 |
ທ່ານ ວັນສີ ກົວມົວ ກໍາມະການສູນກາງພັກ ຮອງເລຂາຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ໃຫ້ກຽດຂຶ້ນກ່າວເປີດກອງປະຊຸມຢ່າງເປັນທາງການ ພ້ອມທັງໄດ້ສະ ແດງຄວາມຍິນດີຕ້ອນຮັບຢ່າງອົບອຸ່ນຕໍ່ບັນດາຄະນະຜູ້ແທນຈາກ 11 ປະເທດສະມາຊິກອາຊຽນ ແລະ ກອງເລຂາອາຊຽນ.
ກອງປະຊຸມຄັ້ງນີ້ ດໍາເນີນພາຍໃຕ້ການເປັນປະທານ ຂອງທ່ານນາງ ມາໄລວຽງ ວົງຈັນດີ ຫົວໜ້າອະນຸກໍາມະການວຽກງານຖະແຫຼງຂ່າວ ສປປ ລາວ ຮອງອໍານວຍການໃຫຍ່ ໂທລະພາບແຫ່ງຊາດລາວ.
 |
ທ່ານ ວັນສີ ກົວມົວ ໄດ້ເນັ້ນຢ້ຳເຖິງຄວາມໝາຍຄວາມສໍາຄັນພິເສດຂອງການເປັນເຈົ້າພາບໃນຄັ້ງນີ້ວ່າ: ເປັນຄັ້ງທໍາອິດຂອງ ສປປ ລາວ ຫຼັງຈາກທີ່ມີການປັບປຸງໂຄງສ້າງອົງກອນສື່ມວນຊົນຂອງລັດຢ່າງເປັນລະບົບ ໂດຍໄດ້ຍ້າຍສື່ຫຼັກຂອງຊາດ ຊຶ່ງລວມມີ: ສຳນັກຂ່າວສານປະເທດລາວ (KPL), ໂທລະພາບແຫ່ງຊາດລາວ (LNTV), ວິທະຍຸແຫ່ງຊາດລາວ (LNR) ສື່ສິ່ງພິມຕ່າງໆ ແລະ ສື່ສິ່ງພິມພາສາຕ່າງປະເທດ ມາຢູ່ພາຍໃຕ້ການຄຸ້ມຄອງຂອງຄະນະໂຄສະນາອົບຮົມສູນກາງພັກ.
ການປະຕິຮູບອົງກອນຄັ້ງສໍາຄັນນີ້ ມີຈຸດປະສົງເພື່ອຍົກລະດັບປະສິດທິພາບການດໍາເນີນງານ, ປັບໂຕເຂົ້າສູ່ຍຸກດີຈີຕອນຢ່າງຍືນຍົງ ແລະ ສ້າງສັນເນື້ອຫາທີ່ມີຄຸນນະພາບສູງເພື່ອຮັບໃຊ້ສັງຄົມ ແລະ ປະເທດຊາດໃຫ້ດີຍິ່ງຂຶ້ນ.
 |
ນອກຈາກນີ້, ທ່ານຍັງໄດ້ເນັ້ນຢ້ຳເຖິງບົດບາດອັນສໍາຄັນຂອງອະນຸກໍາມະການ ASEAN-COCI ດ້ານຖະແຫຼງຂ່າວ ໃນການເສີມສ້າງຄວາມເຂັ້ມແຂງໃຫ້ແກ່ລະບົບການສື່ສານໃນລະດັບພາກພື້ນ, ສົ່ງເສີມຄວາມເຂົ້າໃຈອັນດີລະຫວ່າງປະເທດສະມາຊິກ ແລະ ຮ່ວມກັນພັດທະນາອັດຕະລັກຂອງປະຊາຄົມອາຊຽນໃຫ້ແໜ້ນແຟ້ນ.
