ໂດຍ: ສ.ບຸດປະຊາ
ຄົບຮອບ 69 ປີ, ວັນສ້າງຕັ້ງພັກປະຊາຊົນປະຕິວັດລາວ (22/3/1955-22/3/2024) ບັນດາພະນັກງານ-ສະມາຊິກພັກ, ທະຫານ, ຕໍາຫຼວດ ຕະຫຼອດຮອດປະຊາຊົນລາວທຸກຊັ້ນຄົນ ຕາງກໍສະແດງຄວາມຮູ້ສຶກ ແລະ ຍ້ອງຍໍຊົມເຊີຍຕໍ່ການນໍາພາຂອງພັກໃນໄລຍະຜ່ານມາ ຢ່າງເປັນຂະບວນຟົດຟື້ນ; ທ່ານ ສົມຫວັງ ພິມມະວົງ ຫົວໜ້າກົມປ່າໄມ້ ກະຊວງກະສິກຳ ແລະ ປ່າໄມ້ ກໍແມ່ນຜູ້ໜຶ່ງ ຊຶ່ງໄດ້ໃຫ້ສຳພາດທີ່ກົມປ່າໄມ້ ເມື່ອວັນທີ 21 ມີນາຜ່ານມາ ວ່າ: ມີຄວາມເອກອ້າງທະນົງໃຈ ແລະ ເຫັນແຈ້ງວ່າ “ພັກເຮົາໄດ້ປະຕິບັດພາລະບົດບາດຂອງຕົນຢ່າງສົມກຽດກັບຄວາມຮັກແພງ ແລະ ຄວາມເຊື່ອຖືຂອງປະຊາຊົນບັນດາເຜົ່າ; ການນໍາພາ-ຊີ້ນໍາ ຂະແໜງປ່າໄມ້ມີອັນພົ້ນເດັ່ນ ໂດຍສະເພາະແມ່ນຄວາມເອົາໃຈໃສ່ນຳພາ-ຊີ້ນຳການຈັດຕັ້ງປະຕິບັດວຽກງານຄຸ້ມຄອງປົກປັກຮັກສາປ່າໄມ້ ໄປຕາມທິດສີຂຽວ ແລະ ເປັນມິດຕໍ່ສິ່ງແວດລ້ອມ”.
ທ່ານ ສົມຫວັງ ພິມມະວົງ ກ່າວວ່າ: ຕະຫຼອດໄລຍະເວລາ 69 ປີຜ່ານມາ, ພັກເຮົາ ຍາມໃດກໍໄດ້ຍົກສູງຈິດໃຈຕໍ່ສູ້ອັນກ້າແກ່ນ, ເດັດຂາດບໍ່ຍອມຈຳນົນ; ຍາມໃດກໍມີຄວາມບໍລິສຸດຜຸດຜ່ອງ ຕໍ່ຜົນປະໂຫຍດຂອງຊົນຊັ້ນ ແລະ ຂອງຊາດເຮົາຢູ່ສະເໝີ, ພັກເຮົາບໍ່ມີວັດຖຸປະສົງອື່ນໃດ, ນອກຈາກເຮັດທຸກສິ່ງທຸກຢ່າງເພື່ອໃຫ້ປະຊາຊົນ ໄດ້ຢູ່ດີ ກິນດີ, ມີຄວາມຜາສຸກ ແລະ ເພື່ອໃຫ້ປະເທດຊາດຮັ່ງມີ, ເຂັ້ມແຂງ, ສັງຄົມມີຄວາມສີວິໄລ ແລະ ຍຸຕິທຳ. ພ້ອມດຽວກັນນີ້, ພຶດຕິກຳໃນຕະຫຼອດໄລຍະຜ່ານມາ ໄດ້ຢັ້ງຢືນໃຫ້ເຫັນຢ່າງຈະແຈ້ງວ່າ “ພັກເຮົາເປັນປັດໄຈພື້ນຖານ ທີ່ຕັດສິນກວ່າໝູ່ ຕໍ່ຜົນສຳເລັດຂອງການປະຕິວັດຢູ່ປະເທດເຮົາ”. ນັບແຕ່ສ້າງຕັ້ງຂຶ້ນມາ, ພັກໄດ້ເຕີບໃຫຍ່ຂະຫຍາຍຕົວ ແລະ ໄດ້ແບກຫາບພາລະກຳປະຫວັດສາດ ອັນຍິ່ງໃຫຍ່ໃນແຕ່ລະໄລຍະ ທີ່ແຕກຕ່າງກັນ ແລະ ກໍມີຄວາມເອກອ້າງທະນົງໃຈເປັນຢ່າງຍິ່ງ ທີ່ເຫັນວ່າ: “ພັກເຮົາໄດ້ສາມາດປະຕິບັດພາລະກຳປະຫວັດສາດເຫຼົ່ານັ້ນ ໄດ້ສຳເລັດຢ່າງສະຫງ່າງາມ”. ຜົນງານໃຫຍ່ຫຼວງພົ້ນເດັ່ນໃນໄລຍະໃໝ່ນີ້, ແມ່ນພັກໄດ້ມີຄວາມສະດຸ້ງໄວ, ມີການປ່ຽນແປງໃໝ່ການນໍາພາຂອງຕົນ ໃຫ້ສອດຄ່ອງກັບສະພາບຄວາມເປັນຈິງຂອງປະເທດຊາດ ແລະ ສາກົນ ດ້ວຍການວາງແນວທາງປ່ຽນແປງໃໝ່ຮອບດ້ານ ທີ່ມີຫຼັກການ ຊຶ່ງສາມາດປົກປັກຮັກສາຄວາມເປັນເອກະລາດ, ອຳນາດອະທິປະໄຕ ແລະ ຜືນແຜນດິນອັນຄົບຖ້ວນຂອງປະເທດຊາດໄວ້ຢ່າງໝັ້ນຄົງ.
