ເປີດສະມາຄົມນັກວັດແທກ ແລະ ແຜນທີ່ລາວຢ່າງເປັນທາງການ

ໃນພິທີ, ທ່ານ ກອງຄຳ ສຸລິຍາ ປະທານສະມາຄົມນັກວັດແທກ ແລະ ແຜນທີ່ລາວ ໄດ້ກ່າວວ່າ:ສະມາຄົມນັກວັດແທກ ແລະ ແຜນທີ່ລາວແມ່ນການຈັດຕັ້ງທາງສັງຄົມໜຶ່ງ, ບໍ່ແມ່ນການຈັດຕັ້ງລັດຖະ ບານ, ສະມາຄົມໂດຍບໍ່ຫວັງຜົນກຳໄລ ຊຶ່ງໄດ້ລວມເອົາບັນດາບຸກຄົນທີ່ມີອາຊີບເປັນນັກວັກແທກ ແລະ ນັກແຜນທີ່ທົ່ວປະເທດ, ສະມາຄົມມີຈຸດປະສົງເພື່ອເຕົ້າໂຮມຄວາມສາມັກຄີ, ຄຸ້ມຄອງ ແລະ ສົ່ງເສີມນັກວັດແທກ ແລະ ແຜນທີ່ລາວຜູ້ອາວຸໂສ, ບຳນານ ແລະ ຜູ້ປະຈຳການ.

ຈຸດປະສົງການເຄື່ອນໄຫວຂອງສະມາຄົມແມ່ນປະກອບສ່ວນຢ່າງຕັ້ງໜ້າເຂົ້າໃນການປົກປັກຮັກສາ ແລະ ພັດທະນາປະເທດຊາດຢ່າງຕັ້ງໜ້າ, ດ້ວຍການຮ່ວມມືນັກວິຊາການ ຜູ້ຊຳນານງານ ເພື່ອແລກປ່ຽນປະສົບປະການ, ຄົ້ນຄວ້າ ແລະ ນໍາໃຊ້ບາງບົດຮຽນຂອງຕ່າງປະເທດ ແລະ ອົງການຈັດຕັ້ງສາກົນ, ປຶກ ສາຫາລື ແລະ ຄົ້ນຄວ້າດ້ານເຕັກນິກກ່ຽວກັບວຽກງານການສໍາຫຼວດ ວັດແທກ, ຖ່າຍພາບທາງອາກາດ ແລະ ສ້າງແຜນທີ່ຕາມການມອບໜາຍຂອງການຈັດຕັ້ງລັດທີ່ກ່ຽວຂ້ອງ, ເຕົ້າໂຮມຄວາມສາມັກຄີ ແລະ ເປັນເອກະພາບພາຍໃນສະມາຊິກ ພ້ອມກັນຮັກສາ ແລະ ສົ່ງເສີມ ເຊີດຊູໄວ້ກຽດ ແລະ ສັກສີ ແຫ່ງວິຊາຊີບວັດແທກ, ຖ່າຍພາບທາງອາກາດ ແລະ ສ້າງແຜນທີ່ ເພື່ອຈັດຕັ້ງປະຕິບັດກິດຈະກຳອັນເປັນປະໂຫຍດຕໍ່ທາງດ້ານວິຊາການຂອງສະມາຊິກ ແລະ ສັງຄົມ, ສົ່ງເສີມຄວາມຮູ້, ເຕັກໂນໂລຊີທີ່ທັນສະໄໝໃຫ້ບຸກຄົນຜູ້ທີ່ມີອາຊີບກ່ຽວກັບການວັດແທກ, ຮູບຖ່າຍທາງອາກາດ ແລະ ແຜ່ນທີ່ ໃຫ້ໄດ້ເຄື່ອນໄຫວເປັນປົກກະຕິທາງດ້ານວິຊາການວັດແທກ ແລະ ສ້າງແຜນທີ່ຈາກຜູ້ທີ່ມີປະສົບການມາຫຼາຍສີບປີ ທັງຜູ້ທີ່ສັງກັດໃນການ ຈັດຕັ້ງລັດ, ຜູ້ປະກອບອາຊີບໃນບໍລິສັດ, ຫົວໜ່ວຍທຸລະກິດ ລວມທັງຜູ້ອາວຸໂສບຳນານທີ່ສະໝັກໃຈຈັດຕັ້ງປະຕິບັດກິດຈະກຳຕ່າງໆ ເຊັ່ນ: ຈັດກອງປະຊຸມປຶກສາຫາລືທາງດ້ານເຕັກນິກ, ປຶກສາຫາລືໃນຂະແໜງ ການເຄື່ອນໄຫວ, ເປັນຊ່ຽວຊານ ແລະ ທີ່ປຶກສາກ່ຽວກັບວຽກງານສໍາຫຼວດວັດແທກ, ຖ່າຍພາບທາງອາກາດ ແລະ ສ້າງແຜນທີ່ໃຫ້ແກ່ການຈັດຕັ້ງຕ່າງໆ ແລະ ສັງຄົມ, ຮ່ວມມືກັບບັນດາອົງການຈັດຕັ້ງຂອງລັດ, ສະຖາບັນການສຶກສາ ແລະ ສະມາຄົມທີ່ກ່ຽວຂ້ອງທັງພາຍໃນ ແລະ ຕ່າງປະເທດ ເພື່ອພັດທະນາ ແລະ ຮ່ວມມື ເພື່ອແລກປ່ຽນປະສົບປະການ ແລະ ຍາດແຍ່ງການຊ່ວຍເຫຼືອຕ່າງໆ, ສະໜັບສະໜູນໃຫ້ມີກອງທຶນສະຫວັດດີການພາຍໃນສະມາຊິກ ເພື່ອຊ່ວຍເຫຼືອ ຊຶ່ງກັນ ແລະ ກັນ.

ໃນວາລະຂອງກອງປະຊຸມຄັ້ງນີ້ໄດ້ຜ່ານຂໍ້ຕົກລົງອະນຸຍາດສ້າງຕັ້ງ ສວຜລ, ຜ່ານກົດລະບຽບຂອງສະມາຄົມ ສວຜລ, ຜ່ານແຜນການເຄື່ອນໄຫວ ແລະ ໂຄງຮ່າງຍຸດທະສາດ ແລະ ບັນດາຜູ້ເຂົ້າຮ່ວມຍັງໄດ້ປຶກສາຫາລື ແລະ ປະກອບຄຳເຫັນຕໍ່ສະມາຄົມດັ່ງກ່າວ ເພື່ອເຮັດໃຫ້ການເຄື່ອນໄຫວວຽກງານສະມາຄົມໄດ້ມີຜົນສຳເລັດຕາມລະດັບຄາດໝາຍ, ໃນໂອກາດດັ່ງກ່າວກໍໄດ້ມີການເປີດປ້າຍ ສວຜລ ຢ່າງເປັນທາງການ.

(ຂ່າວ-ພາບ: ສຳນານ)