ພັນໄມ້ທີ່ມີຄຸນຄ່າຫຼາຍກວ່າ 400 ຕົ້ນ ຖືກນໍາມາປູກຕາມເສັ້ນທາງທ່ອງທ່ຽວຍ່າງປ່າ ໃນປ່າສະຫງວນແຫ່ງຊາດນໍ້າຫ້າ

ພັນໄມ້ທີ່ມີຄຸນຄ່າຫຼາຍກວ່າ 400 ຕົ້ນ ຖືກນໍາມາປູກຕາມເສັ້ນທາງທ່ອງທ່ຽວຍ່າງປ່າ ໃນປ່າສະຫງວນແຫ່ງຊາດນໍ້າຫ້າ ເພື່ອສະເຫຼີມສະຫຼອງ ວັນປູກຕົ້ນໄມ້ແຫ່ງຊາດ ຄົບຮອບ 46 ປີ (1 ມິຖຸນາ 1980 - 1 ມິຖຸນາ 2026) ແລະ ວັນເດັກນ້ອຍສາກົນ ຄົບຮອບ 101 ປີ (1 ມິຖຸນາ 1925 - 1 ມິຖຸນາ 2026). ພະ ແນກວັດທະນະທໍາ ແລະ ການທ່ອງທ່ຽວຫຼວງນໍ້າທາ (ວທ) ຮ່ວມກັບຫ້ອງການວັດທະນະທໍາ ແລະ ການທ່ອງທ່ຽວເມືອງຫຼວງນໍ້າທາ, ສະມາຄົມທຸລະກິດທ່ອງທ່ຽວ, ພະນັກງານນໍາທ່ຽວຂັ້ນແຂວງ, ພະນັກງານນໍາທ່ຽວຂັ້ນບ້ານ, ພ້ອມດ້ວຍ ຜູ້ປະກອບການຮ້ານອາຫານເມົາເທິນວີວ (Mountain View) ແລະ ປະຊາຊົນ ໄດ້ຈັດກິດຈະກໍາປູກຕົ້ນໄມ້ ຟື້ນຟູເສັ້ນທາງທ່ອງທ່ຽວຍ່າງປ່າ ໃນປ່າສະຫງວນແຫ່ງຊາດນໍ້າຫ້າ ຂຶ້ນໃນວັນທີ 1 ມິຖຸນາ ນີ້ ຊຶ່ງນໍາພາຂະບວນໂດຍ ທ່ານ ສົມສະຫວາດ ນາມອິນທາ ຮອງຫົວໜ້າພະແນກວັດທະນະທໍາ ແລະ ການທ່ອງທ່ຽວແຂວງຫຼວງນໍ້າທາ ເພື່ອເພີ່ມຄວາມຂຽວງາມ ແລະ ຟື້ນຟູລະບົບນິເວດ ຕາມເສັ້ນທາງທ່ອງທ່ຽວຍ່າງປ່າ ໃນເຂດປ່າສະຫງວນແຫ່ງຊາດນໍ້າຫ້າ ຢ່າງເປັນຂະບວນຟົດຟື້ນ. ກິດຈະກໍາປູກຕົ້ນໄມ້ໃນຄັ້ງນີ້ ຈັດຂຶ້ນພາຍໃຕ້ວິໄສທັດການພັດທະນາສີຂຽວ ຈຸດປະສົງເພື່ອສະເຫຼີມສະຫຼອງ 2 ວັນປະຫວັດສາດ ແລະ ປູກຈິດສໍານຶກໃຫ້ຮຸ່ນເຍົາວະຊົນ ຮ່ວມສະເຫຼີມສະຫຼອງວັນປູກຕົ້ນໄມ້ແຫ່ງຊາດ ຄົບຮອບ 46 ປີ ແລະ ວັນເດັກນ້ອຍສາກົນ ຄົບຮອບ 101 ປີ, ທັງເປັນການບົ່ມສອນ, ສ້າງຈິດສໍານຶກໃຫ້ແກ່ເດັກນ້ອຍ ແລະ ເຍົາວະຊົນ ໃຫ້ຮັບຮູ້ເຖິງຄຸນຄ່າຂອງທໍາມະຊາດ, ຮູ້ຮັກ ແລະ ຫວງແຫນສິ່ງແວດລ້ອມແຕ່ຄາວຍັງເຍົາໄວ ເພື່ອເປັນກໍາລັງສໍາຄັນໃນການປົກປັກຮັກສາໂລກໃນອະນາຄົດ; ເພື່ອຟື້ນຟູລະບົບນິເວດ ແລະ ສົ່ງເສີມການທ່ອງທ່ຽວແບບອະນຸລັກ (Eco-Tourism) ເພື່ອເພີ່ມຄວາມອຸດົມສົມບູນ ໃຫ້ແກ່ຊີວະນາໆພັນ ແລະ ຄວາມຂຽວງາມ ຕາມເສັ້ນທາງທ່ອງທ່ຽວຍ່າງປ່າ ໃນປ່າສະຫງວນແຫ່ງຊາດນໍ້າຫ້າ ຊຶ່ງເປັນຈຸດຂາຍດ້ານການທ່ອງທ່ຽວທີ່ສໍາຄັນຂອງແຂວງຫຼວງນໍ້າທາ, ແນໃສ່ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ມັກຮັກໃນທໍາມະຊາດ; ຮັດແໜ້ນຄວາມສາມັກຄີ ແລະ ການມີສ່ວນຮ່ວມ ລະຫວ່າງ ພາກລັດ, ພາກທຸລະກິດ ແລະ ຊຸມຊົນ, ສ້າງກົນໄກການຮ່ວມມືທີ່ເຂັ້ມແຂງ ລະຫວ່າງ ອົງການຈັດຕັ້ງລັດ, ສະມາຄົມທຸລະກິດ, ຜູ້ປະກອບການຮ້ານອາຫານ - ການທ່ອງທ່ຽວ ແລະ ປະຊາຊົນທ້ອງຖິ່ນ ໃນການມີສ່ວນຮ່ວມຮັບຜິດຊອບຕໍ່ສັງຄົມ ແລະ ຮ່ວມກັນພັດທະນາການທ່ອງທ່ຽວແບບຍືນຍົງ. ທ່ານ ສົມສະຫວາດ ນາມອິນທາ ໄດ້ມີຄໍາເຫັນຕໍ່ກິິດຈະກໍາຄັ້ງນີ້ວ່າ: ການປູກຕົ້ນໄມ້ ບໍ່ແມ່ນພຽງແຕ່ການຢອດແກ່ນພັນລົງໃນດິນ, ແຕ່ມັນຄືການປູກຝັງຄວາມຫວັງ, ປູກຝັງອະນາຄົດສີຂຽວໃຫ້ແກ່ແຂວງຫຼວງນໍ້າທາ ຂອງພວກເຮົາ. ການທີ່ນໍາພາເດັກນ້ອຍ ແລະ ເຍົາວະຊົນມາຮ່ວມປູກຕົ້ນໄມ້ ກໍເພື່ອໃຫ້ເຂົາເຈົ້າໄດ້ສໍາຜັດ ແລະ ຮູ້ສຶກເປັນເຈົ້າຂອງປ່າໄມ້ອັນລໍ້າຄ່ານີ້. ກິດຈະກໍາສະເຫຼີມສະຫຼອງ ວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ປະຈໍາປີ 2026 ຂອງພະແນກວັດທະນະທໍາ ແລະ ການທ່ອງທ່ຽວແຂວງຫຼວງນໍ້າທາ ໃນຄັ້ງນີ້ ໄດ້ສ້າງຄວາມສາມັກຄີ ແລະ ຄວາມປະທັບໃຈ ຊຶ່ງເປັນການຢືນຢັນເຖິງຄວາມມຸ່ງໝັ້ນຂອງແຂວງຫຼວງນໍ້າທາ ໃນການຂັບເຄື່ອນການທ່ອງທ່ຽວສີຂຽວ ທີ່ເປັນມິດຕໍ່ສິ່ງແວດລ້ອມຢ່າງແທ້ຈິງ. ຜູ້ເຂົ້າຮ່ວມໃນກິດຈະກໍາດັ່ງກ່າວ ໄດ້ຮ່ວມແຮງຮ່ວມໃຈກັນຍ່າງປ່າ ແລະ ປູກຕົ້ນໄມ້ ໄປຕາມເສັ້ນທາງທ່ອງທ່ຽວຍ່າງປ່າ ໃນປ່າສະຫງວນແຫ່ງຊາດນໍ້າຫ້າ ເປັນໄລຍະທາງຍາວເຖິງ 4 ກິໂລແມັດ.ຕົ້ນໄມ້ທີ່ນໍາມາປູກໃນຄັ້ງນີ້ ລ້ວນແຕ່ເປັນພັນໄມ້ທີ່ມີຄຸນຄ່າ, ເໝາະສົມກັບສະພາບທໍາມະຊາດ ແລະ ຊ່ວຍເພີ່ມຄວາມສວຍງາມໃຫ້ແກ່ເສັ້ນທາງທ່ອງທ່ຽວ ລວມທັງໝົດ 420 ກວ່າຕົ້ນ ປະກອບມີ ຕົ້ນຝາງແດງ, ຕົ້ນໄຮ, ຕົ້ນໝາກໄຟ (ເພີ່ມແຫຼ່ງອາຫານໃຫ້ສັດປ່າ), ຕົ້ນເກົາເລົາ, ຕົ້ນດອກສະເລົາ ແລະ ພັນໄມ້ດອກ ປະດັບປະດາຕ່າງໆ ທີ່ຈະອອກດອກສ້າງສີສັນໃຫ້ແກ່ນັກທ່ອງທ່ຽວໃນອະນາຄົດ. ຂ່າວ: ພະແນກ ວທ ຫຼວງນໍ້າທາ