ສະເພາະຂະແໜງປ່າໄມ້ມີອັນພົ້ນເດັ່ນ ກໍຄືນໍາພາ-ຊີ້ນໍາ ການຄຸ້ມຄອງ, ປົກປັກຮັກສາ, ນໍາໃຊ້ ແລະ ພັດທະນາປ່າໄມ້ ຊຶ່ງໄດ້ເອົາໃຈໃສ່ນຳພາ-ຊີ້ນຳການຈັດຕັ້ງປະຕິບັດວຽກງານຄຸ້ມຄອງປົກປັກຮັກສາປ່າໄມ້ ໄປຕາມທິດສີຂຽວ ແລະ ເປັນມິດຕໍ່ສິ່ງແວດລ້ອມ ໂດຍຖືເອົາການສຳຫຼວດ, ກຳນົດເນື້ອທີ່ດິນປ່າໄມ້, ທົບທວນຄືນເນື້ອທີ່ປ່າປ້ອງກັນແຫ່ງຊາດ, ປ່າສະຫງວນ-ອຸທິຍານແຫ່ງຊາດ, ປ່າຜະລິດ ໂດຍການສ້າງ ແລະ ປັບປຸງບັນດານິຕິກຳ, ການສ້າງແຜນຄຸ້ມຄອງ, ການລົງທຶນ, ການປະຕິບັດສົນທິສັນຍາ ແລະ ອະນຸສັນຍາສາກົນ ທີ່ ສປປ ລາວ ເປັນພາຄີ ເພື່ອຄຸ້ມຄອງ ແລະ ພັດທະນາ 3 ປະເພດປ່າດັ່ງກ່າວ ແລະ ການຄຸ້ມຄອງຊີວະນາໆພັນທີ່ໃກ້ຈະສູນພັນ ໃຫ້ເປັນຮູບປະທຳ. ຈາກການຊີ້ນຳ-ນຳພາວຽກງານດັ່ງກ່າວ, ຂະແໜງປ່າໄມ້ ສາມາດອອກດໍາລັດສ້າງຕັ້ງປ່າປ້ອງກັນແຫ່ງຊາດໄດ້ 8 ແຫ່ງ, ຍົກລະດັບປ່າສະຫງວນແຫ່ງຊາດ ເປັນອຸທິຍານແຫ່ງຊາດ ໄດ້ 6 ແຫ່ງ (ແຜນການ 2021-2025 ແມ່ນ 5 ແຫ່ງ), ການປູກໄມ້ອຸດສາຫະກຳ ປະຕິບັດໄດ້ 32.270 ເຮັກຕາ ເທົ່າກັບ 16% ຂອງແຜນການ (2 ແສນເຮັກຕາ); ຟື້ນຟູປ່າຊຸດໂຊມ ແບບທໍາມະຊາດ ແລະ ປູກເສີມ ໄດ້ 132.755 ເຮັກຕາ, ເທົ່າກັບ 7% ຂອງແຜນການ 1,8 ລ້ານເຮັກຕາ, ສໍາເລັດການວາງແຜນຄຸ້ມຄອງປ່າໄມ້ຂັ້ນບ້ານ ໄດ້ 486 ບ້ານ, ປະເມີນສິນເຊື່ອກາກບອນ ຄັ້ງທີ 1 (2019- 2021) ຢູ່ 6 ແຂວງພາກເໜືອ ຈໍານວນ 3,2 ລ້ານໂຕນ ເທົ່າກັບມູນຄ່າ 16 ລ້ານໂດລາ, (ຫຼຸດຄາດໝາຍ 0,2 ລ້ານໂຕນ ຫຼື ເທົ່າກັບ 1.000.000 ໂດລາ). ພາຍຫຼັງມີ ການມອບ-ຮັບ ວຽກງານ ໂຮງງານປຸງແຕ່ງໄມ້, ເຄື່ອງປ່າຂອງດົງ ແລະ ຢາງພາລາ ໄດ້ປະສານສົມທົບກັບ ພາກສ່ວນທີ່ກ່ຽວຂ້ອງຂັ້ນສູນກາງ ແລະ ຂັ້ນທ້ອງຖິ່ນ ເກັບກໍາຂໍ້ມູນ ສາມາດສັງລວມ ບັນດາໂຮງງານປຸງແຕ່ງໄມ້, ເຄື່ອງປ່າຂອງດົງ ແລະ ຢາງພາລາ ມີທັງໝົດ ຈຳນວນ 1.320 