ທ່ານ ຈິດຕະກອນ ສີຊານົນ ໄດ້ກ່າວວ່າ: ໂຄງການພັດທະນາສີມືແຮງງານກະສິກໍາທັນສະໄໝຈີນ-ລາວ ແມ່ນການຕັດສິນໃຈສູງຂອງການນໍາທັງສາມສະຖາບັນການສຶກສາຄື: ວິທະຍາໄລເຕັກນິກກະສິກໍາດົງຄໍາຊ້າງ ແລະ ມະຫາ ວິທະຍາໄລແຫ່ງຊາດລາວ (ມຊ) ພາຍໃຕ້ການສະໜັບສະໜູນຂອງກະຊວງ ສສກ ແລະ ມະຫາວິທະຍາໄລເຕັກນິກ-ວິຊາຊີບກະສິກໍາກວາງຊີ ແລະ ພະແນກສຶກສາທິການແຂວງກວາງຊີ ກໍຄືລັດຖະບານແຫ່ງ ສປ ຈີນ ທີ່ເຮັດໃຫ້ການຮຽນ-ການສອນພາຍໃນວິທະຍາໄລເຕັກນິກກະສິກໍາດົງຄໍາຊ້າງ ມີຄວາມກະຕືລືລົ້ນ ຫຼື ຄວາມສົນໃຈຂອງນັກສຶກສາຕໍ່ການຮຽນພາສາຈີນ ໄປຄຽງຄູ່ກັບວິຊາສະເພາະ ເຫັນວ່າມີບັນຍາກາດ ແລະ ເປັນອັນໃໝ່ສໍາລັບນັກສຶກສາຂອງພວກເຮົາ. ເພື່ອເຮັດໃຫ້ຂະບວນການຮຽນ-ການສອນມີຄຸນນະພາບຫຼາຍຂຶ້ນນັ້ນ. ໃນຕໍ່ໜ້ານີ້, ທາງວິທະຍາໄລຂອງພວກເຮົາມີຄວາມຈໍາເປັນຕ້ອງໄດ້ປັບປຸງຫຼາຍດ້ານເຊັ່ນ: ການຮຽນ-ການສອນພາຈີນໃຫ້ນັກສຶກສາລາວ ຢູ່ວິທະຍາໄລເຕັກນິກກະສິກໍາດົງຄໍາຊ້າງ ແລະ ຈໍາເປັນຕ້ອງໄດ້ເພີ່ມການເອົາໃຈໃສ່ເປັນພິເສດ ແລະ ຕ້ອງການໃຫ້ມີການຮ່ວມມືຈາກຝ່າຍຈີນຢ່າງຕໍ່ເນື່ອງ, ການສົ່ງເສີມ ຫຼື ພັດທະນາຖານການຜະລິດໃຫ້ກາຍເປັນສະຖານທີ່ຝຶກພາກປະຕິບັດກະສິກໍາທັນໄໝ ເພື່ອສ້າງເງື່ອນໄຂໃຫ້ນັກສຶກສາໄດ້ຮຽນຮູ້ພາກປະຕິບັດໃຫ້ຫຼາຍຂຶ້ນນັ້ນ. ຍັງຕ້ອງການຄວາມຊ່ວຍເຫຼືອດ້ານເຕັກນິກວິຊາການຈາກຝ່າຍຈີນ ໂດຍສະເພາະລະບົບຕ່າງໆທີ່ກ່ຽວຂ້ອງກັບການຜະລິດພືດໃນເຮືອນຮົ່ມ, ການຮ່ວມມືໃນວຽກງານການຄົ້ນຄວ້າ ແລະ ພັດທະນາຫຼາຍດ້ານ ໂດຍສະເພາະການປັບປຸງແນວພັນພືດ ແລະ ພັນສັດ ຍັງມີຄວາມຈໍາເປັນຕ້ອງໄດ້ຮັບການຮ່ວມມື ແລະ ສົ່ງເສີມຈາກຝ່າຍຈີນໃຫ້ຫຼາຍຂຶ້ນ. ໂຄງການພັດທະນາສີມືແຮງງານກະສິກໍາທັນສະໄໝຈີນ-ລາວ ໄດ້ຮັບການລິເລີ່ມໃນປີ 2023 ໂດຍການຮ່ວມມືຂອງ 3 ຝ່າຍ ຫຼື ສະຖາບັນການສຶກສາລະດັບສູງຂອງ ສປປ ລາວ ແລະ ສປ ຈີນ ຊຶ່ງຝ່າຍ ສປປ ລາວ ປະກອບມີວິທະຍາໄລເຕັກນິກກະສິກໍາດົງຄໍາຊ້າງ ພາຍໃຕ້ການຊີ້ນໍາໂດຍກົງຂອງກົມອາຊີວະສຶກສາ ແລະ ກົມຮ່ວມມືກັບຕ່າງປະເທດຂອງກະຊວງ ສສກ ໂດຍມີຄູ່ຮ່ວມພັດທະນາແມ່ນຄະນະກະເສດສາດ ມຊ, ສ່ວນຝ່າຍ ສປ ຈີນ ແມ່ນມະຫາວິທະຍາໄລເຕັກນິກ-ວິຊາຊີບກະສິກໍາກວາງຊີ ພາຍໃຕ້ການຊີ້ນໍາຂອງພະແນກສຶກສາທິການແຂວງກວາງຊີ. ໂຄງການດັ່ງກ່າວມີໄລຍະເວລາການຮ່ວມມື 3 ປີ, ຈຸດປະສົງເພື່ອສ້າງ ແລະ ຝຶກທັກສະສີມືແຮງງານກະສິກໍາທີ່ທັນສະໄໝໃຫ້ ສປປ ລາວ ໂດຍການຊ່ວຍເຫຼືອຈາກຜູ້ຊ່ຽວຊານ ແລະ ນັກວິຊາການ ສປ ຈີນ.
