ພິທີມອບ-ຮັບ ໄດ້ມີຂຶ້ນໃນວັນທີ 25 ພະຈິກຜ່ານມາ ຢູ່ທີ່ສູນຄົ້ນຄ້ວາກະສິກໍາໜອງແດງ ເມືອງສາລະວັນ, ໂດຍການກ່າວມອບຂອງ ທ່ານ ໂຮ່ ກວາງ ແທັກ ຕາງໜ້າໃຫ້ສູນສົ່ງເສີມກະສິກຳແຂວງບິງດິ້ງ ສສ ຫວຽດນາມ, ຮັບໂດຍທ່ານ ສິນໄຊ ເພັດແພງລາສີ ຮອງຫົວໜ້າພະແນກກະສິກຳ ແລະປ່າໄມ້ແຂວງສາລະວັນ ສປປ ລາວ, ມີພະແນກການຕ່າງປະເທດແຂວງ, ຂະແໜງການທີ່ກ່ຽວຂ້ອງເຂົ້າຮ່ວມ.
ສໍາລັບແນວພັນ ແລະ ປັດໃຈການຜະລິດກະສິກໍາ ທີ່ໄດ້ມອບໃນຄັ້ງນີ້, ມີປະເພດແນວພັນສາລີ, ເຂົ້າໜຽວ ພັນປັບປຸງ, ຝຸ່ນຊີວະພາບອິນຊີ, ຝຸ່ນຢູເຣຍ ແລະ ຝຸ່ນປະເພດອື່ນໆ, ນອກນັ້ນ: ຍັງມີຢາປາບສັດຕູພືດ, ຢາກະຕຸ້ນການເຕີບໂຕ, ຢາຈັດການດິນ ແລະ ອຸປະກອນການຜະລິດ ປະເພດຕ່າງໆ ລວມມູນຄ່າທັງໝົດ 139 ລ້ານດົ້ງ.
ສໍາລັບແນວພັນ ແລະ ປັດໄຈການຜະລິດກະສິກໍາຈໍ ານວນດັ່ງກ່າວແມ່ນຈະໄດ້ທົດລອງ ແລະ ນໍາໃຊ້ເຂົ້າໃນການຜະລິດລະດູແລ້ງໂດຍສະເພາະແມ່ນການປູກສາລີຫວານ, ໂດຍໄດ້ກໍານົດຈັດຕັ້ງປະຕິບັດຢູ່ 3 ບ້ານເປົ້າໝາຍຂອງເມືອງ ສາລະວັນຄື: ບ້ານໂພນບົກ, ໂພນຕານ ແລະ ບ້ານນາຂ້ອຍສາວ ໃນເນື້ອທີ 5 ເຮັກຕາ ຊຶ່ງໄລຍະການຈັດຕັ້ງປະຕິບັດແມ່ນ 5 ເດືອນ (ເດືອນ ຕຸລາ 2024 ຫາ ເດືອນ ມີນາ 2025),ໂດຍຈະມີພະນັກງານວິຊາການຈາກພະແນກກະສິກໍາ ແລະ ປ່າໄມ້ ແຂວງສາລະວັນ ແລະ ແຂວງບິງດີ້ງ, ລົງຊຸກຍູ້, ຕິດຕາມ, ແນະນໍາຂັ້ນຕອນການຜະລິດ ແລະ ໃຫ້ຄວາມຮູ້ດ້ານເຕັກນິກວິຊາການໃຫ້ແກ່ປະຊາຊົນ, ນັບແຕ່ຂັ້ນຕອນທໍາອິດ ຈົນຮອດຂັ້ນຕອນການເກັບກູ້.
(ຂ່າວ: ທິດລານີ ໂຄດໂຍທາ).
ຄໍາເຫັນ