 |
ບຸນພະທາດຫຼວງປີນີ້ ໄດ້ກໍານົດຂອບເວລາໃນການດໍາເນີນພິທີທາງສາສະໜາ ງານວາງສະແດງສິນຄ້າ ແລະ ບັນດາກິດຈະກໍາປິ່ນອ້ອມທາງການ ແກ່ຍາວເປັນເວລາ 5 ວັນ, ສໍາລັບກິດຈະກໍາຕ່າງໆ ຈະໄດ້ຈັດຂຶ້ນຢູ່ເດີນພະທາດຫຼວງວຽງຈັນ ແລະ ສູນການຄ້າລາວ-ໄອເຕັກ ໂດຍເລີ່ມແຕ່ວັນທີ 1 ພະຈິກ 2025 ນີ້ ຊຶ່ງເປັນມື້ເປີດງານ ມື້ຕໍ່ໄປແມ່ນສືບຕໍ່ຄົບງັນ ຊຶ່ງຈະມີບັນດາກິດຈະກໍາທາງສາສະໜາຄື: ຕອນແລງວັນທີ 3 ພະຈິກ ມີພິທີສູດປະລິຕະມຸງຄຸນ ທີ່ດ້ານໃນກົມມະລຽນພະທາດຫຼວງວຽງຈັນ; ໃນຕອນບ່າຍວັນທີ 4 ພະຈິກ ຈະມີພິທີແຫ່ຜາສາດເຜີ້ງ ແລະ ມື້ສຸດທ້າຍຕອນເຊົ້າ ວັນທີ 5 ພະຈິກ ມີພິທີໃສ່ບາດ. ຈາກນັ້ນ, ຕອນບ່າຍມີພິທີແຫ່ລູກຄີ ແລະ ແຂ່ງຂັນກິລາພືື້ນບ້ານ (ຕີຄີ). ຈາກນັ້ນ, ໃນຕອນຄໍ່າ ແມ່ນພິທີວຽນທຽນ ຖືວ່າສິ້ນສຸດຢ່າງເປັນທາງການ ຊຶ່ງຕະຫຼອດໄລຍະ 5 ວັນ ແມ່ນໄດ້ເປີດໃຫ້ມວນຊົນທັງພາຍໃນ ແລະ ຕ່າງປະເທດ ເຂົ້າທ່ຽວຊົມງານ ແລະ ກິດຈະກໍາປິ່ນອ້ອມທັງໝົດ ຈະເລີ່ມແຕ່ເວລາ 7:30 ໂມງເຊົ້າ ຈົນຮອດເວລາ 23:30 ໂມງ.
ໂອກາດນີ້, ທ່ານ ກິແກ້ວ ໄຂຄໍາພິທູນ ໄດ້ກ່າວວ່າ: ພິທີເປີດງານບຸນນະມັດສະການພະທາດຫຼວງວຽງຈັນ ແລະ ງານວາງສະແດງສິນຄ້າ ປະຈຳປີ 2025 ຊຶ່ງເປັນເຫດການທີ່ສໍາຄັນໃນປີ 2025 ໂດຍຕິດພັນກັບການສະເຫຼີມສະຫຼອງວັນສໍາຄັນຕ່າງໆ ຂອງພັກ, ຂອງຊາດ ທັງເປັນປີແຫ່ງການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XI ຂອງພັກ ທີ່ຍາດມາໄດ້ຜົນສໍາເລັດ ທີ່ສໍາຄັນພົ້ນເດັ່ນ ໃນທຸກຂົງເຂດວຽກງານ, ສະເພາະນະຄອນຫຼວງວຽງຈັນ ການພັດທະນາເສດຖະກິດ-ສັງຄົມ ກໍມີຜົນສໍາເລັດທີ່ໜ້າເພິ່ງພໍໃຈ ແລະ ມີທ່ວງທ່າຂະຫຍາຍຕົວຢ່າງຕໍ່ເນື່ອງ, ພິເສດເປັນການກະກຽມກ້າວເຂົ້າສູ່ງານກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ ເປັນເຈົ້າພາບ ແລະ ກະກຽມຄວາມພ້ອມຮອບດ້ານ ເພື່ອກ້າວສູ່ກອງປະຊຸມໃຫຍ່ ຄັ້ງທີ XII ຂອງພັກ ທີ່ຈະໄດ້ຈັດຂຶ້ນໃນຕົ້ນປີ 2026.
