ເປີດນໍາໃຊ້ຫໍພິພິທະພັນປະຫວັດສາດກອງທັບ

ພິທີເປີດນໍາໃຊ້ຫໍພິພິທະພັນປະຫວັດສາດກອງທັບປະຊາຊົນລາວໄດ້ຈັດຂຶ້ນໃນວັນທີ 13 ທັນວານີ້ທີ່ຫໍພິພິທະພັນປະຫັວດສາດກອງທັບປະຊາຊົນລາວ ຕັ້ງຢູ່ຖະໜົນໄກສອນ ພົມວິຫານ ເມືອງໄຊເສດຖານະຄອນຫຼວງວຽງຈັນໂດຍໃຫ້ກຽດເຂົ້າຮ່ວມຂອງທ່ານພົນເອກຈັນສະໝອນຈັນຍາລາດຮອງນາຍົກລັດຖະມົນຕີລັດຖະມົນຕີກະຊວງປ້ອງກັນປະເທດ,ທ່ານຟານມິງ ຈ້ຽນອຸປະທູດ ສສ ຫວຽດນາມ ປະຈຳສປປ ລາວ, ມີບັນດາແຂກຖືກເຊີນເຂົ້າຮ່ວມ.
ທ່ານພົນເອກຈັນສະໝອນຈັນຍາລາດໄດ້ມີຄຳເຫັນໃນພິທີວ່າ: ພາຍຫຼັງທີ່ໄດ້ສຳເລັດການບູລະນະສ້ອມແປງ ແລະ ປັບປຸງເນື້ອໃນການວາງສະແດງຄືນໃໝ່ ໂດຍການຊ່ວຍເຫຼືອດ້ານທຶນຮອນຈາກກະຊວງປ້ອງກັນປະເທດ ສສ ຫວຽດນາມ ເພື່ອຂ່ຳນັບຮັບຕ້ອນວັນປະຫວັດສາດສໍາຄັນຂອງຊາດ, ຂອງພັກ ແລະ ກອງທັບປະຊາຊົນລາວ, ເນື່ອງໃນໂອກາດທົ່ວພັກ-ລັດ, ທົ່ວກອງທັບ ແລະ ທົ່ວປວງຊົນລາວບັນດາເຜົ່າ ໄດ້ສ້າງຂະບວນການ ແລະ ຜົນງານດ້ານຕ່າງໆ ເພື່ອກະກຽມຈັດຕັ້ງສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ໃນວັນທີ 20 ມັງກອນ 2024 ທີ່ຈະມາເຖິງ, ກະຊວງປ້ອງກັນປະເທດ ໄດ້ມອບໝາຍໃຫ້ກົມໃຫຍ່ການເມືອງກອງທັບຮ່ວມກັບວິຊາການກົມກອງທີ່ກ່ຽວຂ້ອງເຮັດໜ້າທີ່ຄົ້ນຄວ້າຮຽບຮຽງ ບັນດາຂໍ້ມູນປະຫວັດສາດ, ເກັບກຳຮູບພາບ, ວັດຖຸກຳທາງປະຫວັດສາດທັງເກົ່າແລະໃໝ່ ພ້ອມກັບ ການບູລະນະສ້ອມແປງຫໍພິພິທະພັນຄືນໃໝ່ ໃຫ້ຖືກຕ້ອງຕາມລະບົບ-ມາດຕະຖານ, ການກໍ່ສ້າງຫໍພິພິທະພັນຄັ້ງນີ້ ແນໃສ່ປັບປຸງຄືນລະບົບໂຄງຮ່າງວາງສະແດງ ແລະ ເນື້ອໃນດ້ານຕ່າງໆ, ສ້າງໃຫ້ເປັນສູນລວມປະຫວັດສາດ, ທ້ອນໂຮມວັດຖຸກໍາ, ຄຸ້ມຄອງ-ປົກປັກຮັກສາ ແລະ ຈັດວາງສະແດງປະຫວັດມູນເຊື້ອ, ຜົນງານໄຊຊະນະຂອງກອງທັບປະຊາຊົນລາວ ພາຍໃຕ້ການຊີ້ນໍາ-ນໍາພາຂອງພັກປະຊາຊົນປະຕິວັດລາວ ໃຫ້ມວນຊົນທຸກຊັ້ນຄົນ ທັງພາຍໃນ ແລະ ຕ່າງປະເທດ ໄດ້ເຂົ້າມາຄົ້ນຄວ້າ, ສຶກສາຮໍ່າຮຽນ ແລະ ຢ້ຽມຊົມດ້ວຍຄວາມປະທັບໃຈ ຄືບັນຍາກາດໄດ້ຮ່ວມເຄື່ອນໄຫວຊີວິດຕົວຈິງຢູ່ໃນເຫດການປະຫວັດສາດຕ່າງໆ.
