 |
ໃນພິທີໄດ້ຮັບຟັງການລາຍງານຫຍໍ້ກ່ຽວກັບໂຄງການກໍ່ສ້າງຕໍ່ເຕີມຫ້ອງເຮັດວຽກ ແລະ ຫ້ອງປະຊຸມສະພາປະຊາຊົນແຂວງຈໍາປາສັກ ເປັນຕົ້ນ: ໂຄງການຕໍ່ເຕີມ ຫ້ອງເຮັດວຽກ ແລະ ຫ້ອງປະຊຸມສະພາປະຊາຊົນແຂວງຈໍາປາສັກ ຕັ້ງຢູ່ບ້ານ ໂນນຄູ່ ນະຄອນປາກເຊ, ການຈັດຕັ້ງປະຕິບັດໂຄງການພາຍຫຼັງໄດ້ຮັບຮອງເອົາບໍລິສັດຜູ້ຊະນະການປະມູນ ແລະ ເຊັນສັນຍາຮັບເໝົາກໍ່ສ້າງ, ສະພາປະຊາຊົນແຂວງ ໃນນາມເຈົ້າຂອງໂຄງການກໍ່ໄດ້ອອກໃບສັ່ງວຽກໃຫ້ບໍລິສັດເລີ້ມລົງມື ກໍ່ສ້າງ ພ້ອມທັງມອບພື້ນທີ່ກໍ່ສ້າງໃຫ້ບໍລິສັດເປັນຜູ້ຮັບຜິດຊອບ ແລະ ຄຸ້ມຄອງຈົນກວ່າຈະສໍາ ເລັດໂຄງການ
ບໍລິສັດ ວິຊາຄົມກໍ່ສ້າງຈໍາກັດຜູ້ດຽວ ໄດ້ເລີ້ມລົງມືກໍ່ສ້າງແຕ່ວັນທີ 9 ພຶດສະພາ 2025 ມາຮອດປັດຈຸບັນໃຊ້ເວລາ ທັງໝົດ 11 ເດືອນແມ່ນປະຕິບັດສໍາເລັດ 100% ສາມາດເປີດນໍາໃຊ້ໄດ້ຢ່າງເປັນທາງການ. ໂຄງການຕໍ່ເຕີມຫ້ອງເຮັດວຽກ ແລະ ຫ້ອງປະຊຸມສະພາປະຊາຊົນແຂວງ ເປັນອາຄານ 2 ຊັ້ນ.
 |
ຊັ້ນທີ 1 ມີເນື້ອທີ່ນໍາໃຊ້ 945 ແມັດກາເລ ປະກອບດ້ວຍຫ້ອງເຮັດວຽກຂັ້ນດ້ວຍແວ່ນ. ຊັ້ນທີ 2 ມີເນື້ອທີ່ນໍາໃຊ້ 945 ແມັດກາເລ ປະກອບດ້ວຍຫ້ອງປະຊຸມໃຫຍ່ສາມາດບັນຈຸໄດ້ ສູງສຸດ 300 ຄົນ, ມີຫ້ອງຄວບຄຸມເຄື່ອງສຽງ ຫ້ອງພັກຜ່ອນ ແລະ ມູນຄ່າກໍ່ສ້າງທັງໝົດ 19,999,745,779 ກີບ. ພ້ອມນີ້ກໍມີການກ່າວມອບ-ກ່າວຮັບ ໂຄງການດັ່ງກ່າວ.
ໂອກາດນີ້, ທ່ານນາຍົກລັດຖະມົນຕີ ພ້ອມດ້ວຍຄະນະນໍາແຂວງ ແລະ ແຂກຖືກເຊີນ ຮ່ວມຕັດແຖບຜ້າ ແລະ ລັ່ນຄ້ອງ 9 ບາດ ເພື່ອເປັນນິມິດໝາຍທີ່ດີໃຫ້ແກ່ການເປີດນໍາໃຊ້ອາຄານເຮັດວຽກ ແລະ ຫ້ອງປະຊຸມສະພາປະຊາຊົນແຂວງຈໍາປາສັກ.
(ຂ່າວ-ພາບ: ຈັນທະວີສັກ)
ຄໍາເຫັນ