ທ່ານຫົວໜ້າພາສີປະຈຳແຂວງສະຫວັນນະເຂດ ໄດ້ກ່າວວ່າ: ໃນການຝຶກອົບຮົມ ແລະເປີດນຳໃຊ້ລະບົບຄຸ້ມຄອງສາງພາສີທັນສະໄໝຢ່າງເປັນທາງການ. ໂດຍອີງຕາມການຈັດຕັ້ງປະຕິບັດວຽກງານວິຊາສະເພາະປະຈໍາປີ 2025ເພື່ອຍົກລະດັບ ແລະພັດທະນາບຸກຄະລາກອນໃນການຄຸ້ມຄອງວຽກງານຫັນເປັນທັນສະໄໝ ແລະຫັນເອົາວຽກງານໄອທີເຂົ້າມາຄຸ້ມຄອງວຽກງານວິຊາສະເພາະ ຊຶ່ງເປັນວຽກງານທີ່ສຳຄັນ ແລະເປັນໝາກຫົວໃຈຂອງກົມພາສີ; ອີກຢ່າງໜ່ຶງກໍເພື່ອເປັນການສືບຕໍ່ເຜີຍແຜ່ບັນດາລະບຽບການຕ່າງໆ ເພື່ອຮັບປະກັນໃຫ້ການນໍາໃຊ້ລະບົບການແຈ້ງພາສີແບບເອເລັກໂຕຣນິກກ່ອນລ່ວງໜ້າ ແລະການຄຸ້ມຄອງນໍາໃຊ້ລະບົບສາງພາສີທັນສະໄໝຢູ່ດ່ານພາສີສາກົນຂົວມິດຕະພາບ 2 ແລະດ່ານພາສີສາກົນແດນສະຫວັນ ໂດຍສອດຄ່ອງກັບລະບຽບການ ແລະນໍາໃຊ້ລະບົບດັ່ງກ່າວໄດ້ຢ່າງມີປະສິດທິພາບ, ຄ່ອງຕົວ, ເປັນເອກະພາບກັນໃນການຈັດຕັ້ງປະຕິບັດນໍາໃຊ້ລະບົບຕ່າງໆຂອງຂະແໜງພາສີ ໃຫ້ແກ່ບັນດາດ່ານໃນຂອບເຂດທົ່ວປະເທດ. ລະບົບຄຸ້ມຄອງສາງພາສີທັນສະໄໝນີ້ ແມ່ນນຳໃຊ້ເພື່ອຕິດຕາມ ແລະຄຸ້ມຄອງ, ກວດກາສິນຄ້າ, ເຄື່ອງຂອງ ທີ່ສັນຈອນເຂົ້າ-ອອກລະບົບສາງຂອງພາສີ ທັງ 5 ປະເພດລະບົບສາງ ຕາມກົດໝາຍພາສີ ທີ່ຢູ່ພາຍໃຕ້ການຄຸ້ມຄອງຂອງຫ້ອງການພາສີປະຈໍາລະບົບສາງ, ເຂດເສດຖະກິດພິເສດ, ເຂດເສດຖະກິດອື່ນ ແລະດ່ານພາສີຊາຍແດນໃນຂອບເຂດທົ່ວປະເທດ.
ໂອກາດນີ້, ວິທະຍາກອນຈາກກົມພາສີ ກໍ່ໄດ້ຜັດປ່ຽນກັນຂຶ້ນເຜີຍແຜ່ເອກະສານຄຳແນະນຳທີ່ຕິດພັນກັບການນຳໃຊ້ລະບົບຄຸ້ມຄອງສາງພາສີທັນສະໄໝເປັນຕົ້ນ: ຂໍ້ຕົກລົງ ເລກທີ 0771/ກງ, ລົງວັນທີ 18/03/2025 ວ່າດ້ວຍການຮັບຮອງອຸປະກອນ, ລະບົບ ແລະມູນຄ່າການພັດທະນາລະບົບຄຸ້ມຄອງສາງພາສີທັນສະໄໝ, ຂໍ້ຕົກລົງເລກທີ 1197/ກງ, ລົງວັນທີ 11/04/2025 ວ່າດ້ວຍການແຕ່ງຕັ້ງຄະນະວິຊາການກົມພາສີ ເພື່ອໄປເຄື່ອນໄຫວຈັດຝຶກອົບຮົມ, ຕິດຕັ້ງຜັນຂະຫຍາຍເຄື່ອງອຸປະກອນຄົບຊຸດ, ແຈ້ງການແນະນຳເລກທີ 2755/ກງ, ລົງວັນທີ 31/07/2024 ກ່ຽວກັບການແຈ້ງພາສີໂດຍສັງເຂບລ່ວງໜ້າແລະຄຳແນະນຳເລກທີ 3865/ກພສ, ລົງວັນທີ 28/04/2025 ວ່າດ້ວຍການຄຸ້ມຄອງ, ນຳໃຊ້ລະບົບຄຸ້ມຄອງສາງພາສີທັນສະໄໝ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