ພັກ ປປ ລາວ ໄດ້ນໍາພາປະເທດຊາດ ເດີນຕາມເສັ້ນທາງສັງຄົມນິຍົມ ຊຶ່ງແມ່ນຈຸດໝາຍ ແລະ ຄວາມມຸ່ງມາດປາຖະໜາຂອງປະຊາຊົນ

ຮອງລັດຖະມົນຕີກະຊວງປ້ອງກັນປະເທດຫົວໜ້າກົມໃຫຍ່ການເມືອງກອງທັບໄດ້ໃຫ້ສຳພາດຕໍ່ໜັງສືພິມປະຊາຊົນ ໃນວັນທີ 12ມີນາ ຜ່ານມາ ທີ່ກະຊວງປ້ອງກັນປະເທດ, ໂດຍໄດ້ສະແດງເຖິງຄວາມຮູ້ສຶກຕໍ່ວັນສຳຄັນດັ່ງກ່າວແລະ ບາງຜົນງານທີ່ພົ້ນເດັ່ນຂອງຄະນະພັກກະຊວງປ້ອງກັນປະເທດ ໃນການນໍາພາຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກເຂົ້າສູ່ວຽກງານຕົວຈິງ.

ພົນຕີ ວົງສອນ ອິນປານພິມ ໄດ້ກ່າວວ່າ: ຂ້າພະເຈົ້າຮູ້ສຶກເອກອ້າງ ແລະ ພາກພູມໃຈເປັນຢ່າງຍິ່ງ ທີ່ໃນຕະຫຼອດໄລຍະ 70 ປີມາ. ເວລາໃດພັກກໍເຊີດຊູບົດບາດ, ຄວາມສາມາດນໍາພາຂອງຕົນ ແລະ ມີໄຫວພິບ, ສະຫຼາດສ່ອງໃສ ສາມາດນໍາພາປະເທດຊາດ ຜ່ານວິກິດ ແລະ ຄວາມຫຍຸ້ງຍາກນາໆປາການ ບໍ່ວ່າໃນໄລຍະຕໍ່ສູ້ປົດປ່ອນຊາດ ກໍຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ, ເຖິງແມ່ນວ່າສະພາບການ ຈະດຸເດືອດຂ້ຽວຂາດ, ຫຍຸ້ງຍາກສັບສົນ, ລະອິດລະອ້ຽວປານໃດກໍຕາມ ແຕ່ພັກເຮົາກໍສາມາດນໍາພາປະເທດຊາດຜ່ານໄປໄດ້ຢ່າງມີໄຊ; ວັນສ້າງຕັ້ງພັກຄົບຮອບ 70 ປີແມ່ນໄດ້ເຮັດໃຫ້ປວງຊົນລາວທັງຊາດມີຄວາມເອກະອ້າງທະນົງໃຈ ຕໍ່ຜົນງານໄຊຊະນະອັນໃຫຍ່ຫຼວງທີ່ທົ່ວພັກ, ທົ່ວກອງທັບ ແລະ ທົ່ວປວງຊົນລາວບັນດາເຜົ່າຍາດມາໄດ້, ໃນການຕໍ່ສູ້ຕ້ານກັບຈັກກະພັດລ່າເມືອງຂຶ້ນແບບເກົ່າ ແລະ ແບບໃໝ່, ສາມາດປົດປ່ອຍປະເທດຊາດໄດ້ຢ່າງສົມບູນ ແລະ ສະຖາປະນາປະເທດຊາດ ໃນປີ 1975; ພາຍຫຼັງໄດ້ຮັບການປົກປ່ອຍ, ພັກໄດ້ນໍາພາປະເທດຊາດ ເດີນຕາມເສັ້ນທາງສັງຄົມນິຍົມ ຊຶ່ງແມ່ນຈຸດໝາຍ ແລະ ຄວາມມຸ່ງມາດປາຖະໜາຂອງພັກ ກໍຄືປວງຊົນລາວບັນດາເຜົ່າໄດ້ຂີດໝາຍເອົາໄວ້ຊຶ່ງໄດ້ພິສູດໃຫ້ເຫັນວ່າ: ການຈັດຕັ້ງປະຕິບັດແນວທາງປ່ຽນແປງໃໝ່ ຢ່າງມີຫຼັກການຂອງພັກ ໃນໄລຍະ 30 ກວ່າປີມານີ້ ໄດ້ມີຜົນສໍາເລັດໃນຫຼາຍດ້ານ ເປັນຕົ້ນ: ສາມາດປົກປັກຮັກສາ ເອກະລາດ ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດໄວ້ໄດ້ຢ່າງໝັ້ນຄົງ, ການພັດທະນາເສດຖະກິດ-ສັງຄົມ ໄດ້ດໍາເນີນໄປຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນບັນດາເຜົ່ານັບມື້ດີຂຶ້ນ ຖ້າທຽບໃສ່ໃນເມື່ອກ່ອນ, ແນວທາງການຕ່າງປະເທດຂອງພັກ ໄດ້ຮັບການຈັດຕັ້ງຢ່າງມີໝາກມີຜົນ, ຊື່ສຽງ, ບົດບາດ ຂອງ ສປປ ລາວ ສູງເດັ່ນຂຶ້ນໃນເວທີສາກົນ ແລະ ພາກພື້ນ.

