 |
ໃນພິທີ, ທ່ານ ສົມໄໝ ພົມມະຈັນ ອຳນວຍການສຳນັກພິມດີບຸກ ລາຍງານໃຫ້ຮູ້ວ່າ: ງານມະຫະກຳໜັງສື ແລະ ວັດທະນະທຳນານາຊາດຄັ້ງນີ້, ມີຫ້ອງວາງສະແດງທັງໝົດ 75 ຫ້ອງ. ໃນນີ້, ຍັງມີຫ້ອງວາງ ສະແດງຈາກສະຖານທູດຫວຽດນາມ, ການາດາ, ອິນເດຍ ແລະ ກຳປູເຈຍ ແລະ ອີກຫຼາຍໆພາກສ່ວນສາກົນ ໄດ້ນໍາເອົາວັດທະນະທຳ ແລະ ແຫຼ່ງທຶນການສຶກສາ ມາເປີດໂລກໃຫ້ຊາວໜຸ່ມລາວຕື່ມອີກ. ງານໃນຄັ້ງນີ້, ຍັງເປັນເວທີ ທີ່ສອດຄ່ອງກັບແຜນຍຸດທະສາດການພັດທະນາຊັບພະຍາກອນມະນຸດຂອງລັດຖະບານ ເພື່ອສົ່ງເສີມໃຫ້ປະຊາກອນລາວ 2 ໃນ 3 ກາຍເປັນຜູ້ທີ່ຮັກການອ່ານ ພາຍໃນປີ 2030. ທັງເປັນການສົ່ງເສີມວັດທະນະທຳການອ່ານ ແລະ ຍົກລະດັບວົງການໜັງສືລາວສູ່ເວທີສາກົນ ແລະ ເປັນການຮ່ວມສະເຫຼີມສະຫຼອງວັນສຳຄັນຕ່າງໆເຊັ່ນ: ວັນສ້າງຕັ້ງ ມຊ ຄົບຮອບ 30 ປີ, ວັນແມ່ຍິງສາກົນ ຄົບຮອບ 116 ປີ, ວັນກະວີໂລກ ແລະ ວັນສ້າງຕັ້ງພັກປະຊາຊົນ ປະຕິວັດລາວ ອີກດ້ວຍ.
 |
ພາຍໃນງານ, ນອກຈາກຈຳໜ່າຍໜັງສືແລ້ວ, ຍັງມີກິດຈະກຳຕ່າງໆອີກຫຼາຍລາຍການເຊັ່ນ: ການເປີດໂຕປຶ້ມໃໝ່ 18 ເຫຼັ້ມ, ການເສວະນາ ແລະ ບັນຍາຍພິເສດ 8 ລາຍການ (ຈາກນັກທຸລະກິດ, ນັກຂຽນລາງວັນຊີໄຣ ແລະ ວິທະຍາກອນຜູ້ຊົງຄຸນວຸດທິ). ພ້ອມນີ້, ຍັງຈະເປີດໂຄງການ “ເສີມສ້າງຄວາມພ້ອມດ້ານການລົງທຶນ ສຳລັບຜູ້ປະກອບການຍິງໃນ ສປປ ລາວ”, ກິດຈະກຳເດີນແບບປຶ້ມ ແລະ ການສະແດງສິລະປະວັດທະນະທຳ ຈາກນັກຮຽນ-ນັກສຶກສາ. ງານມະຫະກຳໜັງສື ແລະ ວັດທະນະທຳນານາຊາດ ຄັ້ງທີ VI ປະຈຳປີ 2026 ເລີ່ມເປີດເວລາ 9:00-17:00 ໂມງ ສາມາດເຂົ້າຮ່ວມທ່ຽວຊົມ, ຊື້ໜັງສື ແລະ ຮ່ວມກິດຈະກຳຕ່າງໆໄດ້ ໂດຍບໍ່ເສຍຄ່າເຂົ້າຊົມ.
 |
ຂ່າວ-ພາບ: ທະນູທອງ
ຄໍາເຫັນ