 |
ໃນພິທີ, ທ່ານ ແສງສາທິດ ພິມເມືອງ ປະທານຄະນະກໍາມະການປົກຄອງເມືອງຈັນທະບູລີ ທັງເປັນປະທານຈັດງານບຸນອອກພັນສາປະວໍຣະນາ ແລະ ບຸນຊ່ວງເຮືອປະເພນີ ປະຈໍາປີ 2026 ທີ່ທ່າວັດຈັນ ເມືອງຈັນທະບູລີ ກ່າວວ່າ: ບຸນອອກພັນສາປະວໍຣະນາ ແລະ ຊ່ວງເຮືອປະເພນີ ທີ່ທ່າວັດຈັນ ເມືອງຈັນທະບູລີ ນວ ແມ່ນຮີດ 12 ຄອງ 14 ແລະ ແມ່ນຮີດຄອງປະເພນີອັນດີງາມຂອງຊາດລາວເຮົາ ທີ່ໄດ້ສືບທອດກັນມາແຕ່ບູຮານນະການ, ຊຶ່ງມີປະຫວັດຄວາມເປັນມາຍາວນານ, ຕາມການເລົ່າຂານສືບຕໍ່ກັນມາ ແຕ່ສະໄໝອານາຈັກລາວລ້ານຊ້າງ, ບາງທ່ານກໍເວົ້າວ່າມີມາແຕ່ສະໄໝເຈົ້າສຸລິຍະວົງ, ບາງທ່ານກໍເວົ້າວ່າມີມາແຕ່ເລື່ອງກຳພ້າຜີນ້ອຍ ແຕ່ກໍຍັງບໍ່ທັນຊັດເຈນວ່າມີມາແຕ່ສະໄໝໃດແທ້, ແຕ່ເຖິງຢ່າງໃດກໍຕາມ ພວກເຮົາກໍຢືນຢັນວ່າບຸນອອກພັນສາປະວໍຣະນາ ແລະ ຊ່ວງເຮືອປະເພນີ ແມ່ນຮີດຄອງປະເພນີອັນດີງາມຂອງຊາດລາວເຮົາ ທີ່ສືບທອດກັນມາໄດ້ຫຼາຍເຊັ່ນຄົນແລ້ວ.
 |
ການແຂ່ງຂັນຊ່ວງເຮືອ ທີ່ທ່າວັດຈັນ ໄດ້ຈັດຂຶ້ນພາຍຫຼັງມື້ບຸນອອກພັນສາຂອງທຸກໆປີ ເປັນກິລາທາງໜ້ານໍ້າປະເພດໜຶ່ງ ຈັດຂຶ້ນເພື່ອເປັນການສ້າງໂອກາດໃຫ້ປະຊາຊົນໄດ້ມາພົບປະເພື່ອນມິດສະຫາຍ, ຍາດຕິພີ່ນ້ອງທີ່ມາຈາກທົ່ວສາລະທິດ, ໄດ້ມາພັກຜ່ອນຢ່ອນໃຈພາຍຫຼັງສຳເລັດການເກັບກູ້ຜົນຜະລິດ. ນອກຈາກນັ້ນ, ຍັງເປັນໂອກາດໃຫ້ປະຊາຊົນໄດ້ເຕົ້າໂຮມຄວາມສາມັກຄີ ຊຶ່ງກັນ ແລະ ກັນ, ທັງເປັນການສ້າງເງື່ອນໄຂໃຫ້ຊາວຄ້າຂາຍໄດ້ແລກປ່ຽນບົດຮຽນ ແລະ ຜົນຜະລິດ ຊຶ່ງກັນ ແລະ ກັນ ພາຍຫຼັງແຕ່ລະຄອບຄົວໄດ້ສຸມໃສ່ການຜະລິດໃນໄລຍະເຂົ້າພັນສາ 3 ເດືອນ.
 |
ເພື່ອເຮັດໃຫ້ບຸນອອກພັນສາປະວໍຣະນາ ແລະ ຊ່ວງເຮືອປະເພນີທີ່ທ່າວັດຈັນ ແຕ່ລະປີມີຄວາມປອດໄພ, ສະດວກສະບາຍສໍາເລັດຕາມຄາດໝາຍທີ່ວາງໄວ້, ກ່ອນຈະຈັດງານບຸນດັ່ງກ່າວທຸກໆປີ, ເຖົ້າແກ່ບູຮານໄດ້ຈັດພິທີຄອບໄຄວ່, ຂໍພອນ, ຂໍນໍ້າຈາກເຈົ້າແມ່ຄົງຄາ, ເຈົ້າແຫ່ງບາດານເມືອງພະຍານາກ, ຂໍພອນຈາກເຈົ້າຖິ່ນ, ເຈົ້າຖານລຸກຂະເທວະດາ ແລະ ສິ່ງສັກສິດທັງປວງໃຫ້ປົກປ້ອງຄຸ້ມຄອງ, ເປັນສີຣິມຸງຄຸນໃຫ້ບຸນຊ່ວງເຮືອ ກໍຄືປະເທດຊາດບ້ານເມືອງ, ປະຊາຊົນມີຄວາມສະຫງົບປອດໄພ, ຢູ່ຊຸ່ມກິນເຢັນຈະເລີນກ້າວໜ້າ.
