ເປີດໂຮງງານປຸງແຕ່ງຜະລິດຕະພັນສັດນໍ້າ ບໍລິສັດແມ່ຂອງອາຫານສົດ ຈໍາກັດ

ທ່ານ ຊູ ຢຸນ ປະທານ ບໍລິສັດວິທະຍາສາດ ແລະ ເຕັກໂນໂລຊີການປະມົງ ເຊີນເຈິ້ນ ຈຳກັດ ແລະ ແຂກຖືກເຊີນເຂົ້າຮ່ວມ

ໂຮງງານດັ່ງກ່າວ ເປັນການຮ່ວມມືລົງທຶນ ຂອງບໍລິສັດວິທະຍາສາດ ແລະ ເຕັກໂນໂລຊີການປະມົງ ເຊີນເຈີ້ນ ຈໍາກັດ ແລະ ເປັນໜຶ່ງຜົນສໍາເລັດອັນສໍາຄັນ ໃນການພັດທະນາວຽກງານການປະມົງຂອງ ສປປ ລາວ. ບໍລິສັດດັ່ງກ່າວ ຕັ້ງຢູ່ໃນເຂດອ່າງແມ່ນໍ້າຂອງຕອນລຸ່ມ ທີ່ເປັນແຫຼ່ງນ້ຳທີ່ອຸດົມສົມບູນ ແລະ ຍັງເປັນແຫຼ່ງຊັບພະຍາກອນຫຼັກ ຕໍ່ການດຳລົງຊີວິດ ຂອງປະຊາຊົນບັນດາເຜົ່າ ແລະ ປະກອບສ່ວນເຂົ້າໃນການພັດທະນາເສດຖະກິດຂອງທ້ອງຖິ່ນ ພ້ອມທັງ ຍັງເປັນທ່າແຮງອັນສໍາຄັນ ໃນການພັດທະນາອຸດສາຫະກໍາການປະມົງ.

ການເປີດດໍາເນີນການຜະລິດຂອງໂຮງງານປຸງແຕ່ງນີ້ ແມ່ນເປັນຂີດໝາຍສໍາຄັນ ຕໍ່ກັນການຊຸກຍູ້ສົ່ງເສີມ ແລະ ພັດທະນາວຽກງານຂະແໜງການປະມົງ ຂອງ ສປປ ລາວ ເຊິ່ງການດໍາເນີນງານຂອງໂຮງງານດັ່ງກ່າວ ບໍ່ພຽງແຕ່ຈະປັບປຸງລະບົບຕ່ອງໂສ້ອຸດສາຫະກໍາການປະມົງຂອງ ສປປ ລາວ, ແຕ່ຍັງເປັນການສ້າງໂອກາດການຈ້າງງານໃນທ້ອງຖິ່ນຈໍານວນຫຼາຍ ແລະ ຊຸກຍູ້ທຸລະກິດປິ່ນອ້ອມທີ່ກ່ຽວຂ້ອງ. ສິ່ງສໍາຄັນກວ່ານັ້ນ, ບໍລິສັດ ແມ່ຂອງອຸດສາຫະກຳການປະມົງ ຈຳກັດ ແລະ ຄູ່ຮ່ວມລົງທຶນຕ່າງໆ ຈະຊ່ວຍສ້າງຊັບພະຍາກອນມະນຸດ ໃຫ້ແກ່ແຮງງານ ແລະ ປະຊາຊົນໃນທ້ອງຖິ່ນໂດຍຜ່ານການຝຶກອົບຮົມເຕັກນິກ-ວິຊາການ ເພື່ອວາງພື້ນຖານທີ່ເຂັ້ມແຂງ ໃຫ້ແກ່ການພັດທະນາອຸດສາຫະກຳການປະມົງຂອງ ສປປ ລາວ ໃນອານາຄົດ ໃຫ້ມີຄວາມກ້າວໜ້າ ແລະ ຍືນຍົງ.

ແຫຼ່ງຂ່າວທີ່ປຶກສາບໍລິສັດໃຫ້ຮູ້ວ່າ: ແຜນໄລຍະທີ 2 ຈະສ້າງສວນສາທິດມາດຕະຖານປາສະຫວາຍລາວໃນເນື້ອທີ່ 2,861.79 ເຮັກຕາ, ໃນມູນຄ່າລົງທຶນກໍ່ສ້າງພື້ນຖານໂຄງລ່າງຄາດວ່າ 400 ລ້ານໂດລາສະຫະລັດ, ພາຍຫຼັງສ້າງສຳເລັດເນື້ອທີ່ໜອງລ້ຽງປາ 1,975 ເຮັກຕາ. ຄາດວ່າການຜະລິດປາສະຫວາຍຈະບັນລຸ 300 ໂຕນ/ເຮັກຕາ, 500,000 ໂຕນ/ປີ. ນອກນີ້ ຈະມີການຜະລິດຫົວອາຫານປາເພື່ອສະໜອງໃຫ້ແກ່ການລ້ຽງປາປະມານ 700,000ໂຕນ/ປີ. ຂໍ້ມູນຊີ້ແຈງອີກວ່າ:ການປຸງແຕ່ງຜະລິດຕະພັນສັດນ້ຳປາສະຫວາຍແຊ່ແຂງຈະສົ່ງອອກໄປ ສປ ຈີນ, ເອີຣົບ ແລະ ປະເທດພາກພື້ນອຶ່ນໆ ກາຍເປັນລະບົບຕ່ອງໂສ້ອຸດສະຫະກຳຄົບວົງຈອນຍູ້ແຮງສົ່ງເສີມເຂົ້າໃນການປັບປຸງຄຸນນະພາບ ແລະ ປະສິດທິຜົນອຸດສະຫະກຳການປະມົງຂອງ ສປປ ລາວ

(ຂ່າວ: ເຂັມມະໄລ ສົນດາວັນ)