ທີ່ເດີ່ນພະທາດຫຼວງວຽງຈັນ ໃຫ້ກຽດເຂົ້າຮ່ວມຂອງທ່ານ ສອນໄຊ ສີພັນດອນ ນາຍົກລັດຖະມົນຕີ ບັນດາການນຳພັກ-ລັດຂັ້ນສູງ, ອະດີດການນໍາ, ຮອງເຈົ້າຄອງນະຄອນ ຫຼວງວຽງຈັນ, ທູຕານຸທູດ ແລະ ຕາງໜ້າອົງການຈັດຕັ້ງສາກົນ ພ້ອມດ້ວຍຄະ ນະຮັບຜິດຊອບຈັດງານ ແລະ ຊາວນະຄອນຫຼວງວຽງຈັນເຂົ້າຮ່ວມ.
ໃນພິທີທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງຈັນ ປະ ທານຄະນະກຳມະການຮັບຜິດຊອບຈັດງານໄດ້ລາຍງານກ່ຽວກັບການກະກຽມຈັດງານດັ່ງກ່າວ ພ້ອມທັງຍົກໃຫ້ເຫັນປະ ຫວັດຄວາມເປັນມາຂອງພະທາດຫຼວງວຽງຈັນ ທີ່ໄດ້ຕິດພັນກັບປະຊາຊົນລາວບັນດາເຜົ່າ ກໍຄືປະຊາ ຊົນຊາວນະຄອນຫຼວງວຽງຈັນແຕ່ອະດີດຈົນເຖິງປັດຈຸບັນ ສະແດງໃຫ້ເຫັນເຖິງຄວາມສາມັກຄີ ຮັກເຊື້ອແພງຊາດ ຂອງປະຊາຊົນລາວຢ່າງແທ້ຈິງ ຊຶ່ງໃນງານບຸນນະມັດສະການພະ ທາດຫຼວງປະຈຳປີນີ້ໄດ້ຈັດໃຫ້ມີຫຼາຍກິດຈະກໍາທີ່ ໜ້າສົນໃຈທັງຢູ່ເດີ່ນພະທາດຫຼວງ, ເດີ່ນສະໜາມຫຼວງ ແລະ ວາງສະແດງຂາຍສິນຄ້າ ຢູ່ສູນການຄ້າ ລາວ-ໄອເຕັກ ຊຶ່ງຈະດຳເນີນໄປຈົນຮອດວັນທີ 15 ພະຈິກ 2024 ໂດຍຕະຫຼອດການຈັດງານຈະມີການຄົບງັນຕາມປະເພນີອັນດີງາມຂອງຊາດລາວເຮົາ ເປັນຕົ້ນ ວັນທີ 13 ເວລາ 16:00 ໂມງ ຈະມີພິທີສູດປະລິດຕະມຸງຄຸນ ທີ່ກົມມະລຽນພະທາດຫຼວງ, ວັນທີ 14 ເວລາ 13:30 ໂມງ ຈະມີພິທີແຫ່ຜາສາດເຜິ້ງ, ວັນທີ 15 ເວລາ 7:00 ໂມງ ຈະມີພິທີໃສ່ບາດຖວາຍສັງກະທານ, ເວລາ 13:00 ໂມງ ຈະມີພິທີແຫ່ລູກຄີ ແລະ ການແຂ່ງຂັນກິລາພື້ນບ້ານຕີຄີ ແລະ ເວລາ 19:00 ໂມງ ຈະມີພິທີວຽນທຽນ ແລະ ຈູດທູບທຽນ, ຈູດບັ້ງໄຟເພື່ອສັກກະລະບູຊາອົງພະທາດ ພ້ອມນີ້ ຄະນະຮັບຜິດຊອບຈັດງານ ກໍຄື ນວ ຍັງຈັດໃຫ້ມີຫຼາຍກິດຈະກຳປິ່ນອ້ອມທັງຢູ່ເດີນສະໜາມຫຼວງ ແລະ ສູນການຄ້າລາວ-ໄອເຕັກ ເພື່ອຊຸກຍູ້ສົ່ງເສີມປີທ່ອງທ່ຽວລາວ 2024 ໃຫ້ຮັກສາໄດ້ວັດທະນະທຳອັນດີງາມ ເປັນຕົ້ນ ການປະດັບປະດາຮ້ານຄ້າໄດ້ຕົບແຕ່ງເປັນເອກະລັກຂອງລາວ ໂດຍສະເພາະ ດ້ານປະຕູໂຂງທາງເຂົ້າງານດ້ານເດີ່ນສະໜາມຫຼວງ ໄດ້ຕົບແຕ່ງປະດັບປະດາດ້ວຍແຄນຄຽງຄູ່ກັບກອງຫາງ ພ້ອມປະດັບປະດາດ້ວຍກະຕິບເຂົ້າໃຫຍ່ທີ່ເປັນເອກະລັກວັດທະນະທຳລາວຢ່າງສວຍງາມ ແລະ ອື່ນໆ.