ທ່ານໄດ້ໃຫ້ຮູ້ຕື່ມອີກວ່າ: ຕໍ່ກັບກໍາລັງປະກອບອາວຸດ ເວົ້າລວມ, ເວົ້າສະເພາະ ກອງທັບປະຊາຊົນລາວ ແມ່ນພັກປະຊາຊົນປະຕິວັດລາວ ເປັນຜູ້ກໍ່ຕັ້ງ, ສຶກສາອົບຮົມ ແລະ ກໍ່ສ້າງປັບປຸງໃຫ້ເຕີບໃຫຍ່ເຂັ້ມແຂງທາງດ້ານຈໍານວນ ແລະ ຄຸນນະພາບ, ເວລາໃດພັກກໍໃຫ້ຄວາມສໍາຄັນ, ຄວາມເອົາໃຈໃສ່ໃນການນໍາພາເດັດຂາດ, ໂດຍກົງຮອບດ້ານຕໍ່ກອງທັບ, ສ້າງກອງທັບເປັນກອງທັບປະຕິວັດທີ່ໄວ້ໃຈໄດ້ຂອງພັກ, ເປັນທີ່ເພິ່ງອັນໜັກແໜ້ນຂອງປະຊາຊົນ, ເປັນກໍາແພງເພັດທີ່ແຂງແກ່ນ ປົກປັກຮັກສາປະເທດຊາດໄວ້ໃຫ້ໝັ້ນຄົງ.ຕະຫຼອດໄລຍະ 76 ປີ ແຫ່ງການສ້າງຕັ້ງເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ພາຍໃຕ້ຮົ່ມທຸງສີແດງຂອງພັກ ແລະ ການນໍາພາປີຊາສາມາດ, ສະຫຼາດສ່ອງໃສຂອງພັກ, ກອງທັບກໍເຮັດລ້ອນໜ້າທີ່ອັນໜັກໜ່ວງ ແລະ ມີກຽດສະຫງ່າຂອງຕົນ ທີ່ພັກ ແລະ ປະຊາຊົນມອບໝາຍໃຫ້ນັ້ນຄື: ເປັນກໍາລັງຫຼັກແຫຼ່ງແກ່ນສານ ໃນວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນລາວຮອບດ້ານ, ສາມາດຕີເອົາຊະນະສັດຕູທຸກໂຕ ໃນທຸກໄລຍະຂອງການປະຕິວັດ; ສ້າງເງື່ອນໄຂເອື້ອອໍານວຍໃຫ້ແກ່ການສ້າງສາພັດທະນາປະເທດຊາດ ໃຫ້ຈະເລີນກ້າວໜ້າ, ພ້ອມທັງໄດ້ປະກອບສ່ວນຕົວຈິງ ເຂົ້າໃນການພັດທະນາຊົນນະບົດແກ້ໄຂຄວາມທຸກຍາກຂອງປະຊາຊົນ.ກະຊວງປ້ອງກັນປະເທດ ຊຶ່ງເປັນສູນກາງນໍາພາ-ບັນຊາ ກໍາລັງປະກອບອາວຸດ ກໍຄືກໍາລັງໃນກອງທັບ, ຊຸມປີຜ່ານມາຄະນະພັກກະຊວງປ້ອງກັນປະເທດ ກໍໄດ້ສຸມໃສ່ນໍາພາ-ບັນຊາບັນດາກົມກອງ ກໍາລັງຫຼວງ-ກໍາລັງທ້ອງຖິ່ນ ໃນທົ່ວປະເທດ. ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຕ່າງໆຂອງສູນກາງພັກ, ເວົ້າສະເພາະແມ່ນມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັັກກະຊວງປ້ອງກັນປະເທດ ໄດ້ມີຜົນສໍາເລັດອັນສໍາຄັນພົ້ນເດັ່ນຫຼາຍດ້ານ ເປັນຕົ້ນ:ໄດ້ຮັບປະກັນເຮັດໃຫ້ປະເທດຊາດ ມີສະຖຽນລະພາບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານ, ໄດ້ນໍາພາບັນດາກົມກອງເຄື່ອນໄຫວ ເຮັດໃຫ້ສະພາບຂອບເຂດທົ່ວປະເທດມີຄວາມສະຫງົບ, ບໍລິເວນຊາຍແດນ ແຕ່ເໜືອຮອດໃຕ້ ກໍຄືເຂດໃຈກາງຂອງປະເທດ ໄດ້ມີຄວາມສະຫງົບຢ່າງໜັກແໜ້ນ ສະແດງອອກໃນຕົວຈິງ ການປ້ອງກັນກອງປະຊຸມສຸດຍອດອາຊຽນ ຄັ້ງທີ 44, 45 ທີ່ ສປປ ລາວເປັນເຈົ້າພາບໄດ້ມີຄວາມສະຫງົບປອດໄພ 100%.