 |
ທ່ານ ບຸນຈັນ ສີວົງພັນ ກຳມະການສູນກາງພັກ ເລຂາພັກແຂວງ ເຈົ້າແຂວງ
ຊຽງຂວາງ ໄດ້ກ່າວຕ້ອນຮັບ ແລະ ເປິດບັ້ນດຳເນີນຊີວິດການເມືອງທ້າຍສະໄໝ ຂອງຄະນະບໍລິຫານງານພັກແຂວງຊຽງຂວາງ ຊຶ່ງທ່ານໄດ້ກ່າວວ່າ: ປະຕິບັດຕາມກົດລະບຽບ ຂອງພັກປະຊາຊົນປະຕິວັດລາວ ສະໄໝທີ XI ຂອງພັກ ແລະ ແຜນດຳເນີນງານຂອງຄະນະບໍລິຫານງານພັກແຂວງຊຽງຂວາງ ສະໄໝທີVIII ກ່ຽວກັບການດຳເນີນຊີວິດການເມືອງທ້າຍສະໄໝຂອງຄະນະບໍລິຫານງານພັກແຂວງ ແລະ ປະຕິບັດຕາມຄໍາສັ່ງ ຂອງຄະນະເລຂາທິການສູນກາງພັກ ສະບັບເລກທີ 411/ຄລສພ, ລົງວັນທີ 8 ສິງຫາ 2023 ແລະ ຄໍາແນະນໍາ ຂອງຄະນະກວດກາສູນກາງພັກ ສະບັບເລກທີ 285/ຄກສພ, ລົງວັນທີ 15 ກັນຍາ 2023 ກ່ຽວກັບການດໍາເນີນຊີວິດການເມືອງທ້າຍສະໄໝ ກອງປະຊຸມໃຫຍ່ 3 ຂັ້ນຂອງພັກ. ກອງປະຊຸມດໍາເນີນຊີວິດການເມືອງ ທ້າຍສະໄໝທີ VIII ຂອງຄະນະບໍລິຫານງານພັກແຂວງ ແລະ ທາບທາມບຸກຄະລາກອນອອກສະໝັບຮັບເລືອກຕັ້ງເຂົ້າໃນຄະນະບໍລິຫານງານພັກແຂວງ ສະໄໝທີ IX ຮອບທີ III. ຈະໄດ້ດຳເນີນເປັນ 2 ວາລະຄື: ວັນທີ 7 ສິງຫາ ດໍາເນີນຊີວິດການເມືອງ ພາຍໃນຄະນະບໍລິຫານງານພັກແຂວງ ທ້າຍສະໄໝທີ VIII, ຈະໄດ້ຮັບຟັງການຜ່ານຮ່າງບົດສໍາຫຼວດການນໍາພາລວມ ຂອງຄະນະບໍລິຫານງານພັກແຂວງ ສະໄໝທີ VIII; ຮັບຟັງການມີຄໍາເຫັນເຈາະຈີ້ມ ຈາກຂັ້ນເທິງ ຕໍ່ຮ່າງບົດສໍາຫຼວດການນໍາພາລວມ ສະໄໝທີ VIII, ການປະກອບຄໍາເຫັນຂອງບັນດາສະຫາຍ ຂອງຄະນະບໍລິຫານງານພັກແຂວງ ຕໍ່ບົດສຳຫຼວດ; ໃນວັນທີ 8 ສິງຫາ ສືບຕໍ່ດໍາເນີນຊີວິດການເມືອງພາຍໃນຄະນະບໍລິຫານງານພັກແຂວງ, ສະຫຼຸບຕີລາຄາຜົນສໍາເລັດໂດຍຫຍໍ້ ຜົນຂອງການດໍາເນີນຊີວິດການເມືອງ ທ້າຍສະໄໝທີ່ VIII ລົງເລິກປຶກສາຫາລືວຽກງານບຸກຄະລາກອນ ແລະ ໃນວັນທີ 9 ສິງຫາ ຈະດໍາເນີນກອງປະຊຸມທາບທາມບຸກຄະລາກອນ ຜູ້ອອກສະໝັກເລືອກຕັ້ງເຂົ້າໃນຄະນະບໍລິຫານງານພັກແຂວງ ສະໄໝທີ IX ຮອບທີ III ແລະ ຜ່ານຮ່າງລາຍງານການເມືອງ 2 ພາກ, ຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ່ 10 ຂໍຮຽກຮ້ອງມາຍັງ ບັນດາສະຫາຍຄະນະບໍລິຫານງານພັກແຂວງ ຈົ່ງເຊີດຊູຄວາມຮັບຜິດຊອບການເມືອງຂອງຕົນ ເອົາໃຈໃສ່ຮັບຟັງການລາຍງານ, ການເຈາະຈິ້ມ, ການໃຫ້ທິດຊີ້ນນຳຈາກຂັ້ນເທິງ ເພື່ອຄົ້ນຄວ້າ ແລະ ເສີມຂະຫຍາຍສິດປະຊາທິປະໄຕ ຂອງຕົນຢ່າງເຕັມສ່ວນ ຕາມລັດຖະທຳມະນູນ ແລະ ກົດໝາຍໄດ້ກຳນົດໄວ້ ສຸມສະຕິປັນຍາ ປະກອບຄຳຄິດ ຄຳເຫັນໃສ່ເນື້ອໃນບົດສຳຫຼວດການນຳພາລວມໃຫ້ເລິກເຊິ່ງ ແລະ ປະຕິບັດຢ່າງເຂັ້ມງວດ, ຕິຊົມຕົນເອງ, ຕິຊົມຊຶ່ງກັນ ແລະ ກັນ ດ້ວຍຄວາມຈິງໃຈ ບົນລະບຽບຫຼັກການຂອງພັກ, ເອົາໃຈໃສ່ຕີລາຄາ, ວິເຄາະວິໄຈ ໃຫ້ເຫັນໄດ້ຈຸດດີ, ຈຸດອ່ອນ-ຂໍ້ຄົງຄ້າງ ຕໍ່ການນຳພາລວມ ແລະ ບຸກຄົນພາຍໃນຄະນະບໍລິຫານງານພັກແຂວງ ທີ່ຈະຕ້ອງໄດ້ພ້ອມກັນສືບຕໍ່ສົ່ງເສີມຈຸດດີ ແລະ ແກ້ໄຂຈຸດອ່ອນ ໃຫ້ໄດ້ຮັບຜົນດີ, ມີວິທະຍາສາດ ຕິດແທດກັບໜ້າທີ່ການເມືອງຂອງຕົນ ທີ່ພັກ-ລັດ ແລະ ປະຊາຊົນມອບໝາຍໃຫ້ ໃຫ້ມີຜົນສຳເລັດຢ່າງຈົບງາມ. ກອງປະຊຸມຈະໄດ້ດຳເນີນໄປເປັນເວລາ 3 ວັນ ຈິ່ງຈະສຳເລັດ.
(ຂ່າວ: ບຸນມີແສງທຸມມີ)
ຄໍາເຫັນ