 |
ທ່ານ ນາງ ດີ່ນ້າ ສົມສະໝຸດ ຫົວໜ້າສາຍງານ ວຽກການຕະຫຼາດ ບໍລິສັດສະມໍລບີ ໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນ ໃນວັນທີ 30 ຕຸລາ ຜ່ານມານີ້ ທີ່ເດີ່ນພະທາດຫຼວງວຽງຈັນ ວ່າ: ປັດຈຸບັນບໍລິສັດດສະມໍລບີ ມີຄວວາມພ້ອມຮອບດ້ານໃນການເກັບມ້ຽນ, ອະນາໄມ ແລະ ຄ່ຽນຖ່າຍຂີ້ເຫຍື້ອໃນໄລຍະງານບຸນນະມັັດສະການພະທາດຫຼວງວຽງຈັນ ປະຈໍາປີ 2025 ເລີ່ມແຕ່ວັັນທີ 1-5 ພະຈິກ 2025 ແລະ ຄາດວ່າຈະເກັບມ້ຽນຂີ້ເຫຍື້ອພາຍໃນງານບຸນໃຫ້ສໍາເລັດຮອດວັນທີ 9 ພະຈິກ 2025. ປັດຈຸບັນ ໄດ້ມີການກຽມຄວາມພ້ອມຮອບດ້ານບໍ່ວ່າຈະເປັນດ້ານອຸປະກອນເຊັ່ນ: ຝອຍ, ອຸປະກອນຕ່າງໆທີ່ອໍານວຍຄວາມສະດວກໃຫ້ແກ່ພະນັກງານອະນາໄມ, ພາຫະນະລົດ ໂດຍໄດ້ເພີ່ມການນໍາເຂົ້າລົດໃໝ່ໃຫຍ່ກວ່າປີຜ່ານມາ ຈໍານວນ 5 ຄັນ ເປັນລົດຂະໜາດ 12 ແມັດກ້ອນ, 20 ແມັດກ້ອນ ເພື່ອເຂົ້າມາຮັບໃຊ້ບໍລິຫານການເກັບຂີ້ເຫຍື້ອໄປຖິ້ມຢູ່ຫຼັກ 32. ໃນນັ້ນ, ຍັງມີຄວາມພ້ອມດ້ານການປະສານງານກັບພາກສ່ວນທີ່ກ່ຽວຂ້ອງເພື່ອອໍານວຍຄວາມສະດວກໃນການນໍາເອົາພາຫະນະເຂົ້າມາໃນແຕ່ລະມື້ຂອງງານບຸນ ແລະ ແຈ້ງໃຫ້ທາງຮ້ານຄ້າປິດຮ້ານຕາມໂມງ ທີ່ກໍານົດໄວ້ ເພື່ອສະດວກສະບາຍໃຫ້ແກ່ທີມງານອະນາໄມ.
ການເກັບມ້ຽນຂີ້ເຫຍື້ອໃນປີນີ້ ຍັງຈະມີການເພີ່ມຫຼາຍຈໍານວນຖ້ຽວຂົນສົ່ງຂີ້ເຫຍື້ອ ໃນວັນທີ 4-5 ຕຸລາ. ສ່ວນການອະນາໄມ ຈະມີ 3 ຕອນຄື: ຕອນເຊົ້າ, ບ່າຍ, ເດິກ ໂດຍມີການຄ່ຽນຖ່າຍເຄື່ອນຍ້າຍຂີ້ເຫຍື້ອດ້ວຍລົດໄຟຟ້ານ້ອຍ 2 ຄັນ ເພື່ອລໍຖ້າລົດມາຮັບໄປຖິ້ມ ໂດຍມີຈຸດໄວ້ຂີ້ເຫຍື້ອສະເພາະ ແລະ ຈະມີລົດມາຮັບເອົາຂີ້ເຫຍື້ອໃນຕອນແລງ ແລະ ຕອນເດິກ. ປີນີ້, ບໍລິສັດສະມໍລບີ ແມ່ນໄດ້ນໍາເອົາຖັັັງຂີ້ເຫຍື້ອ 300 ຖັງ ມາວາງຢູ່ແຕ່ລະຈຸດຂອບເຂດໃນງານບຸນ ເພື່ອໃຫ້ຜູ້ມາທ່ຽວງານບຸນໄດ້ຖິ້ມຂີ້ເຫຍື້ອໃຫ້ຖືກຕ້ອງ, ຮັກສາຄວາມສະອາດພາຍໃນງານບຸນ, ໄດ້ວາງກຳລັງພະນັກງານໃນການມາອະນາໄມ 280 ຄົນ ຊຶ່ງເພີ່ມຈາກປີກາຍມີພຽງ 250 ຄົນ. ເຂດທີ່ຮັບຜິດຊອບມີ 3 ເຂດ ຄື: ເຂດສະໜາມ ຫຼວງ, ພະທາດກົມມະລຽນ ຫຼື ຂອບເຂດດ້ານໃນເດີ່ນພະທາດຫຼວງ ແລະ ເຂດນອກກົມກົມມະລຽນ. ນອກຈາກນັ້ນ, ໃນໄລຍະງານບຸນ ບໍລິສັດ ສະມໍລບີ ຍັງໄດ້ຕັ້ງຈຸດຫ້ອງໂຄສະນາປະຊາສໍາພັນ ເພື່ອໃຫ້ປະຊາຊົນທີ່ມາທ່ຽວງານບຸນມີການຖິ້ມຂີ້ເຍື້ອໃຫ້ຖືກຈຸດ ຫຼື ຖືກຖັງຕາມທີ່ກໍານົດໃຫ້ ແລະ ວາງໄວ້, ທັງຮູ້ຈັກຮັກສາຄວາມສະອາດຊ່ວຍກັນ ເພື່ອເປັນສິ່ງອໍານວຍຄວາມສະດວກໃຫ້ແກ່ພະນັກງານເກັບມ້ຽນ ແລະ ຂົນສົ່ງໄດ້ຫຼາຍທີ່ສຸດ. ນອກນັ້ນ, ພາຍໃນຫ້ອງໂຄສະນາປະຊາສໍາພັນ ຍັງມີການໃຫ້ຄວາມຮູ້ກ່ຽວກັບການຮັກສາສິ່ງແວດລ້ອມ, ການຫຼິ້ນກິດຈະກໍາຕ່າງໆ, ການແຈກຖົງຜ້າ, ໝວກ, ຈອກນໍ້າ ແລະ ອື່ນໆ. ເພື່ອໃຫ້ຜູ້ເຂົ້າມາທ່ຽວງານບຸນໄດ້ຮ່ວມຫຼິ້ນກິດຈະກໍາ. ສິ່ງສໍາຄັນຍັງມີການໃຫ້ບໍລິການສໍາລະຄ່າບໍລິການ ຂີ້ເຫຍື້ອ ຫຼື ຢາກສອບຖາມບັນຫາຂີ້ເຫຍື້ອ, ຢາກລົງທະບຽນເກັບມ້ຽນຂີ້ເຫຍື້ອໃນບ້ານເຮືອນ ກໍສາມາດມາສອບຖາມໄດ້ ຫຼື ຕິດຕໍ່ ເບີໂທສາຍດ່ວນ 1436 ຫຼື 020 94442229.
ທ່ານ ນາງ ດີ່ນ້າ ສົມສະໝຸດ ຍັງຮຽກຮ້ອງໃຫ້ຜູ້ມາທ່ຽວງານບຸນ ຈົ່ງຮັກສາຄວາມສະອາດຊ່ວຍກັນ ໂດຍສະເພາະການຖິ້ມຂີ້ເຫຍື້ອໃຫ້ຖືກບ່ອນ ແລະ ຖືກຈຸດຕາມທີ່ກໍານົດໄວ້, ລະວັງຂີ້ເຫຍື້ອທີ່ເປັນອັນຕະລາຍເຊັ່ນ: ໄມ້ສຽບ, ແກ້ວ ແລະ ອື່ນໆ. ເວລາຖິ້ມຂີ້ເຫຍື້ອໃຫ້ມັດປາກຖົງໃຫ້ດີ ເພື່ອບໍ່ໃຫ້ເກີດອັນຕະລາຍຕໍ່ພະນັກງານເກັບມ້ຽນ ແລະ ຂໍຝາກມາຍັງບັນດາຫ້າງຮ້ານ ຫຼື ຜູ້ປະກອບການທີ່ເຂົ້າມາວາງສະແດງ ແລະ ຂາຍສິນຄ້າພາຍໃນງານບຸນ ໃຫ້ປະຕິບັດຕາມກົດລະບຽບ, ໂມງປິດຮ້ານຕາມທາງຄະນະກໍາມະການຈັດງານບຸນວາງອອກ. ໃນນັ້ນ, ຍ້ອນເຫັນໄດ້ວ່າໃນໄລຍະງານບຸນດັ່ງກ່າວຜ່ານມາ, ກໍຍັງມີສິ່ງທ້າທາຍເປັນຕົ້ນຜູ້ມາວາງຂາຍສິນຄ້າບໍ່ປິດຮ້ານຕາມໂມງກໍຍັງມີ. ສະນັ້ນ, ຮຽກຮ້ອງໄປຍັງຮ້ານຄ້າຕ່າງໆ ທີ່ມາວາງຂາຍ-ຈໍາໜ່າຍສິນຄ້າ ຈົ່ງປິດຮ້ານຕາມການແຈ້ງການກໍານົດໄວ້ ເພື່ອອໍານວຍຄວາມສະດວກໃຫ້ແກ່ພະນັກງານອະນາໄມ, ເກັບມ້ຽນຂີ້ເຫຍື້ອຕະຫຼອດໄລຍະງານບຸນ.
ຄໍາເຫັນ