ໃນພິທີ, ທ່ານ ພົນເອກ ຈັນສະໝອນ ຈັນຍາລາດ ໄດ້ກ່າວວ່າ: ໂຄງການດັ່ງກ່າວ ໄດ້ເຊັນສັນຍາກັນໃນທ້າຍປີ 2013 ຊຶ່ງເປັນການຮ່ວມມືທຸລະກິດ ລະຫວ່າງ ກະຊວງປ້ອງກັນປະເທດ ກັບ ບໍລິສັດ ຊົງຊີງ ຟາງເຕີ ພັດທະນາ ອະສັງ ຫາລິມະຊັບ ຈຳກັດ ພາຍຫຼັງເຊັນສັນຍາ ກໍໄດ້ດຳເນີນການກໍ່ສ້າງບັນດາໜ້າວຽກໂຄງສ້າງຫຼັກຂອງຕົວອາຄານສຳເລັດ ແຕ່ຍັງບໍ່ສົມບູນ ແລະ ໄດ້ຕົບແຕ່ງພາຍນອກສຳເລັດຈຳນວນໜຶ່ງ. ຍ້ອນສະພາບການແຜ່ລະບາດຂອງພະຍາດໂຄວິດ-19ແລະ ສະພາບການເງິນຂອງຜູ້ລົງທຶນບໍ່ຄ່ອງຕົວ, ສັນຍາ ແລະ ນິຕິກຳກ່ຽວພັນຈຳນວນໜຶ່ງ ຍັງບໍ່ທັນສອດຄ່ອງ ແລະ ບໍ່ຮັດກຸມເທົ່າທີ່ຄວນສະນັ້ນ, ມາຮອດປີ 2016 ການຈັດຕັ້ງປະຕິບັດຕົວຈິງພົບຂໍ້ຫຍຸ້ງຍາກແລະໄດ້ໂຈະການກໍ່ສ້າງເປັນການຊົ່ວຄາວ ແຕ່ລັດຖະບານກໍຄືການນຳຂອງກະຊວງປ້ອງກັນປະເທດ ໄດ້ເອົາໃຈໃສ່ໄດ້ຊີ້ນຳ ແກ້ໄຂ ແລະ ຊຸກຍູ້ຈົນເຮັດໃຫ້ໂຄງການດັ່ງກ່າວສາມາດສືບຕໍ່ກໍ່ສ້າງຄືນໃໝ່ໃນປີ 2021 ແລະ ມາຮອດຕົ້ນປີ2024 ກໍໄດ້ເລີ່ມເປີດທົດລອງນໍາໃຊ້ບາງສ່ວນພ້ອມທັງປັບປຸງບາງຈຸດໃຫ້ສ່ອດຄອງເໝາະສົມແລະ ປັດຈຸບັນນີ້ ໂຮງແຮມລາດຊະວົງ ວັນດ້າ ວິສຕ້າ ແມ່ນມີຄວາມພ້ອມໃຫ້ການບໍລິການແລ້ວ 100%. ສໍາລັບໂຄງການ ລາດຊະວົງ ພລາຊາ ວັນດ້າ ວິສຕ້າ ປະກອບມີໂຮງແຮມລະດັບ 5 ດາວ, ຫ້ອງການ, ອາພາດເມັນ, ສູນບຳບັດ ແລະ ປິ່ນປົວສຸຂະພາບ, ສູນການຄ້າຄົບວົງຈອນ, ສູນບັນເທີງ, ສູນກິລາ, ຮ້ານອາຫານນາໆຊາດ ແລະ ອື່ນໆ ຕັ້ງຢູ່ໃຈກາງນະຄອນຫຼວງວຽງຈັນ, ມີເນື້ອທີ່ກໍ່ສ້າງທັງໝົດ 188.000 ຕາແມັດ, ຄວາມສູງ 138 ແມັດ, ມີ 36 ຊັ້ນ, ເປັນອາຄານຕຶກທີ່ສູງທີ່ສຸດຢູ່ປະເທດລາວໃນປັດຈຸບັນ.
ຈາກນັ້ນ, ໃນພິທີກໍໄດ້ຕັດແຖບຜ້າ ແລະ ລັ່ນຄອງ 9 ບາດ ເພື່ອເປັນສີລິມົງຄຸນ ເປີດນໍາໃຊ້ໂຮງແຮມ ລາດຊະວົງ ວັນດ້າ ວິສຕ້າ ຢ່າງເປັນທາງການ.
(ຂ່າວ-ພາບ: ສຸກສາຄອນ)
ຄໍາເຫັນ