ຕະຫຼອດໄລຍະຜ່ານມາ, ກຳລັງປະກອບອາວຸດປະຊາຊົນລາວ ໄດ້ຝຶກຝົນຫຼໍ່ຫຼອມໃນແປວໄຟ ແຫ່ງການຕໍ່ສູ້ປະຕິວັດຍືດເຍື້ອຍາວນານ, ສ້າງຜົນງານໃນການສູ້ຮົບອັນໃຫຍ່ຫຼວງ ຮ່ວມກັບປະຊາຊົນລາວບັນດາເຜົ່າຜູ້ຮັກຊາດ ໃນການຕໍ່ສູ້ຕີເອົາຊະນະພວກລ່າເມືອງຂຶ້ນຝຣັ່ງ, ຈັກກະພັດອາເມຣິກາຜູ້ຮຸກຮານ ແລະ ອິດທິກຳລັງປະຕິການອື່ນໆ, ປົດປ່ອຍປະເທດຊາດຢ່າງສົມບູນຍາດເອົາເອກະລາດມາໃຫ້ປະເທດຊາດ, ໃນປັດຈຸບັນນີ້ກອງທັບປະຊາຊົນລາວໄດ້ເປັນກຳລັງຫຼັກແຫຼ່ງເຮັດໜ້າທີ່ປົກປັກຮັກສາເອກະລາດ, ອຳນາດອະທິປະໄຕ ແລະຜືນແຜ່ນດິນອັນຄົບຖ້ວນຂອງປະເທດຊາດໄວ້ໃຫ້ໝັ້ນຄົງ, ຮັບປະກັນສະຖຽນລະພາບທາງການເມືອງ, ຄວາມເປັນລະບຽບຮຽບຮ້ອຍ ແລະ ຄວາມສະຫງົບປອດໄພທາງສັງຄົມ, ປົກປັກຮັກສາລະບອບປະຊາທິປະໄຕປະຊາຊົນ, ປະຊາຊົນບັນດາເຜົ່າ ແລະ ວັດທະນະທຳອັນດີງາມຂອງຊາດ, ກອງທັບປະຊາຊົນລາວ ໄດ້ເຕີບໃຫຍ່ຂະຫຍາຍຕົວຂຶ້ນເປັນກ້າວໆ ທັງດ້ານກຳລັງ ແລະ ການປະກອບຢູ່ໃນທົ່ວກຳລັງຫຼວງ-ກຳລັງທ້ອງຖິ່ນ ແລະ ບັນດາເຫຼົ່າຮົບກໍໄດ້ຮັບການສ້າງຕັ້ງຂຶ້ນເປັນແຕ່ລະໄລຍະດ້ວຍເຫດນັ້ນ, ທາດແທ້, ມູນເຊື້ອທີ່ກ້າແກ່ນສະຫງ່າງາມ ແລະ ຜົນງານ, ໄຊຊະນະອັນໃຫຍ່ຫຼວງ ແລະ ການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ນັບແຕ່ມື້ກຳເນີດຈົນເຖິງປັດຈຸບັນຖືກບັນທຶກໄວ້ໃນ ຫໍພິພິທະພັນປະຫັວດສາດກອງເພື່ອໃຫ້ອະນຸຊົນຄົນຮຸ່ນຫຼັງໄດ້ສຶກສາຮຽນຮູ້ ແລະ ສືບທອດພາລະກຳອັນເລີດນໍ້າສືບຕໍ່ໄປ.
