ພະແນກກະສິກຳ ແລະ ປ່າໄມ້ ແຂວງສາລະວັນປະກອບສ່ວນທາງດ້ານວຽກງານໂພຊະນາການ

ໂດຍ: ບຸນຕອມ
ພະແນກກະສິກຳ ແລະ ປ່າໄມ້ ແຂວງສາລະວັນ ໄດ້ມີການປະສານງານ ແລະ ສົມທົບກັບທາງພະແນກສາທາລະນະສຸກ, ເພື່ອເຮັດໃຫ້ການຮ່ວມມືໃນການປະຕິບັດວຽກງານມີຄວາມສອດຄ່ອງນໍາກັນໃນການໂຄສະນາວຽກງານໂພຊະນາການໃຫ້ໄປໃນທິດທາງລວງດຽວກັນ ມີການປະສານງານຢ່າງກົມກຽວບໍ່ມີການຂັດແຍ່ງ ແລະ ຊໍ້າກັນເພື່ອເຮັດໃຫ້ການປະຕິບັດວຽກແຕ່ລະຄັ້ງມີປະສິດທິພາບ ແລະ ມີຜົນສຳເລັດຕາມຄາດໝາຍທີ່ໄດ້ວາງໄວ້
ທ່ານ ວົງປະເສິດ ບຸນເອື້ອວົງສາ ຮອງຫົວໜ້າ ພະແນກກະສິກຳ ແລະ ປ່າໄມ້ ແຂວງສາລະວັນ ໃຫ້ຮູ້ວ່າ: ການສົ່ງເສີມຊຸກຍູ້ວຽກໂພຊະນາການໃຫ້ແກ່ແມ່ ແລະ ເດັກ ຜ່ານມາໄດ້ມີການຈັດຕັ້ງປະຕິບັດຮ່ວມກັນລະຫວ່າງພະແນກກະສິກຳ ແລະ ປ່າໄມ້, ພະແນກສາທາລະນະສຸກ, ພະແນກສຶກສາທິການ ແລະ ກິລາ, ພະແນກແຜນການ ແລະ ການລົງທຶນ ໂດຍສະເພາະແມ່ນໄດ້ປະຕິບັດຕາມພາລະບົດບາດໜ້າທີ່ຕາມຕົວຊີ້ວັດຂອງແຕ່ລະພາກສ່ວນກ່ຽວຂ້ອງການປະກອບສ່ວນທາງດ້ານວຽກງານໂພຊະນາການ ພວກເຮົາໄດ້ເພີ່ມທະວີຄວາມເອົາໃຈໃສ່ ໃນການສ້າງຂະບວນການຜະລິດ ເພື່ອຄ້ຳປະກັນສະບຽງອາຫານໃຫ້ພຽງພໍ ແລະ ເຮັດໃຫ້ປະຊາຊົນສາມາດເຂົ້າເຖິງ ອາຫານທີ່ມີລັກຊະນະຫຼາກຫຼາຍ ຄົບໝວດ ຄົບໝູ່ ໃຫ້ຫຼາຍຂຶ້ນ ໂດຍຍົກສະມັດຖະພາບການຜະລິດກະສິກຳ ໃຫ້ໄດ້ທັງປະລິມານ, ຄຸນນະພາບ ແລະ ຄວາມປອດໄພຂອງອາຫານ ເພື່ອຮັບປະກັນດ້ານໂພຊະນາການ ໃນການດຳລົງຊີວິດປະຈຳວັນຂອງປະຊາຊົນໃຫ້ມີອາຫານການກິນທີ່ສາມາດຕອບສະໜອງ ພະລັງ