ທ່ານນາງ ມາໄລວຽງ ວົງຈັນດີ ປະທານກອງປະຊຸມ ໄດ້ກ່າວເຖິງທິດທາງ ແລະ ຄວາມຮ່ວມມືດ້ານສື່ມວນຊົນໃນຍຸກໃໝ່ວ່າ: "ໃນຍຸກແຫ່ງການຫັນເປັນດີຈີຕອນຢ່າງໄວວາ, ຄະນະອະນຸກໍາມະການດ້ານຖະແຫຼງຂ່າວໄດ້ກາຍເປັນເວທີຍຸດທະສາດສໍາຄັນ ສໍາລັບປະເທດສະມາຊິກອາຊຽນ ໃນການສ້າງຄວາມເຂົ້າໃຈຊຶ່ງກັນ ແລະ ກັນໃຫ້ເລິກເຊິ່ງ, ເສີມສ້າງພະລັງສຽງຂອງພາກພື້ນໃຫ້ເຂັ້ມແຂງ ແລະ ຮ່ວມກັນຮັບມືກັບສິ່ງທ້າທາຍໃໝ່ໆ ໂດຍສະເພາະການແກ້ໄຂບັນຫາຂໍ້ມູນຂ່າວປອມ (Fake News) ແລະ ສື່ສັງເຄາະ (Synthetic Media).
 |
ການຫາແບບສ້າງສັນ ແລະ ຄວາມຮ່ວມມືທີ່ເປັນຮູບປະທໍາ, ພວກເຮົາຈະສາມາດຮ່ວມກັນສ້າງປະຊາຄົມອາຊຽນທີ່ມີຂໍ້ມູນຂ່າວສານຄົບຖ້ວນ, ເຊື່ອມໂຍງຊຶ່ງກັນ ແລະ ກັນ ແລະ ມີຄວາມຍືດຍຸ່ນ (ຜ່ອນຜັນ) ພ້ອມຮັບມືກັບທຸກຄວາມປ່ຽນແປງຢ່າງຍືນຍົງ."
ການປະຊຸມຄັ້ງນີ້ ຖືເປັນກົນໄກສໍາຄັນໃນການຂັບເຄື່ອນແຜນງານອາຊຽນ ວ່າດ້ວຍຂໍ້ມູນຂ່າວສານ ແລະ ສື່ມວນຊົນ ປີ 2026–2035 (ASEAN Work Plan for Information and Media 2026–2035) ໂດຍມຸ່ງເນັ້ນການເຊື່ອມໂຍງລະບົບສື່ມວນຊົນໃນພາກພື້ນ, ເພີ່ມພູນທັກສະຄວາມຮູ້ເທົ່າທັນດີຈີຕອນ (Digital Literacy) ແລະ ວາງຮາກຖານພູມມິທັດສື່ອາຊຽນໃຫ້ມີຄວາມຕໍ່ເນື່ອງ ແລະ ມີວິໄສທັດຍາວໄກ.
ຕາມວາລະການປະຊຸມ, ຄະນະຜູ້ແທນຈະໄດ້ຮ່ວມກັນທົບທວນຄວາມຄືບໜ້າຂອງໂຄງການຕ່າງໆ, ພິຈາລະນາຂໍ້ສະເໜີໂຄງການໃໝ່ທີ່ຈະຂໍຮັບການສະໜັບສະໜູນຈາກ ກອງທຶນວັດທະນະທໍາອາຊຽນ (ACF) ສໍາລັບປີງົບປະມານ 2027 ລວມເຖິງ ການຫາລືຄວາມຮ່ວມມືກັບປະເທດຄູ່ເຈລະຈາ (ຈີນ, ອິນເດຍ, ຍີ່ປຸ່ນ, ສ ເກົາຫຼີ, ຣັດເຊຍ ແລະ ນອກແວ).
ນອກຈາກນີ້, ທີ່ປະຊຸມ ຈະຮ່ວມກັນກຽມຄວາມພ້ອມສໍາລັບການ ຈັດກອງປະຊຸມສໍາມະນາຫຼາຍພາກສ່ວນຂອງອາຊຽນ ວ່າດ້ວຍການແກ້ໄຂບັນຫາຂໍ້ມູນຂ່າວປອມ ແລະ ການຄຸ້ມຄອງສື່ສັງຄົມ ໃນວັນທີ 4-5 ພະຈິກ 2026 ທີ່ນະຄອນຫຼວງພະນົມເປັນ ປະເທດກໍາປູເຈຍ ພ້ອມທັງຫາລືການກຽມງານປະຊຸມ SCI ຄັ້ງທີ 28 ຊຶ່ງປະເທດມາເລເຊຍຈະຮັບໄມ້ຕໍ່ເປັນເຈົ້າພາບໃນລໍາດັບຕໍ່ໄປ.
(ຂ່າວ: ແສງຈັນ)
ຄໍາເຫັນ