ໃນການຈັດງານບຸນນະມັດສະການພະທາດຫຼວງວຽງຈັນ ແລະ ງານວາງສະແດງສິນຄ້າປະຈໍາປີ 2025 ປີນີ້ ອົງການປົກຄອງນະຄອນຫຼວງວຽງຈັນ, ການຈັດຕັ້ງທຸກຂັ້ນ ໄດ້ຮ່ວມແຮງຮ່ວມໃຈກັບຊາວຄ້າຂາຍ ແລະ ປວງຊົນຊາວນະຄອນຫຼວງວຽງຈັນ ທຸກທົ່ວໜ້າ ໂດຍສຸມໃສ່ກະກຽມ ແລະ ຈັດງານບຸນເປັນຮີດຄອງປະເພນີທີ່ສືບທອດກັນມານັບບູຮານນະການ ຕັ້ງແຕ່ມີພະທາດຫຼວງມາຫຼາຍຮ້ອຍປີ. ງານບຸນດັ່ງກ່າວ ເປັນອີກກິດຈະກຳໜຶ່ງລະດັບຊາດ ທີ່ມີຫຼາຍກິດຈະກຳໂດດເດັ່ນທີ່ແນໃສ່ປົກປັກຮັກສາ ແລະ ສົ່ງເສີມຮີດຄອງປະເພນີອັນດີງາມຂອງຊາດ ໃຫ້ຄົງຢູ່ຕະຫຼອດໄປ, ທັງປະສົມປະສານເຂົ້າກັບຍຸກສະໄໝພັດທະນາ ເພື່ອກ້າວຂຶ້ນໄປເລື້ອຍໆ.
 |
ເຊື່ອແນ່ວ່າການຈັດງານບຸນນະມັດສະການພະທາດຫຼວງ ແລະ ງານວາງສະແດງສິນຄ້າປະຈໍາປີ 2025 ຈະເປັນການສືບສານປະເພນີອັນດີງາມຂອງຊາດ, ການສົ່ງເສີມສິນຄ້າພາຍໃນ ແລະ ຕ່າງປະເທດ ທັງຈະເປັນການດຶງດູດນັກທ່ອງທ່ຽວພາຍໃນ ແລະ ຕ່າງປະເທດ ທີ່ຈະເດີນທາງເຂົ້າມາທ່ຽວງານບຸນ ແລະ ທ່ຽວຊົມສະຖານທີ່ທ່ອງທ່ຽວສໍາຄັນ ພາຍໃນນະຄອນຫຼວງວຽງຈັນ ກໍຄື ສປປ ລາວ ໃຫ້ນັບມື້ນັບຫຼາຍຂຶ້ນ. ຂ້າພະເຈົ້າ ຂໍຖືເອົາໂອກາດນີ້ ຮຽກຮ້ອງພາກສ່ວນສື່ມວນຊົນທັງຫຼາຍ ແລະ ເຈົ້າພາບງານບຸນທີ່ສໍາຄັນນີ້ ຈົ່ງຮ່ວມກັນໂຄສະນາເຜີຍແຜ່ຮີດຄອງປະເພນີອັນດີງາມຂອງຊາດລາວ ໃຫ້ແຂກທັງພາຍໃນ ແລະ ຕ່າງປະເທດ ຢ່າງກວ້າງຂວາງ, ຂໍເຊີນມາຍັງທຸກພາກສ່ວນ ທັງພາກລັດ, ເອກະຊົນ, ບັນດາອົງການຈັດຕັ້ງສາກົນ ລວມທັງປະຊາຊົນລາວບັນດາເຜົ່າ ຈົ່ງພ້ອມກັນໃຫ້ການຮ່ວມມືສະໜັບສະໜູນ ການຈັດງານບຸນນະມັດສະການພະທາດຫຼວງວຽງຈັນ ໃນຄັ້ງນີ້ ໃຫ້ມີບັນຍາກາດຟົດຟື້ນມ່ວນຊື່ນຕະຫຼອດງານ ແລະ ຮັບປະກັນໄດ້ຄວາມສະຫງົບປອດໄພ ຮອບດ້ານ.
(ຂ່າວ: ຍຸພິນທອງ)
ຄໍາເຫັນ