 |
ສະຫາຍ ລິນຄໍາ ດວງສະຫວັນ ກ່າວເປີດກອງປະຊຸມ ຊຶ່ງມີເນື້ອໃນທີ່ສໍາຄັນບາງຕອນວ່າ: ກອງປະຊຸມໃຫຍ່ພວກເຮົາໃນຄັ້ງນີ້ ຈະໄດ້ປະຕິບັດໜ້າທີ່ສໍາຄັນ ຄື: 1. ຄົ້ນຄວ້າ ແລະ ຮັບຮອງເອົາ ຮ່າງ ລາຍງານການເມືອງ ແລະ ຮ່າງ ບົດສະຫຼຸບການຈັດຕັ້ງປະຕິບັດແຜນທະນາຂະແໜງກະສິກຳ ແລະ ສິ່ງແວດລ້ອມ ຂອງ 2 ຂະແໜງການທີ່ມີການໂຮມເຂົ້າກັນ ຊຶ່ງ 2 ເອກະສານດັ່ງກ່າວ ແມ່ນມີຄວາມສໍາຄັນ ທີ່ສ່ອງແສງໃຫ້ເຫັນໝາກຜົນໃນການນໍາພາ-ຊີ້ນໍາ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ 6 ຂອງອົງຄະນະພັກ ກະຊວງກະສິກຳ ແລະ ປ່າໄມ້, ມະຕິກອງປະຊຸມໃຫຍ່ ຄັ້ງທີ 2 ຂອງອົງຄະນະພັກ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໃນເມື່ອກ່ອນ ແລະ ການກຳນົດທິດທາງຈຸດສຸມ 5 ປີ ໃນຕໍ່ໜ້າ ຂອງຂະແໜງກະສິກຳ ແລະ ສິ່ງແວດລ້ອມ ຊຶ່ງຈະເປັນການປະກອບສ່ວນເຂົ້າໃນການຈັດຕັ້ງປະຕິບັດ ມະຕິກອງປະຊຸມໃຫຍ່ ຜູ້ແທນທົ່ວປະເທດຄັ້ງທີ 12 ຂອງພັກ ໃຫ້ບັນລຸຜົນສໍາເລັດ ຕາມຄາດໝາຍທີ່ວາງໄວ້, 2. ຄົ້ນຄວ້າ ແລະ ຮັບຮອງເອົາ ຮ່າງບົດສໍາຫຼວດການນໍາພາລວມ ຂອງຄະນະບໍລິຫານງານພັກ ກະຊວງ ໃນໄລຍະ 5 ປີຜ່ານມາ, ຈາກນັ້ນ ກອງປະຊຸມ ຈະໄດ້ດໍາເນີນການເລືອກຕັ້ງເອົາ ຄະນະບໍລິຫານງານພັກກະຊວງຊຸດໃໝ່ ເພື່ອສືບຕໍ່ນໍາພາ-ຊີ້ນໍາ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 7 ຂອງອົງຄະນະພັກກະຊວງ ໃຫ້ມີຜົນສໍາເລັດ ແລະ ເລືອກຕັ້ງເອົາຜູ້ແທນສົມບູນ, ສໍາຮອງ ໄປເຂົ້າຮ່ວມ ກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ 12 ຂອງພັກ, 3. ກອງປະຊຸມໃຫຍ່ພວກເຮົາ ຈະໄດ້ຮັບຟັງ ຄໍາເຫັນໂອ້ລົມ-ຊີ້ນໍາ ຂອງສະຫາຍ ບຸນທອງ ຈິດມະນີ ເພື່ອເປັນທິດຊີ້ນໍາ ໃຫ້ແກ່ການເຄື່ອນໄຫວວຽກງານ ຂອງອົງຄະນະພັກ ກະຊວງກະສິກຳ ແລະ ສິ່ງແວດລ້ອມ ພວກເຮົາໃນຕໍ່ໜ້າ.
 |
ກອງປະຊຸມໃຫຍ່ຂອງພວກເຮົາໃນຄັ້ງນີ້ແມ່ນເປັນເຫດການທາງດ້ານການເມືອງ ແລະ ເປັນບາດລ້ຽວທີ່ສໍາຄັນ ເພື່ອສ້າງການຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານ ພາຍໃຕ້ຄໍາຂວັນ: “ຍົກສູງບົດບາດການນໍາພາຂອງພັກເອົາໃຈໃສ່ເພີ່ມທະວີ ການຄຸ້ມຄອງກະສິກຳ ແລະ ສິ່ງແວດລ້ອມ, ຮັບປະກັນຄວາມໝັ້ນຄົງດ້ານສະບຽງອາຫານ, ຊົນນະບົດໄດ້ຮັບການພັດທະນາ, ຄຸ້ມຄອງ, ນໍາໃຊ້ ແລະ ປົກປັກຮັກສາຊັບພະຍາກອນທຳມະຊາດ, ປ່າໄມ້, ສິ່ງແວດລ້ອມ ຕາມທິດຫັນເປັນທັນສະໄໝ, ສີຂຽວ ແລະ ຍືນຍົງ” ດ້ວຍໜ້າທີ່ອັນສໍາຄັນດັ່ງກ່າວ, ພວກເຮົາຕ້ອງໄດ້ເຊີດຊູສະຕິຕື່ນຕົວ ແລະ ຄວາມຮັບຜິດຊອບການເມືອງ ກໍຄືການເປັນເຈົ້າຂອງຜູ້ແທນໃຫ້ສູງ, ປະຕິບັດລະບຽບ ແລະ ວາລະກອງປະຊຸມ ຢ່າງເຂັ້ມງວດ, ພ້ອມກັນຄົ້ນຄວ້າປະກອບຄໍາເຫັນ ເຂົ້າໃນຮ່າງລາຍງານການເມືອງ, ຮ່າງແຜນພັດທະນາຂະແໜງ ກະສິກຳ ແລະ ສິ່ງແວດລ້ອມ ໃນ 5 ປີ ຕໍ່ໜ້າ ຢ່າງເລິກເຊິ່ງ, ຮອບຄອບ, ຖີ່ຖ້ວນ ໂດຍສະເພາະການໃຊ້ສິດປະຊາທິປະໄຕ ເລືອກຕັ້ງເອົາຄະນະບໍລິຫານງານພັກກະຊວງຊຸດໃໝ່ ແລະ ເລືອກເອົາຜູ້ແທນໄປຮ່ວມກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ 12 ຂອງພັກ ໃຫ້ມີຄວາມຖືກຕ້ອງຕາມລະບຽບການ, ທັງນີ້ ກໍເພື່ອໃຫ້ກອງປະຊຸມໃຫຍ່ ຄັ້ງທີ 7 ຂອງອົງຄະນະພັກກະຊວງ ບັນລຸຜົນສໍາເລັດຢ່າງຈົບງາມ.
(ຂ່າວ-ພາບ: ແສງຈັນ)
ຄໍາເຫັນ