ທັງນີ້ເພື່ອອະນຸລັກຮັກສາ ແລະ ສົ່ງເສີມວັດທະນະທຳ ຮີດຄອງປະເພນີອັນດີງາມ ໃນງານບຸນນະມັດ ສະການພະທາດຫຼວງຂອງຊາວລາວ ກໍຄື ຊາວນະຄອນຫຼວງວຽງຈັນ ທີ່ເຄີຍສືບທອດກັນມາແຕ່ບຸຮານນະການ ໃຫ້ມີຄວາມໂດດເດັ່ນ ແລະ ເປັນທີ່ຮັບຮູ້ໃນເວທີສາກົນ ທັງເປັນການສ້າງໂອກາດໃນການຈັດຕັ້ງປະຕິບັດ 2 ວາລະແຫ່ງຊາດ ກໍຄື ການຟື້ນຟູເສດຖະກິດ ດ້ວຍຮູບການຊຸກຍູ້ສົ່ງເສີ່ມການທ່ອງທ່ຽວ ສົ່ງເສີມການຄ້າ ສິນຄ້າຄອບຄົວຕົວແບບ ທີ່ຈະກ້າວເປັນສິນຄ້າໂອດັອບ ໄດ້ກາ ໝາຍແຫ່ງຊາດ ແລະ ສິນຄ້າຂອງບັນນດາວິສາຫະກິດຂະໜາດນ້ອຍ ແລະ ກາງ ມາວາງສະແດງ ຈຳໜ່າຍສິນຄ້າ ທັງພາຍໃນ ແລະ ຕ່າງປະເທດ ໃຫ້ປະຊາຊົນຊາວ ນວ ແລະ ແຂກຕ່າງປະເທດໄດ້ເຫັນ ແລະ ໄດ້ຊົມໃຊ້ສິນຄ້າພ້ອມທັງເປັນການແລກປ່ຽນບົດຮຽນ ແລະ ປະສົບການຕ່າງໆຂອງບັນດາຫົວໜ່ວຍທຸລະກິດດ້ວຍກັນ.
ໂອການີ້, ທ່ານ ສອນໄຊ ສີພັນດອນ ຍັງໄດ້ຂຶ້ນມີຄຳເຫັນກ່າວເປີດງານ ສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບຈັດງານ ພ້ອມທັງຮຽກຮ້ອງ ໃຫ້ເອົາໃຈໃສ່ຮັກສາຄວາມສະຫງົບ ຄວາມປອດໄພ ແລະ ເປັນລະບຽບຮຽບຮ້ອຍ ເພື່ອເຮັດໃຫ້ການຈັດງານຄັ້ງນີ້ມີຜົນສຳເລັດຢ່າງຈົບງາມ ຈາກນັ້ນໄດ້ໃຫ້ກຽດຮ່ວມຕັດແຖບຜ້າ ພ້ອມລັ່ນຄ້ອງ 9 ບາດ ເພື່ອເປີດງານບຸນນະມັດສະການພະທາດຫຼວງ ແລະ ງານວາງສະແດງສິນຄ້າ ປະຈຳປີ 2024 ຢ່າງເປັນທາງການ ແລະ ຮ່ວມຊົມການວາງແດງສິນຄ້າໂອດັອບຂອງປະຊາຊົນທີ່ມາວາງສະແດງໃນງານດັ່ງກ່າວຕື່ມອີກ.
ຂ່າວ-ພາບ: ບຸນອູ້ມ
ຄໍາເຫັນ