 |
ໃນພິທີ ທ່ານ ຄໍາສິງ ໄຊສິດທິເດດ ໄດ້ກ່າວວ່າ: ວຽກງານແຮ່ທາດ ແລະ ການຄຸ້ມຄອງຊັບພະຍາກອນທຳມະຊາດ ແມ່ນວຽກງານຍຸດທະສາດທີ່ສຳຄັນ ຊຶ່ງຕິດພັນໂດຍກົງກັບຄວາມໝັ້ນຄົງທາງເສດຖະກິດ, ການພັດທະນາແບບຍືນຍົງ. ເພື່ອຮັບປະກັນໃຫ້ການຄຸ້ມຄອງ, ການຂຸດຄົ້ນ ແລະ ການປຸງແຕ່ງແຮ່ທາດ ດຳເນີນໄປຢ່າງຖືກຕ້ອງ, ໂປ່ງໃສ ແລະ ສອດຄ່ອງກັບແນວທາງນະໂຍບາຍຂອງ ພັກ-ລັດ. ພ້ອມກັນນັ້ນ ຍັງໄດ້ຮຽກຮ້ອງໃຫ້ບັນດາຜູ້ເຂົ້າຮ່ວມ ເອົາໃຈໃສ່ຕິດຕາມຮັບຟັງ, ສຸມສະຕິປັນຍາໃນການຄົ້ນຄວ້າ ແລະ ກ້າປະກອບຄໍາຄິດເຫັນຢ່າງກົງໄປກົງມາ ເພື່ອຮ່ວມກັນກຳນົດວິທີການ ແລະ ມາດຕະການໃນການຄຸ້ມຄອງ, ແກ້ໄຂບັນຫາດ້ານແຮ່ທາດໃຫ້ຖືກທິດທາງ, ແນໃສ່ຮັບປະກັນການນຳໃຊ້ ແລະ ອະນຸລັກຊັບພະຍາກອນແຮ່ທາດໃຫ້ມີປະສິດທິຜົນສູງສຸດ.
ກອງປະຊຸມ ຍັງໄດ້ຮັບຟັງການເຜີຍແຜ່ເຊື່ອມຊຶມບັນດານິຕິກຳ ແລະ ຄຳສັ່ງທີ່ສຳຄັນ ຊຶ່ງປະກອບມີ: ຄໍາສັ່ງຂອງຄະນະເລຂາທິການສູນກາງພັກ ສະບັບເລກທີ 11/ຄລສພ (ລົງວັນທີ 7 ພຶດສະພາ 2026): ວ່າດ້ວຍການເພີ່ມທະວີການຊີ້ນໍາຂອງຄະນະພັກຕໍ່ວຽກງານແຮ່ທາດ, ການຄຸ້ມຄອງ ແລະ ແກ້ໄຂບັນຫາຫຍໍ້ທໍ້ດ້ານຊັບພະຍາກອນທຳມະຊາດ, ແຈ້ງການຂອງຫ້ອງວ່າການສູນກາງພັກ ສະບັບເລກທີ 64/ຫສພ (ລົງວັນທີ 12 ພຶດສະພາ 2026): ເລື່ອງແຈ້ງທິດຊີ້ນໍາຂອງຂັ້ນເທິງ ກ່ຽວກັບການຮີບຮ້ອນຈັດຕັ້ງປະຕິບັດ ຄໍາສັ່ງຂອງຄະນະເລຂາທິການສູນກາງພັກ ຕໍ່ກັບວຽກງານແຮ່ທາດ, ຄໍາສັ່ງນາຍົກລັດຖະມົນຕີ ສະບັບເລກທີ 06/ນຍ (ລົງວັນທີ 7 ມີນາ 2025): ວ່າດ້ວຍການຕິດຕາມ, ກວດກາ ແລະ ແກ້ໄຂບັນຫາແຮ່ຄຳຕົກຂ້ອນ, ຫີນ ແລະ ຊາຍ ຕາມບັນດາສາຍນ້ຳ ແລະ ຮ່ອງຫ້ວຍ, ຄໍາສັ່ງນາຍົກລັດຖະມົນຕີ ສະບັບເລກທີ 46/ນຍ (ລົງວັນທີ 13 ເມສາ 2026): ວ່າດ້ວຍການຕ້ານ ແລະ ສະກັດກັ້ນການລັກລອບຂຸດຄົ້ນ, ປຸງແຕ່ງ, ເກັບຊື້-ຂາຍ ແລະ ນຳເຂົ້າ-ສົ່ງອອກແຮ່ທາດ ແລະ ຜະລິດຕະພັນແຮ່ທາດຕ່າງໆ ທີ່ບໍ່ຖືກຕ້ອງຕາມລະບຽບກົດໝາຍໃນຂອບເຂດທົ່ວປະເທດ.
ການເຜີຍແຜ່ບັນດານິຕິກຳໃນຄັ້ງນີ້ ແມ່ນເພື່ອສ້າງຄວາມຮັບຮູ້, ຄວາມເຂົ້າໃຈທີ່ເປັນເອກະພາບ ໃຫ້ແກ່ພະນັກງານ-ລັດຖະກອນ ພາຍໃນຂົງເຂດການເງິນ, ເພື່ອໃຊ້ເປັນບ່ອນອີງໃນການຈັດຕັ້ງປະຕິບັດວຽກງານຕົວຈິງໃຫ້ມີປະສິດທິຜົນ, ປົກປ້ອງຜົນປະໂຫຍດຂອງຊາດ ແລະ ສ້າງຄວາມຍືນຍົງໃຫ້ແກ່ການພັດທະນາເສດຖະກິດ-ສັງຄົມ ຂອງແຂວງຄຳມ່ວນ ກໍ່ຄືຂອງປະເທດຊາດໃນຕໍ່ໜ້າ.ຂ່າວ: ກອງຄໍາ
ຄໍາເຫັນ