ແຫ່ງ. ພ້ອມດຽວກັນນັ້ນ, ສາມາດເກັບກໍາຂໍ້ມູນກ່ຽວກັບ ມູນຄ່າການຂຸດຄົ້ນ, ການສົ່ງອອກຜະລິດຕະພັນໄມ້ປູກ ແລະ ເຄື່ອງປ່າຂອງດົງ ສາມາດປະຕິບັດໄດ້ທັງໝົດ 1.483.901.059 ໂດລາ, ໃນນັ້ນ ສົ່ງອອກຜະລິດຕະພັນ ໄມ້ 751.010.580 ໂດລາ, ໄມ້ທ່ອນ (ໄມ້ປູກ) 19.518.772 ໂດລາ, ເຄື່ອງປ່າຂອງດົງ 30.235.550 ໂດລາ ແລະ ຢາງພາລາ 683.136.157 ໂດລາ. ນອກຈາກນີ້, ການສົ່ງອອກໄມ້ ຜ່ານ ສປປ ລາວ ໄປປະເທດທີ 3 ມີມູນຄ່າ 5.097.105 ໂດລາ.
ນັ້ນ, ແມ່ນບາງອັນພົ້ນເດັ່ນ ທີ່ມີໃນການຈັດຕັ້ງປະຕິບັດວຽກງານປ່າໄມ້ ພາຍໃຕ້ການນໍາພາຂອງພັກໄລຍະຜ່ານມາ ທ່າມກາງສະພາບຄວາມຫຍຸ້ງຍາກດ້ານເສດຖະກິດ-ການເງິນ ແລະ ບັນຫາອື່ນໆ. ປັດຈຸບັນ ກໍຄືຊຸມປີຕໍ່ໜ້ານີ້, ພັກເຮົາຮັບຮູ້ແຈ້ງຄວາມຮັບຜິດຊອບ ອັນໜັກໜ່ວງຂອງຕົນ ໃນການນຳພາປວງຊົນລາວທັງຊາດສືບຕໍ່ຈັດຕັ້ງປະຕິບັດກອງປະຊຸມໃຫຍ່ຄັ້ງທີ XI ຂອງພັກ, ຕັ້ງໜ້າສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ເພື່ອສ້າງການຫັນປ່ຽນການພັດທະນາເສດຖະກິດ-ສັງຄົມ ໄປສູ່ຄຸນນະພາບໃໝ່ຢ່າງແຂງແຮງ, ຍົກລະດັບຄຸນນະພາບຊີວິດຂອງປະຊາ ຊົນໃຫ້ສູງຂຶ້ນ, ສືບຕໍ່ນໍາປະເທດຊາດພົ້ນຈາກສະຖານະດ້ອຍພັດທະນາ ແລະ ກ້າວເດີນສູ່ຈຸດໝາຍສັງຄົມນິຍົມ.
ໃນໂອກາດນີ້, ທ່ານ ສົມຫວັງ ພິມມະວົງ ກໍໄດ້ສະແດງຄວາມຮູ້ບຸນຄຸນ, ຂອບອົກຂອບໃຈນໍາ ການນຳພັກເຮົາ, ການຈັດຕັ້ງຂັ້ນເທິງ ທີ່ໄດ້ໃຫ້ການຊີ້ນໍາ ແລະ ນຳພາ ວຽກງານຂະແໜງການປ່າໄມ້ຕະຫຼອດມາ; ພ້ອມທັງກ່າວອວຍພອນວ່າ: “ຂໍອວຍພອນໄຊອັນປະເສີດແດ່ ທ່ານການນຳພັກ-ລັດ ຈົ່ງມີສຸຂະພາບແຂງແຮງ, ປະສົບຜົນສໍາເລັດໃນໜ້າທີ່ອັນມີກຽດຂອງທ່ານ ແລະ ສືບຕໍ່ຊີ້ນຳ-ນຳພາ ພາລະກິດທີ່ໜັກໜ່ວງ, ເຕັມໄປດ້ວຍສິ່ງທ້າທາຍ ແຕ່ມີກຽດສະຫງ່າ; ສືບຕໍ່ນໍາພາ ສ້າງສາບູລະນະລະບອບປະຊາທິປະໄຕ ປະຊາຊົນ, ກ້າວເດີນສູ່ຈຸດໝາຍສັງຄົມນິຍົມຢ່າງໜັກແໜ້ນ ແລະ ມີໄຊ”.
ຄໍາເຫັນ