ໄດ້ຫັນເອົາກໍາລັງລົງກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດຮອບດ້ານຕາມທາງກວ້າງ ແລະ ທາງເລິກ, ລວມມີ 19 ກອງປະຕິບັດງານ ກໍ່ສ້າງຮາກຖານ, ຢູ່ 15 ແຂວງ, ມີ 26 ເມືອງ, 28 ຈຸດສຸມ, 142 ບ້ານຊຶ່ງຜົນສໍາເລັດອັນພົ້ນເດັ່ນແມ່ນການພັດທະນາ 3 ຈຸດສຸມຂອງແຂວງໄຊສົມບູນ; ຈຸດສຸມຄັງວຽງເມືອງໝອກ ແຂວງຊຽງຂວາງ ແລະ ຈຸດສຸມອື່ນໆ ທີ່ຕັ້ງຢູ່ເຂດຊົນນະບົດຫ່າງໄກສອກຫຼີກ, ພ້ອມນີ້, ຍັງໄດ້ຮ່ວມມືກັບກອງທັບປະຊາຊົນຫວຽດນາມ, ພັດທະນາບັນດາກຸ່ມບ້ານຊາຍແດນ ລາວ-ຫວຽດນາມ ຕາມການມອບໝາຍຂອງສູນກາງພັກ, ສອງລັດຖະບານ ລາວ-ຫວຽດນາມ, ປັດຈຸບັນກໍາລັງສຸມໃສ່ ສອງກຸ່ມບ້ານໃໝ່ຄື:ກຸ່ມບ້ານຜາແດງ ເມືອງກວັນ ແຂວງຫົວພັນ; ກຸ່ມບ້ານນໍ້າຮາງ ເມືອງສໍາພັນ ແຂວງຜົ້ງສາລີ ແລະ ກຸ່ມບ້ານອື່ນໆ; ໄດ້ສຸມໃສ່ນໍາພາວຽກງານສຶກສາອົບຮົມການເມືອງແນວຄິດ, ເຮັດໃຫ້ພະນັກງານ-ນັກຮົບ ໃນທົ່ວກອງທັບ ມີຄຸນທາດການເມືອງໜັກແໜ້ນ, ມີຄວາມຈົງຮັກພັກດີ ຕໍ່ພັກ, ຕໍ່ປະເທດຊາດ ແລະ ຕໍ່ປະຊາຊົນ, ມີຄຸນສົມບັດສິນທໍາປະຕິວັດ, ມີຄວາມເດັດດ່ຽວໜຽວແໜ້ນ, ອົດທົນຜ່ານຜ່າຄວາມຫຍຸ້ງຍາກຕ່າງໆ, ຈັດຕັ້ງເຜີຍແຜ່ເຊື່ອມຊຶມບັນດາມະຕິກອງປະຊຸມໃຫຍ່ຕ່າງໆ ໂດຍສະເພາະແມ່ນມະຕິກອງປະຊຸມໃຫຍ່ ຄັ້ງທີ XIຂອງພັກ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັັກກະຊວງປ້ອງກັນປະເທດ. ຈັດຕັ້ງປາຖະກະຖາມູນເຊື້ອວັນສໍາຄັນຕ່າງໆຂອງພັກ, ຂອງຊາດ ແລະ ຂອງກອງທັບ.