ທ່ານ ພົນຈັດຕະວາແປ້ນຄຳ ບຸດຈັນແພງ ຫົວໜ້າກົມໂຄສະນາອົບຮົມ ກະຊວງປ້ອງກັນປະເທດໄດ້ຂຶ້ນຜ່ານບົດລາຍງານການປັບປຸງກໍ່ສ້າງຫໍພິພິທະພັນປະຫັວດສາດກອງທັບປະຊາຊົນລາວວ່າ:ນັບແຕ່ປີ 2006 - 2017, ຫໍພິພິທະພັນປະຫວັດສາດກອງທັບປະຊາຊົນລາວໄດ້ເປີດບໍລິການຮັບແຂກເຂົ້າຊົມໄດ້ຈໍານວນຫຼາຍແສນຄົນ ໃນນີ້ມີທັງພະນັກງານທະຫານ, ຕຳຫຼວດ, ນັກຮຽນນັກ-ສຶກສາ, ປະຊາຊົນ ແລະ ແຂກຕ່າງປະເທດ ແລະ ໄດ້ເປັນບ່ອນຈຸດຢ້ຽມຢາມທ່ອງທ່ຽວ ຂອງນະຄອນຫຼວງວຽງຈັນແລະ ເປັນບ່ອນສຶກສາຮໍ່າຮຽນປະຫວັດສາດມູນເຊື້ອການຕໍ່ສູ້ອັນພິລະອາດຫານ, ລະອິດລະອ້ຽວ ຕ້ານຈັກກະພັດຜູ້ຮຸກຮານຂອງກອງທັບ ແລະ ປະຊາຊົນລາວບັນດາເຜົ່າ, ການອອກແບບ ຕົວອາຄານແມ່ນນໍາໃຊ້ປັດຕິຍະກຳແບບ ເອີຣົບ ບວກ ອາຊີ, ການວາງສະແດງວັດຖຸກໍາຢູ່ກາງແຈ້ງຂອງຫໍພິພິທະພັນການວາງສະແດງວັດຖຸກໍາຢູ່ກາງແຈ້ງຂອງຫໍພິພິທະພັນ ມີ 30 ວັດຖຸກຳໜັກຄື: ຍົນ, ລົດຕັງ,ເລດາ, ລົດຂົ່ນສົ່ງ, ລູກບອມ, ປືນໃຫຍ່ຈໍານວນໜຶ່ງ ແລະ ມີຮູບປັ້ນປູນໃຫຍ່3 ຊຸດ ແລະ ໃນປີ2019 ເພື່ອກະກຽມພື້ນທີ່ສ້າງຕັ້ງເຮືອນຫໍສະໝຸດກອງທັບ, ຫໍພິພິທະພັນໄດ້ເອົາພື້ນທີ່ວາງສະແດງຂອງ3ວັດຖຸກຳໜັກກາງແຈ້ງອອກຄື: ລົດຕັງເຕ 58, ປືນໃຫຍ່130 ມມແລະ ລົດບັນທຸກການທະຫານ, ຮອດປີ 2021 ໂດຍໄດ້ຮັບການຊ່ວຍເຫຼືອຈາກກະຊວງປ້ອງກັນປະເທດ ສສ ຫວຽດນາມ ຈຶ່ງໄດ້ອອກແບບ ແລະ ສືບຕໍ່ລົງມືກໍ່ສ້າງໄລຍະທີ 2 ໂດຍມີລາຍການຄື: ເຮືອນຮົ່ມໄວ້ວາງສະແດງເຮືອບິນ, ພາຫະນະຂົນສົ່ງທະຫານ, ປືນໃຫຍ່, ລົດຕັງ, ລູກບົ່ມ, ແລະ ວັດຖຸສິນສຶກອື່ນໆ ທັງຂອງເຮົາແລະ ສັດຕູ ວັດຖຸທັງໝົດແມ່ນຈັດວາງສະແດງໃນເຮືອນຮົ່ມ. ນອກນັ້ນຍັງມີລະບົບໄຟຟ້າເຍືອງຮຸ່ງອ້ອມຫໍພິພິທະພັນ, ລະບົບນໍ້າປະປາ, ກ້ອງວົງຈອນປິດ, ເຮືອນຂາຍເຄື່ອງທີ່ລະນຶກ, ປູເດີ່ນດ້ວຍເບຕົງເສີມເຫຼັກ ແລະ ຫ້ອງນໍ້າສາທາລະນະອີກສອງຫຼັງ,ປີ 2022 ກອງທັບປະຊາຊົນຫວຽດນາມໄດ້ໃຫ້ການຊ່ວຍເຫຼືອເປັນໄລຍະທີ 3 ໃນການປັບປຸງ ສະເພາະການກໍ່ສ້າງຈັດວາງສະແດງຢູ່ພາຍໃນຕຶກອາຄານ,ມາເຖິງຕົ້ນປີ 2023 ໂຄງການໄລຍະທີ 3 ໄດ້ລົງມືກໍ່ສ້າງ ແລະ ປັບປຸງ.ລວມມູນຄ່າການກໍ່ສ້າງ ແລະ ປັບປຸງຫໍພິພິທະພັນປະຫວັດສາດກອງທັບທັງ 3 ໄລຍະແມ່ນ 4.631.755ໂດລາ,ການກໍ່ສ້າງປັບປຸງແມ່ນໄດ້ສຳເລັດ, ການຈັດວາງສະແດງຂອງຫໍພິພິທະພັນແມ່ນໄດ້ຮີບໂຮມເອົາບັນດາເຫດການ ແລະ ຂະບວນການປະຕິວັດໃນການຕໍ່ສູ້ຕົວຈິງ ຂອງປະຊາຊົນລາວບັນດາເຜົ່າຜູ້ຮັກຊາດ ໃນແຕ່ລະໄລຍະປະຫັວດສາດ ພາຍໃຕ້ການນຳພາຂອງພັກປະຊາຊົນປະຕິວັດລາວ. 
ຂ່າວ - ພາບ: ບຸນອູ້ມ