ເປີດໃຫ້ບໍລິການແລ້ວ ປໍ້ານໍ້າມັນເຊື້ອໄຟ ວິພາວະດີ

ພິທີເປີດບໍລິການປໍ້ານໍ້າມັນເຊື້ອໄຟ ວິພາວະດີ ໄດ້ຈັດຂຶ້ນໃນວັນທີ 6 ເມສາຜ່ານມາ, ໂດຍໃຫ້ກຽດເຂົ້າຮ່ວມຂອງທ່ານ ກອງແກ້ວ ໄຊສົງຄາມ ເຈົ້າແຂວງ ບໍລິຄຳໄຊ ປະທານຄະນະກຳມະການຄູ້ມຄອງການລົງທຶນຂັ້ນແຂວງ, ທ່ານ ຈັນທະກິ່ງ ອິນທະວົງ ຮອງຜູ້ອຳນວຍການ ລັດວິສາຫະກິດນໍ້າມັນເຊື້ອໄຟລາວ, ມີການນຳຂັ້ນແຂວງ ຜູ້ປະກອບການທຸລະກິດເຂົ້າຮ່ວມ.
    ທ່ານ ນາງ ພັດສອນ ໄຊຍະວົງສາ ເຈົ້າຂອງທຸລະກິດປໍ້ານໍ້າມັນເຊື້ອໄຟ ວິພາວະດີ ໄດ້ລາຍງານໃຫ້ຮູ້ວ່າ: ປໍ້ານຳມັນເຊື້ອໄຟ ວິພາວະດີ ມີສະຖານທີ່ຕັ້ງຢູ່ບ້ານໂພນໄຊ ໃຈກາງເທດສະບານເມືອງ ປາກຊັນ ຕິດກັບເສັ້ນທາງ ເລກທີ 13 ໃຕ້. ເລີ່ມກໍ່ສ້າງມາແຕ່ຕົ້ນປີ 2023 ມາຮອດປັດຈຸບັນແມ່ນສຳເລັດ 100%, ໂດຍການເຊົ່າສຳປະທານທີ່ດິນຂອງລັດ ອາຍຸສັນຍາ 25 ປີ ເລີ່ມແຕ່ເດືອນພຶດສະພາ 2022 ຕາມບົດບັນທຶກສັນຍາ. ຈຸດປະສົງກໍ່ເພື່ອຕອບສະໜອງນໍ້າມັນເຊື້ອໄຟໃຫ້ລູກຄ້າລາຍໃຫຍ່ເປັນຕົ້ນແມ່ນຜູ້ປະກອບການທຸລະກິດ ແລະ ລູກຄ້າລາຍຍ່ອຍບໍລິການຊົມໃຊ້ໂດຍກົງ, ສ້າງວຽກເຮັດງານທຳໃຫ້ປະຊາຊົນ, ຍູ້ແຮງແຜນພັດທະນາເສດຖະກິດ-ສັງຄົມຂອງເມືອງ, ກໍ່ຄືແຜນພັດທະນາເສດຖະກິດ-ສັງຄົມແຂວງ ໂດຍການສຳລະອາກອນລາຍໄດ້ເຂົ້າງົບປະມານຂອງລັດ. ປໍ້ານໍ້າມັນເຊື້ອໄຟ ວິພາວະດີ ຕັ້ງຢູ່ແຄມທາງເລກທີ 13 ໃຕ້ ໃຈກາງເທດສະບານແຂວງ ແລະ ມີສີ່ງເອື້ອອຳນວຍຄວາມສະດວກຫຼາຍດ້ານ ເປັນຕົ້ນແມ່ນມີສະຖານທີ່ຈອດລົດກວ້າງຂວາງ, ຫ້ອງນໍ້າສະອາດ, ມີຮ້ານອາຫານ, ຮ້ານກາເຟ ແລະ ຮ້ານສະດວກຊື້ ໄວ້ບໍລິການລູກຄ້າ, ຈະໄດ້ເປີດບໍລິການຕະຫຼອດ 24 ຊົ່ວໂມງ. ໃນຕອນທ້າຍຂອງພິທີທ່ານ ນາງ ພັດສອນ ໄຊຍະວົງສາ ຮ່ວມກັບ ການນຳແຂວງ ແລະ ແຂກຖືກເຊີນໄດ້ຕັດແທບຜ້າ ເພື່ອເປັນການຢັ້ງຢືນເປີດບໍລິການປໍ້ານໍ້າມັນເຊື້ອໄຟ ວິພາວະດີເປັນທາງການ.
(ຂ່າວ-ພາບ: ສາຍສະໝອນ)