ປະຊາຊົນເປັນນໍ້າ ກອງທັບເປັນປາ ຮ່ວມສາຍສຳພັນສ້າງສາປະເທດຊາດ ມີຄວາມເຂັ້ມແຂງ ແລະ ໝັ້ນຄົງສີວິໄລ

ຕັ້ງແຕ່ອະດີດມາ ກອງທັບໄດ້ເກີດຂຶ້ນຈາກປະຊາຊົນ ແລະ ເພື່ອປະຊາຊົນ, ລູກຫຼານຂອງປະຊາຊົນໄດ້ສະໝັກໃຈເຂົ້າຮັບໃຊ້ຊາດ ເຂົ້າຮ່ວມໃນກອງທັບ ເພື່ອປົກປັກຮັກສາຜືນແຜ່ນດິນ, ປົກປ້ອງຄວາມສະຫງົບສຸກ ແລະ ຮັກສາຊີວິດຊັບສິນຂອງປະຊາຊົນ, ທະຫານບໍ່ແມ່ນຄົນທີ່ຢູ່ໄກຈາກປະຊາຊົນ ແຕ່ແມ່ນລູກຫຼານ ພີ່ນ້ອງ ແລະ ສະມາຊິກຄົນໜຶ່ງຂອງປະຊາຊົນ. ເພາະສະນັ້ນ ຄວາມທຸກສຸກຂອງປະຊາຊົນກໍຄືຄວາມທຸກສຸກຂອງກອງທັບ. ໃນຍາມປະເທດຊາດພົບຄວາມຫຍຸ້ງຍາກ ແລະ ໄພຂົ່ມຂູ່ຈາກພາຍນອກ ກອງທັບແມ່ນກຳລັງສຳຄັນທີ່ຢືນຢູ່ແຖວໜ້າ ທີ່ ຍອມເສຍສະຫຼະຄວາມສຸກສ່ວນຕົວ ຍອມຫ່າງໄກຄອບຄົວ ຍອມຕໍ່ສູ້ກັບຄວາມລຳບາກ ເພື່ອຮັກສາຊາດ ແລະ ປະຊາຊົນ. ຢ່າງໃດກໍຕາມ ກອງທັບ ຈະສາມາດຢືນຢູ່ໄດ້ຢ່າງໝັ້ນຄົງ ກໍຕ້ອງອາໄສກຳລັງໃຈຈາກປະຊາຊົນ ແລະ ການສົ່ງເສີມ, ການສະໜັບສະໜູນຈາກທຸກຊັ້ນຄົນ ແມ່ນພະລັງອັນໃຫຍ່ຫຼວງທີ່ຊ່ວຍໃຫ້ກອງທັບ ມີຄວາມກ້າຫານ ແລະ ມີກຳລັງໃຈໃນການປະຕິບັດໜ້າທີ່.

ບໍ່ພຽງແຕ່ໃນຍາມສົງຄາມ ຫຼື ຍາມມີໄພອັນຕະລາຍເທົ່ານັ້ນ ກອງທັບຍັງມີບົດບາດສຳຄັນໃນຍາມສັນຕິພາບອີກດ້ວຍ. ກອງທັບໄດ້ຮ່ວມກັບປະຊາຊົນໃນການພັດທະນາບ້ານເມືອງ ຊ່ວຍກໍ່ສ້າງຖະໜົນ, ໂຮງຮຽນ, ສຸກສາລາ ຊ່ວຍແຮງງານໃນການຜະລິດ ຊ່ວຍປະຊາຊົນໃນຍາມເກີດໄພພິບັດ ເຊັ່ນ: ນໍ້າຖ້ວມ, ພາຍຸ, ໄຟໄໝ້ ຫຼື ເຫດການສຸກເສີນຕ່າງໆ. ເມື່ອປະຊາຊົນລຳບາກ ກອງທັບກໍລົງໄປຊ່ວຍ; ເມື່ອບ້ານເມືອງຕ້ອງການກຳລັງ ກອງທັບກໍຢືນຢູ່ຂ້າງປະຊາຊົນສະເໝີ.

ປະຊາຊົນເອງກໍມີບົດບາດສຳຄັນຕໍ່ກອງທັບ ເປັນຜູ້ສ້າງພື້ນຖານ, ສ້າງກໍາລັງຄົນ ສ້າງກຳລັງໃຈ ແລະ ສ້າງພະລັງຮ່ວມໃຫ້ກອງທັບ, ເປັນຫູເປັນຕາ ຊ່ວຍຮັກສາຄວາມສະຫງົບ ຊ່ວຍແຈ້ງຂ່າວ ຊ່ວຍປົກປ້ອງບ້ານເມືອງຮ່ວມກັນ ຖ້າກອງທັບມີປະຊາຊົນຮັກແພງ ເຊື່ອຖື ແລະ ສະໜັບສະໜູນ ກອງທັບກໍຈະມີຮາກຖານທີ່ໝັ້ນຄົງ. ຄວາມສຳພັນລະຫວ່າງກອງທັບກັບປະຊາຊົນຈຶ່ງບໍ່ແມ່ນຄວາມສຳພັນທຳມະດາ ແຕ່ແມ່ນຄວາມສຳພັນແບບພີ່ນ້ອງ ແບບລູກຫຼານກັບພໍ່ແມ່ ແລະ ແບບຜູ້ຮ່ວມຊາຕາກຳດຽວກັນ. ທະຫານທີ່ດີຕ້ອງຮັກປະຊາຊົນ ເຄົາລົບປະຊາຊົນ ຟັງສຽງປະຊາຊົນ ແລະ ຊ່ວຍເຫຼືອປະຊາຊົນດ້ວຍຄວາມຈິງໃຈ. ຂະນະດຽວກັນ ປະຊາຊົນ ກໍຮັກແພງກອງທັບ ເຂົ້າໃຈພາລະໜ້າທີ່ຂອງກອງທັບ ແລະ ຮ່ວມມືໃນການຮັກສາຄວາມສະຫງົບປອດໄພຂອງຊາດ.

ໃນສະພາບການປັດຈຸບັນ ບ້ານເມືອງກຳລັງພັດທະນາ ແລະ ໂລກມີການປ່ຽນແປງຢ່າງວ່ອງໄວ. ຄວາມທ້າທາຍມີຫຼາຍຮູບແບບ ທັງດ້ານຄວາມປອດໄພ ເສດຖະກິດ ສັງຄົມ ແລະ ໄພພິບັດທາງທຳມະຊາດ. ດັ່ງນັ້ນ ການສ້າງຄວາມສາມັກຄີລະຫວ່າງກອງທັບກັບປະຊາຊົນຈຶ່ງຍິ່ງມີຄວາມຈຳເປັນ. ກອງທັບຕ້ອງປັບປຸງຕົນເອງໃຫ້ທັນສະໄໝ ມີວິໄນ ມີຄວາມຮູ້ ມີຈິດໃຈຮັບໃຊ້ ແລະ ຢູ່ໃກ້ຊິດກັບປະຊາຊົນ. ສ່ວນປະຊາຊົນກໍຄວນຮ່ວມກັນຮັກສາຊາດ ຮັກສາຄວາມສະຫງົບ ແລະ ໃຫ້ກຳລັງໃຈແກ່ຜູ້ທີ່ກຳລັງປະຕິບັດໜ້າທີ່.