ເປີດຂະບວນການຕ້ອນຮັບກອງປະຊຸມໃຫຍ່ອົງຄະນະພັກກະຊວງແລະ ສະຫຼອງວັນສ້າງຕັ້ງຂະແໜງການເງິນ

ຈຸດປະສົງເພື່ອສ້າງຂະບວນການໃຫ້ມີບັນຍາກາດຟົດຟື້ນ, ສ້າງຄວາມສາມັກຄີ ແລະ ເປັນເອກະພາບພາຍໃນ, ຍູ້ແຮງວຽກງານສຶກສາອົບຮົມການເມືອງແນວຄິດເຂົ້າສູ່ຄຸນນະພາບໃໝ່, ມີຄວາມສະຫງົບ, ເປັນລະບຽບຮຽບຮ້ອຍ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ຕ່າງໆທີ່ເກີດຂຶ້ນໃນການພັດທະນາເສດຖະກິດ-ສັງຄົມ.ພ້ອມທັງເປັນການຊຸກຍູ້ການປະຕິບັດວຽກງານຮອບດ້ານຂອງຂະແໜງການເງິນ, ຍູ້ແຮງຂະບວນການແຂ່ງຂັນ "ຮັກຊາດ ແລະ ພັດທະນາ” ຕິດພັນກັບການຈັດຕັ້ງປະຕິບັດແຜນພັດທະນາເສດຖະກິດສັງຄົມ-ແຫ່ງຊາດ, ແຜນງົບປະມານແຫ່ງລັດ, 2 ວາລະແຫ່ງຊາດ ແລະ ປະຕິບັດຄຳຂວັນ, ຂໍ້ແຂ່ງຂັນຂອງບັນດາໜ່ວຍພັກກະຊວງການເງິນ ແລະ ບັນດາ 3 ອົງການຈັດຕັ້ງມະຫາຊົນໃຫ້ປະກົດຜົນເປັນຈິງ; ທັງເປັນການຮັດແໜ້ນຄວາມສາມັກຄີພາຍໃນທົ່ວກະຊວງການເງິນໃຫ້ມີຄວາມແໜ້ນແຟ້ນ ແລະ ປະຕິບັດບັນດາຄໍາຂວັນຂອງຂະແໜງການເງິນຄື “ຍົກສູງບົດບາດການນໍາພາຂອງພັກ, ຕັ້ງໜ້າເປັນເຈົ້າຕົນເອງບຸກທະລຸຄຸ້ມຄອງການເງິນພາກລັດເປັນທັນສະໄໝ, ຍູ້ແຮງການພັດທະນາເສດຖະກິດ-ສັງຄົມແຫ່ງຊາດໃຫ້ມີຄວາມເຂັ້ມແຂງ, ສີຂຽວ ແລະ ຍືນຍົງ”.

ໂອກາດນີ້, ທ່ານ ສັນຕິພາບ ພົມວິຫານ ໄດ້ກ່າວເປີດບັ້ນຂະບວນການແຂ່ງຂັນຢ່າງເປັນທາງການ ແລະ ການຈັບມືແຂ່ງຂັນຂອງບັນດາກົມພາຍໃນກະຊວງການເງິນ. ພ້ອມກັນ, ກໍໄດ້ດຳເນີນຂະບວນການແຂ່ງຂັນກິລາເຕະບານຊາຍ, ເຕະບານຍິງ, ດຶງເຊືອກ,ຕີດອກປີກໄກ່, ແລ່ນໄຖ່, ກິລາເຕະບານຊາຍທີມກິດຕິມະສັກ ແລະ ຕອນທ້າຍຂອງຂະບວນການດັ່ງກ່າວໄດ້ມອບຂັນລາງວັນໃຫ້ນັກກິລາຕື່ມອີກ.

ຂ່າວ: ກະຊວງການເງິນ