ບົດລາຍງານລະບຸວ່າ: ລະບົບພະລັງງານແສງຕາເວັນຫຼາຍກວ່າ 5.5 ລ້ານລະບົບທີ່ຕິດຕັ້ງທົ່ວປະເທດເຢຍລະມັນສາມາດຜະລິດໄຟຟ້າໄດ້ປະມານ 87 terawatt-hours (TWh) ໃນປີ 2025, ເພີ່ມຂຶ້ນ 20.83% ເມື່ອທຽບກັບປີ 2024. ພະລັງງານແສງຕາເວັນເປັນອັນດັບສອງຮອງຈາກພະລັງງານລົມ ຊຶ່ງກວມເອົາ 27% ຂອງການຜະລິດໄຟຟ້າທັງໝົດ ແລະ ແຊງໜ້າແຫຼ່ງພະລັງງານອື່ນໆ ຂຶ້ນມາຄອງອັດຕາສ່ວນໃຫຍ່ເປັນອັນດັບສອງໃນໂຄງສ້າງພື້ນຖານໄຟຟ້າຂອງເຢຍລະມັນ.
ເຖິງວ່າການຜະລິດໄຟຟ້າຈາກພະລັງງານແສງຕາເວັນຈະມີການເຕີບໂຕທີ່ເຂັ້ມແຂງ, ແຕ່ການຂະຫຍາຍກຳລັງການຜະລິດຊ້າລົງໃນປີ 2025, ໂດຍກຳລັງການຜະລິດພະລັງງານແສງຕາເວັນໃໝ່ທີ່ຕິດຕັ້ງມີປະມານ 17.5 ກິກະວັດ, ຕໍ່າກວ່າລະດັບປີ 2024 ເລັກນ້ອຍ.
ບົດລາຍງານໄດ້ອະທິບາຍວ່າ: ການຊ້າລົງນີ້ສ່ວນໃຫຍ່ແມ່ນຍ້ອນການຕິດຕັ້ງລະບົບພະລັງງານແສງຕາເວັນເທິງຫຼັງຄາຫຼຸດລົງ. ໂດຍລັດຖະບານໄດ້ຫຼຸດມາດຕະການສິ່ງຈູງໃຈສຳລັບການຕິດຕັ້ງລະບົບພະລັງງານແສງຕາເວັນໃໝ່ເທິງຫຼັງຄາໃນປີຜ່ານມາ ຊຶ່ງຖືກເບິ່ງວ່າເປັນປັດໄຈຫຼັກທີ່ຂັດຂວາງການເຕີບໂຕ.
ທັງນີ້, ເຢຍລະມັນຕັ້ງເປົ້າໝາຍຕິດຕັ້ງລະບົບພະລັງງານແສງຕາເວັນໃຫ້ມີກຳລັງການຜະລິດທັງໝົດ 215 ກິກະວັດພາຍໃນປີ 2030, ໃນຂະນະທີ່ກຳລັງການຜະລິດໃນປັດຈຸບັນແມ່ນປະມານ 118 ກິກະວັດ ຊຶ່ງໝາຍຄວາມວ່າເຢຍລະມັນຈຳເປັນຕ້ອງເພີ່ມກຳລັງການຜະລິດໃໝ່ປະມານ 20 ກິກະວັດຕໍ່ປີເພື່ອບັນລຸເປົ້າໝາຍດັ່ງກ່າວ.
ທ່ານ ຄາສເຕັນ ໂຄນິກ ຜູ້ອຳນວຍການຝ່າຍບໍລິຫານຂອງສະມາຄົມດັ່ງກ່າວ ໄດ້ຮຽກຮ້ອງໃຫ້ລັດຖະບານເລັ່ງກຳຈັດອຸປະສັກທາງການຕະຫຼາດຢ່າງວ່ອງໄວ ພ້ອມທັງຫຼີກລ່ຽງການອ່ອນແອລົງຂອງເງື່ອນໄຂການສະໜອງທຶນສະໜັບສະໜູນລະບົບພະລັງງານແສງຕາເວັນພາຍໃນປະເທດ.
ຄໍາເຫັນ