ທ່ານ ຊິນ ກ່າງ ໄດ້ກ່າວວ່າ: ໂຄງການພັດທະນາສີມືແຮງງານກະສິກໍາທັນສະໄໝຈີນ-ລາວ ແມ່ນຮູບແບບ
“ລັດຮ່ວມກັບວິສາຫະກິດ" ເປັນຜູ້ສ້າງໂດຍລັດຖະບານເປັນຜູ້ນໍາພາ ແລະ ເປັນເວທີວິສາຫະກິດອຸດສາຫະກຳ, ວິທະຍາ ໄລ, ສະຖາບັນຕ່າງໆເຂົ້າມາຮ່ວມມືກໍ່ສ້າງບຸກຄະລາກອນ, ຮ່ວມກັນຄົ້ນຄວ້າສົ່ງເສີມນໍາໃຊ້ອະຊີວະສຶກສາ ແລະ ມາດ ຕະຖານກະສິກຳ, ຮ່ວມກັນສາທິດນໍາໃຊ້, ດຶງເອົາອາຈານ ແລະ ນັກສຶກສາ, ຊ່າງສີມືເຂົ້າມາຮ່ວມ, ເປັນສູນລວມກໍ່ສ້າງບຸກຄະລາກອນ, ການຄົ້ນຄ້ວາຮູບແບບວິທະຍາສາດ, ໃຫ້ບໍລິການສັງຄົມ, ເປັນບ່ອນແລກປ່ຽນບົດຮຽນ ແລະ ອື່ນໆ, ສ້າງພື້ນຖານໃຫ້ການຮ່ວມມືທາງດ້ານການສຶກສາ, ອາຊີບກະສິກຳໃນປະເທດອາຊຽນໃຫ້ສູງຂຶ້ນຮອດປີ 2026, ການຮັບສະໝັກນັກສຶກສາຈະບໍ່ຕໍ່າກວ່າ 150 ຄົນ, ຈັດຝຶກອົບຮົມໃຫ້ວິຊາການກະສິກຳປະເທດອາຊຽນໃຫ້ໄດ້ຫຼາຍກວ່າ 1,500 ຄົນ, ຮ່ວມກັບຂ້າງນອກ ແລະ ບໍລິສັດສ້າງອະຊີວະສຶກສາ ແລະ ເຕັກນິກກະສິກຳໃຫ້ໄດ້ 79 ໂຄງການ, ຝຶກອົບຮົມອາຈານໃຫ້ໄດ້ຫຼາຍກວ່າ 50 ເທື່ອຄົນ, ນໍາເຂົ້າແນວພັນພືດກະສິກຳໃຫ້ໄດ້ຫຼາຍກວ່າ 60 ແນວພັນ, ສົ່ງເສີມນໍາໃຊ້ແນວພັນ 16 ແລະ ເຕັກນິກໃຫ້ໄດ້ຫຼາຍກວ່າ 667 ເຮັກຕາ. ພາຍຫຼັງສ້າງຕັ້ງສະຖາບັນສີມືແຮງງານກະສິກຳທັນສະໄໝມາໄດ້ 1 ປີກວ່າ, ມາຮອດເດືອນພຶດສະພາ 2025 ສໍາເລັດລະບົບການຮຽນ-ການສອນຂັ້ນພື້ນຖານ ໂດຍເອົາຮູບແບບ “ພາສາຈີນບວກທັກສະຄວາມສາມາດເຕັກນິກກະສິກຳ" ເປັນເອກະລັກສ້າງບຸກຄະລາກອນລະບົບການຝຶກອົບຮົມວິຊາການ, ປັດ ຈຸບັນໄດ້ຮັບນັກສຶກສໍາເລັດແລ້ວຈໍານວນ 100 ຄົນ, ມີນັກສໍາມະນາກອນເຂົ້າຮ່ວມຝຶກອົບຮົມທັງໝົດຈໍານວນ 1,103 ຄົນ.
ຂ່າວ: ບຸນອູ້ມ; ພາບ: ບຸນຕອມ
ຄໍາເຫັນ