ສໍາລັບ ປີ 2026 ທີ່ເມືອງຈັນທະບູລີ ໃນນາມເປັນເມືອງເຈົ້າພາບ ກໍໄດ້ສົມທົບກັບບັນດາເມືອງໃກ້ຄຽງຄື: ເມືອງສີສັດຕະນາກ ແລະ ເມືອງສີໂຄດຕະບອງ ແລະ ພາກສ່ວນກ່ຽວຂ້ອງຕ່າງໆຂັ້ນ ນວ ກໍໄດ້ເຮັດຄືກັນກັບທຸກໆປີຜ່ານມາ, ບັນດາກິດຈະກຳຕ່າງໆ ແມ່ນໄດ້ຈັດຕັ້ງປະຕິບັດແລ້ວ, ສ່ວນການບູຊາໜ້ານໍ້າແມ່ນໄດ້ຈັດຕັ້ງແຕ່ວັນທີ 26 ຕຸລາຜ່ານມາ ຕາມຮີດຄອງປະເພນີ. ການແຂ່ງຂັນຊ່ວງເຮືອໃນປີນີ້, ເຮືອເຂົ້າຮ່ວມແຂ່ງຂັນມີເຮືອ 30 ສີພາຍ ແລະ 12 ສີພາຍ ຍິງ-ຊາຍ ລວມທັງໝົດມີ 18 ລຳ ແລະ ການແຂ່ງຂັນຈະໄດ້ມີພິທີປິດ ແລະ ມອບລາງວັນໃນຕອນແລງຂອງວັນດຽວກັນນີ້.
 |
ປະທານຄະນະກໍາມະການປົກຄອງເມືອງຈັນທະບູລີ ກ່າວຕື່ມວ່າ: ເພື່ອເຮັດໃຫ້ການສະເຫຼີມສະຫຼອງບຸນອອກພັນສາປະວໍຣະນາ ແລະ ບຸນຊ່ວງເຮືອປະເພນີ ປີນີ້ມີຜົນສໍາເລັດຕາມຄາດໝາຍຢ່າງຈົບງາມ ຂໍຮຽກຮ້ອງມາຍັງບັນດາທ່ານຄະນະຮັບຜິດຊອບແຕ່ລະພາກສ່ວນ ຈົ່ງໄດ້ເຊີດຊູຄວາມຮັບຜິດຊອບຂອງຕົນໃຫ້ສູງຂຶ້ນພ້ອມກັນເປັນເຈົ້າການຈັດຕັ້ງປະຕິບັດໜ້າທີ່ໃຫ້ສໍາເລັດຕາມຄາດໝາຍທີ່ວາງໄວ້ ແລະ ຮຽກຮ້ອງມາຍັງຄະນະກຳມະການຈັດການແຂ່ງຂັນ, ຄະນະຮັບຜິດຊອບສີພາຍເຮືອຊ່ວງ ຕະຫຼອດຮອດນັກສີພາຍທຸກທ່ານຈົ່ງເຊີດຊູນໍ້າໃຈເຄົາລົບ ແລະ ປະຕິບັດກະຕິກາການແຂ່ງຂັນຢ່າງເຂັ້ມງວດ, ຖືເອົາຄວາມສາມັກຄີເປັນຫຼັກ, ຮູ້ອະໄພຊຶ່ງກັນ ແລະ ກັນ, ຮັກສາໄດ້ຈັນຍາບັນຂອງນັກສີພາຍທີ່ດີເລີດໃຫ້ໝັ້ນຄົງຕະຫຼອດໄປ, ຂໍຮຽກຮ້ອງມາຍັງບັນດາທ່ານແຂກ ແລະ ມວນຊົນ, ປະຊາຊົນທຸກເຜົ່າ, ທຸກເພດໄວຜູ້ມາຮ່ວມງານ ຈົ່ງຍົກສູງຄວາມຮັບຜິດ ຊອບເປັນເຈົ້າພາບຮ່ວມກັນ ເພື່ອເຮັດໃຫ້ງານຄັ້ງນີ້ມີຜົນສໍາເລັດອັນຈົບງາມ.
ໂອກາດອັນເລີກງາມຍາມດີນີ້ ໃນນາມປະທານຈັດງານບຸນອອກພັນສາປະວໍຣະນາ ແລະ ບຸນຊ່ວງເຮືອປະເພນີ ທີ່ທ່າວັດຈັນ ເມືອງຈັນທະບູລີ ນວ ປະຈໍາປີ 2026 ໄດ້ເປີດພິທີການແຂ່ງຂັນຊ່ວງເຮືອປະຈໍາປີ 2026 ຢ່າງເປັນທາງການ. ໂອກາດນີ້, ທ່ານ ທະນົງໄຊ ຄຸດໄພທູນ ພ້ອມຄະນະປະທານຈັດງານໄດ້ຂຶ້ນລັ່ນ ຄ້ອງ 9 ບາດ ເພື່ອເປັນສິຣິມຸງຄຸນໃນການເປີດການແຂ່ງຂັນຊ່ວງເຮືອປະເພນີ ປະຈໍາປີ 2026 ທີ່ທ່າວັດຈັນ ຢ່າງເປັນທາງການ.
(ຂ່າວ-ພາບ: ວັນເພັງ)
ຄໍາເຫັນ