ໄດ້ເອົາໃຈໃສ່ດໍາເນີນຢ່າງຕັ້ງໜ້າ ເປັນຕົ້ນແມ່ນ: ການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນທັງໝົດ 1,385 ໜ່ວຍພັກ ເທົ່າກັບ 76.94% ຂອງຈໍານວນໜ່ວຍພັກທັງໝົດທົ່ວກອງທັບ, ມີສະມາຊິກພັກແຂງ ກວມ 88.89% ຂອງຈໍານວນສະມາຊິກທັງໝົດ, ໄດ້ສຸມໃສ່ຊີ້ນໍາ ໃນການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ໃນທົ່ວກອງທັບສໍາເລັດ 97%; ຮັບປະກັນລັກສະນະສືບທອດປ່ຽນແທນເປັນແຕ່ລະຮຸ່ນ ໄປຕາມແຜນກໍານົດສ້າງພະນັກງານແຕ່ລະໄລຍະ, ໄດ້ຈັດສົ່ງພະນັກງານໄປຍົກລະດັບ, ກໍ່ສ້າງ, ບໍາລຸງ ຢູ່ພາຍໃນ ແລະ ຕ່າງປະເທດ ແຕ່ລະປີ 300 ເຖິງ 400 ຄົນ; ຮັບປະກັນໄດ້ ດ້ານສະບຽງອາຫານເຄື່ອງນຸ່ງຫົ່ມ, ສະຖານທີ່ຄ້າຍຄູ, ຕະຫຼອດເຖິງສຸຂະພາບຂອງນາຍ ແລະ ພົນທະຫານ; ໄດ້ສຸມນໍາພາຈິດໃຈກຸ້ມຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ປະຕິບັດທິດຊີ້ນໍາ 4 ປູກ 4 ລ້ຽງ ໃນກົມກອງ ເພື່ອແກ້ໄຂຊີວິດການເປັນຢູ່ຂອງກົມກອງ;ໄດ້ສຸມໃສ່ໃນການປະກອບພາຫະນະ ອາວຸດຍຸດໂທປະກອນ ໃຫ້ກົມກອງທະຫານ ເພື່ອຮັບປະກັນໃນການຫັດແອບ ແລະ ກຽມພ້ອມສູ້ຮົບ.ທັງໝົດນັ້ນ ແມ່ນຜົນງານ ກໍຄືຜົນສໍາເລັດ ທີ່ພົ້ນເດັ່ນຈໍານວນໜຶ່ງ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງປ້ອງກັນປະເທດວາງອອກ.

ໂອກາດດັ່ງກ່່າວ,ທ່ານ ພົນຕີ ວົງສອນ ອິນປານພິມໄດ້ຕາງໜ້າໃຫ້ຄະນະນໍາກະຊວງປ້ອງກັນປະເທດ, ນາຍ ແລະ ພົນທະຫານໃນທົ່ວກອງທັບ ຂໍສະແດງຄວາມຮູ້ບຸນຄຸນ ມາຍັງພັກປະຊາຊົນປະຕິວັດລາວ ທີ່ໄດ້ກໍ່ຕັ້ງ, ສຶກສາອົບຮົມ ແລະ ຊີ້ນໍາ-ນໍາພາ ກອງທັບໃຫ້ເຕີບໃຫຍ່ເຂັ້ມແຂງ ແລະ ເຮັດສໍາເລັດໜ້າທີ່ອັນມີກຽດຂອງຕົນ ທີ່ພັກ ແລະ ປະຊາຊົນມອບໝາຍໃຫ້ ໃນແຕ່ລະໄລຍະ ຂໍອວຍພອນໄຊອັນປະເສີດ ໃຫ້ບັນດາທ່ານ ການນໍາ ພັກ-ລັດ, ການນໍາກະຊວງປ້ອງກັນປະເທດ, ພະນັກງານປະຕິວັດອາວຸໂສບໍານານ, ຕະຫຼອດເຖິງປະຊາຊົນລາວບັນດາເຜົ່າໃນທົ່ວປະເທດ, ນາຍ ແລະ ພົນທະຫານໃນທົ່ວກອງທັບປະຊາຊົນລາວ ຈົ່ງມີສຸຂະພາບແຂງແຮງ, ມີພະລານາໄມສົມບູນ; ມີຄວາມຜາສຸກ ພ້ອມກັນອອກແຮງແຂ່ງຂັນ ສ້າງຜົນງານ ເພື່ອຂໍ່ານັບຮັບຕ້ອນ 3 ວັນປະຫວັດສາດຂອງພັກ, ຂອງຊາດ ໃນປີ 2025 ໃຫ້ເປັນຂະບວນຟົດຟື້ນກວ້າງຂວາງ ແລະ ພ້ອມກັນເຮັດສໍາເລັດທຸກໜ້າທີ່ວຽກງານ.

ຊົມເຊີຍວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ຢ່າງສຸດໃຈ !