ງານ 2.100 ກິໂລກຣໍລີ/ຄົນ/ວັນຂຶ້ນໄປ (ຕາມມາດຕະຖານພົ້ນທຸກທີ່ໄດ້ກໍານົດອອກໃນດຳລັດ 348/ລບ) ຫຼື ກໍານົດການກິນອາຫານປະເພດ ທາດແປ້ງ ບໍ່ໃຫ້ເກີນ 65 ຫາ 70%, ທາດຊີ້ນໃຫ້ໄດ້ 10 ຫາ 15%, ທາດໄຂມັນ ໃຫ້ໄດ້ 15 ຫາ 20% ແລະ ທາດວິຕາມິນ ແລະ ແຮ່ທາດ ປະມານ 3-5%. ແຕ່ໃນປັດຈຸບັນ ສັດສ່ວນທີ່ພວກເຮົາກິນທາດແປ້ງເກືອບເຖິງ 90%. ສໍາລັບການຈັດຕັ້ງປະຕິບັດ 4 ມາດຕະການບຸລິມະສິດຂະແໜງການກະສິກຳ ມີຄວາມຄືບໜ້າພົ້ນເດັ່ນ ຄື:ມາດຕະການ 1ສົ່ງເສີມການຜະລິດພືດຜັກ, ໝາກໄມ້ແລະພືດທີ່ໃຫ້ທາດນ້ຳມັນແບບຫຼາກຫຼາຍແລະຍືນຍົງເພື່ອບໍລິໂພກໃນຄົວເຮືອນ ແລະ ທ້ອງຖິ່ນ, ມາດຕະການ 2ສົ່ງເສີມລ້ຽງສັດນ້ອຍ ລວມທັງສັດນ້ຳ ແລະ ແມງໄມ້ເພື່ອການບໍລິໂພກໃນຄົວເຮືອນແລະທ້ອງຖິ່ນ,ມາດຕະການ 3ສົ່ງເສີມຕ່ອງໂສ້ມູນຄ່າກະສິກຳເພື່ອໂພຊະນາການລວມທັງການແປຮູບ ແລະ ການຕະຫຼາດໃນ ທ້ອງຖິ່ນ ແລະ ມາດຕະການ 4ສົ່ງເສີມການສ້າງລາຍຮັບຈາກການປັບປຸງແລະຄຸ້ມຄອງນຳໃຊ້ຊັບພະຍາກອນທຳມະຊາດ.
ຜ່ານມາຈົນຮອດປັດຈຸບັນໄດ້ຮັບການຊ່ວຍເຫຼືອຈາກພາກລັດ ແລະ ອົງການຈັດຕັ້ງສາກົນຕ່າງໆ ໂດຍແນໃສ່ປະກອບສ່ວນແກ້ໄຂບັນຫາການຂາດສານອາຫານ, ບໍລິໂພກໃຫ້ຖືກຫຼັກອະນາໄມທີ່ມີໂພຊະນາການທີ່ດີແລະ ກິນອາຫານໃຫ້ຄົບໝວດໝູ່ຊຶ່ງປະກອບມີໂຄງການສົ່ງເສີມການຜະລິດກະສິກຳເພື່ອປັບປຸງຊີວິດການເປັນຢູ່ຂອງປະຊາຊົນ (Word Vision), ສະມາຄົມພັດທະນາບ້ານເຮົາ(ACD),ໂຄງການອະນຸລັກຊີວະນາໆພັນ, ໂຄງການພັດທະນາໂຄງລ່າງພື້ນຖານຕາມແລວຕາເວັນອອກ-ຕາເວັນຕົກ, ໂຄງການອາຫານ, ໂຄງການລ້ຽງປາໃນນາເຂົ້າ, ໂຄງການຊຸມຊົນເປັນເຈົ້າການດ້ານສຸຂະອານາໄມ (ສຈຊ), ໂຄງການສົ່ງເສີມການລ້ຽງໄກ່(ສາມສາຍພັນ), ໂຄງການອະນຸລັກຊີວະນາໆພັນ, ໂຄງການອະນຸລັກຫວາຍໄມ້ປ່ອງ (WWF),  ໂຄງການສົ່ງເສີມລະບົບຕ່ອງໂສ້ກະສິກຳເປັນມິດຕໍ່ສິ່ງແວດລ້ອມ, ໂຄງການກາບີ 2, ກອງທຶນຫຼຸດຜ່ອນຄວາມທຸກຍາກ, ໂຄງການກະສິກໍາເພື່ອໂພຊະນາການ(Word Vision).
