອງຈາກມີຝົນຕົກໜັກເປັນເວລາຫຼາຍວັນຕິດຕໍ່ກັນໃນລະຫວ່າງ ວັນທີ່ 27-28 ກໍລະກົດ ຜ່ານມານິ້, ເຮັດໃຫ້ນໍ້າຫຼາຍສາຍຍຶ່ງໄຫຼ່ຖ້ວມເຮືອນ, ເສັ້ນທາງ, ຂົວ, ສວນປູກພືດຜັກ ແລະ ເນື້ອທີ່ທຳການຜະລິດອື່ນໆ ຂອງປະຊາຊົນເສຍຫາຍເປັນວົງກວ້າງ, ມີຫຼາຍບ້ານ, ຊຶ່ງທາງຄະນະກໍາມະການຄຸ້ມຄ້ອງໄພພິບບັດຂັ້ນເມືອງ ໄດ້ຈັດແບ່ງກັນລົງຕິດຕາມເບິ່ງຜົນເສຍຫາຍ ພ້ອມທັງຊ່ວຍເຫຼືອສຸກເສີນໃນແຕ່ລະຈຸດ ສາມາດປະເມີນຂໍ້ມູນໃນເບື້ອງຕົ້ນມີເຮືອນທີ່ຖືກຜົນກະທົບນໍ້າຖ້ວມເສຍຫາຍໜັກ ຈໍານວນ 8 ບ້ານ, ມີ 147 ຫຼັງ, ມີ 779 ຄົນ ຍິງ 315 ຄົນ, ຮ້ານອາຫານກິນດື່ມ 1 ຫຼັງ, ວັດ 1 ແຫ່ງ, ຂົວ 2 ແຫ່ງ, ຝາຍຂາດ 1 ແຫ່ງ, ເຂົ້າເປືອກ 13,581 ກິໂລ, ເຂົ້າສານ 2,650 ກິໂລ, ລົດໃຫຍ່ ກະບະ 2 ຄັນ, ລົດຈັກ 19 ຄັນ, ລົດໄຖເດິນຕາມ 2 ຄັນ, ສັດປີກ 1,496 ໂຕ, ງົວ 3 ໂຕ, ໜອງປາ, ໜອງກົບ ແລະ ເສັ້ນທາງບ້ານດອນ - ບ້ານ ດ່ານ ເຈື່ອນ 1 ຈຸດ, ໂຮງໂມ້ຫີນ, ປໍ້ານໍ້າມັນ ແລະ ອື່ນໆ. ສາມາດປະເມີນຜົນເສຍຫາຍໃນເບື້ອງຕົ້ນທັງໝົດ: 1,459,064,000 ກີບ.
ສວນເສັ້ນທາງທີ່ຖືກຜົນກະທົບບໍ່ສາມາດເດີນທາງໄປ-ມາໄດ້ ທາງພາກສ່ວນກ່ຽວຂ້ອງກໍຄືຫ້ອງການໂຍທາເມືອງ ກໍໄດ້ສົມທົບກັບ ພະແນກໂຍທາແຂວງ ໄດ້ລົງຕິດຕາມກວດກາ ແລະ ປະສານກັບບໍລິສັດທີ່ເຊັນສັນຍາຮັບເໝົາເຂົ້າແກ້ໄຂເສັ້ນທາງທີ່ຖືກຜົນກະທົບສໍາເລັດແລ້ວບາງຈຸດ ແລະ ບ່ອນທີ່ຍັງຄ້າງແມ່ນໄດ້ສືບຕໍ່ແກ້ໄຂໃຫ້ສໍາເລັດເພື່ອໃຫ້ການສັນຈອນໄປ-ມາໄດ້ເປັນປົກກະຕິ.
ທາງຄະນະກໍາມະການຄຸ້ມຄອງໄພພິບັດຂັ້ນເມືອງສືບຕໍ່ຕິດຕາມຊຸກຍູ້ປະສານສົມທົບກັບ ພາກສ່ວນກ່ຽວຂ້ອງເກັບກໍາຂໍ້ມູນຜົນເສຍຫາຍລະອຽດລາຍງານປະທານຄະນະກໍາມະການເພື່ອສະເໜີການຊ່ວຍເຫຼືອແກ້ໄຂສຸກເສີນໃນຂັ້ນຕໍ່ໄປ ແລະ ຄະນະກໍາມະການຄຸ້ມຄອງໄພພິບັດຂັ້ນແຂວງ - ຂັ້ນເມືອງ ໄດ້ໃຫ້ການຊ່ວຍເຫຼືອແກ້ໄຂສຸກເສີນເບື້ອງຕົ້ນໃຫ້ ຄອບຄົວຖືກຜົນກະທົບ ພ້ອມທັງມອບເຂົ້າສານຈ້າວ 1,760 ກິໂລ ແລະ ເຄື່ອງອຸປະໂພກ - ບໍລິໂພກ ຈໍານວນໜື່ງ ລວມມູນຄ່າ 60.280.000 ກີບ ໃຫ້ຄອບຄົວທີ່ໄດ້ຮັບຜົນກະທົບ ຢູ່ບ້ານ ນໍ້າຕອຍ ຈໍານວນ 88 ຫຼັງ.
(ຂ່າວ: ເງິນຫຼົງ ຈິດພູວົງ)
ຄໍາເຫັນ