ທ່ານຍັງໃຫ້ຮູ້ຕື່ມກ່ຽວກັບ ຂໍ້ດີ ແລະ ຂໍ້ຫຍຸ້ງຍາກ ກໍຄືການລົງຕິດຕາມຊຸກຍູ້ວຽກງານສະເພາະແຂວງລົງເມືອງ, ເມືຶອງລົງສຸກສາລາ ເຫັນວ່າຍັງມີຂໍ້ຈໍາກັດຢູ່ເນື່ອງຈາກຂາດງົບປະມານ. ການເຝົ້າລະວັງດ້ານໂພຊະນາການ, ຍັງຂາດອຸປະກອນ ບາງສຸກສາລາບໍ່ມີເລີຍ, ບາງສຸກສາລາມີແຕ່ກໍຊໍາລຸດເປ່ເພໃຊ້ການບໍ່ໄດ້.ສະພາບດ້ານໂພຊະນາການບາງເມືອງຍັງສູງ ເຊັ່ນ: ເມືອງສະໝ້ວຍ, ຕະໂອ້ຍ ເຖິງວ່າຈະມີໂຄງການເຂົ້າຊ່ວຍເຫຼືອກໍຕາມ,ແຕ່ຍັງມີອຸປະສັກຫຼາຍຢ່າງທີ່ບໍ່ເອື້ອຍອໍານວຍໃຫ້ແກ່ການເຄື່ອນໄຫວຈັດຕັ້ງປະຕິບັດເຊັ່ນ: ສະພາບດິນຟ້າອາກາດ ເສັ້ນທາງໄປມາຫາສູ່, ບ້ານເຮືອນຢູ່ກະແຈກກະຈາຍ ການເຂົ້າເຖິງມີ ຄວາມຫຍຸງຍາກ, ການໂຄສະນາສຸຂະສຶກສາ, ປະຊາສໍາພັນຊຸກຍູ້, ປຸກລະດົມຂົນຂວາຍ, ເພື່ອກະຈາຍຂໍ້ມູນຂ່າວສານຍັງບໍ່ທັນໄດ້ດີ ໂດຍສະເພາະເວລາລົງເຮັດກິດຈະກຳໃນຂັ້ນຊຸມຊົນ ຫຼື ຂັ້ນບ້ານ. ມີຄວາມຊິນເຄີຍໃນການປະຕິບັດແບບດັ່ງເດີມເຊັ່ນ: ການຂະລໍາອາຫານ, ການພັກຜ່ອນໜ້ອຍໃນແມ່ຍິງຖືພາ  ແລະ ແມ່ຫຼັງເກີດລູກ ເຮັດໃຫ້ການເບິ່ງແຍງດູແລລູກນ້ອຍບໍ່ເຕັມສ່ວນ.ການຜະລິດ ກະສິກຳ ໂດຍລວມແລ້ວ ແມ່ນການຜະລິດຈຳນວນໜຶ່ງຍັງຜະລິດຂະໜາດນ້ອຍ  ບໍ່ທັນເປັນການຜະລິດກາຍເປັນສິນຄ້າການສ້າງຕົວແບບການຜະລິດຍັງມີໜ້ອຍ, ປະສິດທິພາບການຜະລິດຍັງຕໍ່າ, ການຜະລິດສ່ວນໃຫຍ່ ຂຶ້ນກັບທຳມະຊາດ, ການສົມທົບລະຫວ່າງການຜະລິດເປັນສິນຄ້າກັບຕະຫຼາດ ຍັງບໍ່ທັນກົມກຽວ ການສົ່ງອອກຍັງເນັ້ນໃສ່ວັດຖຸດິບເປັນສ່ວນໃຫຍ່ ແລະ ໃຫ້ປະຊາຊົນໃນການລ້ຽງລູກທີ່ຖືກຕ້ອງ ໃຫ້ນຳເອົາລູກ, ເອົາຫຼານຂອງທ່ານທີ່ມີອາຍຸຕໍ່າກວ່າ 5 ປີລົງມາເພື່ອເຂົ້າຮ່ວມໃນການບໍລິການກວດກາສຸກກະພາບຕາມສະຖານທີ່ຕ່າງໆ ບໍ່ວ່າຈະເປັນຊຸມຊົນຂັ້ນບ້ານ, ກຸ່ມບ້ານ, ສຸກສາລາ ຫຼືໂຮງໝໍນ້ອຍຕາມທີ່ແພດໝໍໄດ້ປະກາດແຈ້ງໃຫ້ປະຊາຊົນໃນແຕ່ລະຄັ້ງແມ່ນໃຫ້ພາລູກພາຫຼານມາທຸກໆຄັ້ງ.
ສ່ວນການເຄື່ອນໄຫວຂອງຄະນະສື່ມວນຊົນຈາກສູນກາງ ຢູ່ແຂວງສາລະວັນ ຄັ້ງນີ້ ເພື່ອຕິດຕາມສະພາບການຈັກຕັ້ງປະຕິບັດວຽກງານໂພຊະນາການແມ່-ເດັກ ມີຂຶ້ນໃນລະຫວ່າງວັນທີ 8-12 ທັນວາ ນີ້ ນຳໂດຍ ທ່ານ ນາງ ນິນລະນາ ພົມມະຈັນ ວິຊາການ ສູນສະຖິຕິ ແລະ ຂ່າວສານສາທາລະນະສຸກກະຊວງສາທາລະນະສຸກ ແລະ ໃຫ້ການສະໜັບສະໜູນ ຈາກ ສະຫະພາບເອີຣົບ(EU) ໂດຍຜ່ານ ອົງການອຸຍນີເຊັບ (Unicef)ປະຈຳລາວ.